04 Oct 2024, 18:47
އެންމެ ހިތްހެޔޮ މީހުން އުޅޭ ގައުމުތަކުގެ ލިސްޓުގެ ހަތަރު ވަނައިގައި ރާއްޖެ ހިމެނިއްޖެއެވެ.
ދުނިޔޭގެ ޓްރެވަލް މަޖައްލާއެއް ކަމަށްވާ "ކޮންޑޭ ނާސްޓް ޓްރެވެލާ" އިން ވަނީ އެ މަޖައްލާގެ ކިޔުންތެރިންނާއި އެކި ގައުމުތަކަށް ޒިޔާރަތްކުރާ ދަތުރުވެރިންގެ ފަރާތުން ދުނިޔޭގެ އެކި ކަންކޮޅުތަކުގައި އެންމެ މެހުމާންދާރީ ރަނގަޅު އަދި އެންމެ ހިތްހެޔޮ މީހުން އުޅޭ ގައުމުތަކާ ގުޅޭ ގޮތުން ސާވޭއެއް ކޮށްފައެވެ.
އެގޮތުން އެކުލަވައިލި ލިސްޓުގެ ހަތަރު ވަނައިގައި ރާއްޖެ ހިމެނެއެވެ.
އެ ލިސްޓުގައި ދުނިޔޭގެ އެންމެ ހިތްހެޔޮ މީހުން އުޅޭ ދިހަ ގައުމަކީ:
ކޯސްޓަ ރިކާ - (ސްކޯ: 96.15)
- ނިއު ޒީލޭންޑް - (ސްކޯ: 95.63)
- ތައިލޭންޑް - (ސްކޯ: 94.37)
- ދިވެހިރާއްޖެ - (ސްކޯ: 93.50)
- ކެނެޑާ - (ސްކޯ: 93.33)
- ޖަޕާން - (ސްކޯ: 93.25)
- ސްރީ ލަންކާ - (ސްކޯ: 92.73)
- މެކްސިކޯ - (ސްކޯ: 92.17)
- ވިއެޓްނާމް - (ސްކޯ: 90.00)
- ސީޝެލްސް - (ސްކޯ: 88.84)
އެ މަޖައްލާގައި ރާއްޖެ ސިފަކޮށްފައި ވަނީ ހުވަފެނީ ހަނީމޫން މަންޒިލެއްގެ ގޮތުގައެވެ. އެހެންނަމަވެސް އާއިލީ ޗުއްޓީއަކަށް ކުޑަކުދިން ގޮވައިގެންނާއި ރައްޓެހިންނާއެކު ވެސް އައުމަށް ރާއްޖޭގެ ރިސޯޓުތަކަކީ ކަމުދާނެ މަންޒިލެއް ކަމަށް ވެސް ބުނެފައިވެއެވެ.
އިނގިރޭސިވިލާތުގެ ކޮންޑޭ ނާސްޓް ޓްރެވެލާއަކީ ދުނިޔޭގެ އެންމެ މަގުބޫލު އެއް ޓްރެވަލް މަޖައްލާއެވެ. މި މަޖައްލާއިން ދުނިޔޭގެ އެކި ކަންކޮޅުތަކަށް ދަތުރުދާން ހިތްގައިމު މަންޒިލްތައް ޕްރޮމޯޓްކޮށްދެއެވެ. އަދި ކިޔުންތެރިންނަށް ކަމުދާނެ ފަދަ މަންޒިލްތަކުގެ މައުލޫމާތުތައް އެ މަޖައްލާ މެދުވެރިކޮށް ގެނެސްދެއެވެ.