05 Oct 2024, 14:07
ރަށެއްގެ ފަޅަށް ވަންނަން ރޭސް ޖެހި ލޯންޗުތަކެއްގެ މައްސަލަ ފުލުހުން ބަލަން ފަށައިފިއެވެ.
ސޯޝަލް މީޑިއާގައި ދައުރުވަމުން އަންނަވީޑިއޯއަކުންފެންނަނީ، ރަށެއްގެ ފަޅަށް ވަނުމަށް ދެ ލޯންޗަކުން ރޭސް ޖަހާ މަންޒަރެވެ.
އެގޮތުން، އެއް ލޯންޗުގެ ދުވެލި ބާރުކޮށް، އަނެއް ލޯންޗަށް ވުރެ ކުރިން ފަޅަށް ވަންނަތަން ފެނެއެވެ. ދެ ލޯންޗް ފަޅަށް ވަނީ ވަރަށް ކައިރިކައިރިންނެވެ.
ފުލުހުން ބުނީ އެ މައްސަލަ ތަހުގީގު ކުރަމުން އަންނަ ކަމަށާއި ނަމަވެސް މިހާތަނަށް އެ މައްސަލައިގައި މީހަކު ހައްޔަރު ނުކުރާ ކަމަށެވެ.
ވީޑިއޯއިން އެ ފެންނަ މަންޒަރަކީ މިދިޔަ އޮގަސްޓް މަހުގެ 13 ވަނަ ދުވަހު އއ. އަތޮޅުގައި ހިނގާފައިވާ ކަމެއް ކަމަށް ފުލުހުން ބުންޏެވެ.
ދެ ލޯންޗު ޖެހި ނުރައްކާތެރި އެތައް އެކްސިޑެންޓެއް މީގެ ކުރިން ހިނގާފައި އެބަހުއްޓެވެ. އެފަދަ ހާދިސާތަކުގައި އެތައް ބައެއްގެ ފުރާނަ ވެސް ގެއްލިފައިވެއެވެ.