06 Oct 2024, 12:13
ދިވެހިރާއްޖޭގެ އިސްލާމިކް ޔުނިވާސިޓީ (އައިޔޫއެމް) އިން "ރިވެލި 2024" ގެ ނަމުގައި ދިރާސާކުރާ ފަރާތްތަކަށް ޚާއްސަ މުބާރާތެއް ބޭއްވުމަށް ތައްޔާރުވެއްޖެއެވެ.
އައިޔޫއެމްއިން ބުނި ގޮތުގައި "ރިވެލި 2024" އަކީ ތަރައްޤީގެ ބިންގަލެއްގެ ގޮތުގައި، ދިރާސާކުރުމަށް ލޯބިކުރާ މުޖްތަމައެއް ބިނާކުރުމަށް އަމާޒުކޮށް ބާއްވާ މުބާރާތެކެވެ.
މި މުބާރާތުގައި، ދިރާސާކުރުމަށް އާންމުންގެ މެދުގައި ޝައުގުވެރިކަން އުފެއްދުމާއި ޕޯސްޓް ގްރެޖުއޭޓް ދަރިވަރުންނަށް އެ ދަރިވަރުން ޝައުގުވެރިވާ ދާއިރާތަކާއި ގުޅޭގޮތުން ކޮއްފައިވާ ދިރާސާތަށް އާންމުންނަށް ހުށަހެޅުމުގެ ފުރުޞަތު ފަހިވެގެންދާނެއެވެ.
މި މަހު 26ވާ ހޮނިހިރު ދުވަހު ބޭއްވުމަށް ހަމަޖެހިފައިވާ މި މުބާރާތުގައި ބައިވެރިވެ ވަނަ ހޯދާ ފަރާތްތަކަށް 5،000 ރުފިޔާގެ އިނާމް ދިނުމަށް ވަނީ ކަނޑައަޅާފައެވެ.
މީގެ އިތުރުން، "ރިވެލި 2024"ގައި ބައިވެރިވާ ހުރިހާ ފަރާތްތަކަށް ސެޓްފިކެޓް ދިނުމަށް ވެސް ހަމަޖެހިފައިވެއެވެ.
"ރިވެލި 2024"ގައި ބައިވެރިވުމަށް ޝައުގުވެރިވާ ބޭފުޅުންނަށް ގޫގަލް ލިންކު މެދުވެރިކޮށް، މަޢުލުމާތު ފުރިހަމަކުރުމަށް ފަހު ބައިވެރިވުމަށް ރަޖިސްޓަރުކުރެވޭނެއެވެ.