03 Oct 2024, 15:57
ދިވެހިރާއްޖެއަށް ގިނަގުނަ ޚިދުމަތްތަކެއް ކޮށްދެއްވި އަބްދުލްމަޖީދު މާހިރު މިއަދު އަވަހާރަވެއްޖެއެވެ.
އުމުރުން 90ގެ އަހަރުތައް ގުނަމުން ދިޔަ އަބްދުލްމަޖީދު މާހިރު އަވަހާރަވީ މިއަދުގެ ވަގުތެއްގައެވެ.
އަބްދުލްމަޖީދު މާހިރުގެ ބައްޕާފުޅަކީ ވެލާނާގޭ މުހައްމަދު ދީދީއެވެ. އޭނާ ވަނީ އޭނާއަށް ބޮޑުބޭބެ ވިދާޅުވާ ކުރީގެ ރައީސް ވެލާނާގޭ އިބްރާހިމް ނާސިރުގެ ވެރިކަމުގައި ސަރުކާރުގެ އިސް މަގާމުތަކެއް ފުރުއްވައިފައެވެ. އެގޮތުން، މާލީ ވުޒާރާގެ ނައިބު ވަޒީރުކަން ވެސް ކުރެއްވިއެވެ.
އޭގެ ފަހުން މާލޭ މުނިސިޕަލްޓީގެ ރައީސްކަން ވެސް ކުރެއްވިއެވެ. އަދި، އެއަށް ފަހު ކުރީގެ ރައީސް މައުމޫން އަބްދުލްގައްޔޫމްގެ ވެރިކަމުގައި އޭނާ ވަނީ ސަރުކާރުގެ ފެން ކުންފުނި، އެމްޑަބްލިއުއެސްސީގެ އިސް މަގާމެއް ފުރުއްވައިފައެވެ.
އަބްދުލްމަޖީދު މާހިރު މާލޭ މުނިސިޕަލްޓީގެ ރައީސްކަން ކުރެއްވިއިރު: އޭނާ މިއަދު ވަނީ އަވަހާރަވެފައި --
އަބްދުލްމަޖީދު މާހިރަކީ ކުރީގެ ރައީސް މުޙައްމަދު ނަޝީދުގެ ވެރިކަމުގައި ޑިފެންސް މިނިސްޓަރުކަން ކުރެއްވި އަމީން ފައިސަލްގެ ބައްޕާފުޅެވެ. އަދި، ކުރިން އިނގިރޭސިވިލާތަށް ރާއްޖެއިން ކަނޑައަޅުއްވާފައި ހުންނެވި ހައި ކޮމިޝަނަރު ޑރ. ފަރަހަނާޒް ފައިސަލްގެ ވެސް ބައްޕާފުޅެވެ. އެ ދެ ބޭފުޅުންނަކީ ކުރީގެ ރައީސް މުޙައްމަދު އަމީންގެ ދަރިކަލުން އަމީނާ މުޙައްމަދު އަމީނަށް ހުންނަވާ ދެ ބޭފުޅުންނެވެ.
އެ ދެ ބޭފުޅުންގެ އިތުރުން ވެސް މާހިރުގެ ބޭފުޅުން ތިއްބަވައެވެ.
އަބްދުލްމަޖީދު މާހިރު އަވަހާރަވުމާ ގުޅިގެން ރައީސް ޑރ. މުޙައްމަދު މުއިއްޒު ވަނީ ތައުޒިޔާ ވިދާޅުވެފައެވެ.
"މަރްޙޫމު މާހިރަކީ ދިވެހި ބޭސްވެރި ޙަކީމެކެވެ. ދިވެހި ތާރީޚާއި އާދަކާދައިގެ އެތައް މަޢުލޫމާތެއް މިއަދުގެ ޖީލަށް އޮޅުންފިލުއްވައިދެއްވި އުސްތާޛެކެވެ. ޤައުމަށް ޚިދުމަތްތެރި ޢިލްމީ ޤާބިލު ދަރީންތަކެއް ތަރުބިއްޔަތުކުރެއްވި އަގުހުރި ބައްޕައެކެވެ،" ރައީސް މުއިއްޒު ވިދާޅުވިއެވެ.