29 Aug 2024, 06:57
މިދިޔަ އަހަރު ނެޓްފްލިކްސްއިން ގެނެސްދިން ކްރައިމް ތުރިލަ "ކޯހްރާ"ގެ ދެވަނަ ސީޒަންއެއް ކައިރި މުސްތަގުބަލެއްގައި ގެނެސްދޭނެކަމުގެ ފެހި ސިގްނަލް ނެޓްފްލިކްސްއިން ދީފިއެވެ.
ވެބް ސީރީޒް "ކޯހްރާ"ގެ ދެވަނަ ސީޒަން ވަރަށް އަވަހަށް ފެންނާނެކަން އިއުލާނުކުރަމުން ނެޓްފްލިކްސްއިން ސޯޝަލް މީޑިއާއަށް ދޫކޮށްލި ޕޯސްޓުގައި ވަނީ ބަތަލާ މޯނާ ސިންގް އަދި އެކްޓަރު ބަރުން ސޯބްތީގެ ފޮޓޯއެކެވެ. އެހެންކަމުން މި ވެބް ސީރީޒްގެ ކާސްޓާ މޯނާ ގުޅުނުކަން ވަނީ ކަށަވަރުވެފައެވެ.
މަޝްހޫރު ޓެލެވިޒަން ސީރީޒް "އިސް ޕިޔާރު ކޯ ކިޔާ ނާމް ދޫ"އިން ބޮޑޫ މަޝްހޫރުކަމެއް ހޯދި އެކްޓަރު ބަރުން މި ސީރީސްގައި ފެންނަނީ އާދައިގެ ތަހުގީގު އޮފިސަރެއްގެ ރޯލުންނެވެ. ނަމަވެސް، ދެވަނަ ސީޒަންގައި އެކްޓަރު ފެންނާނީ ޒިންމާދާރު ޒުވާން ފުލުސް އޮފިސަރެއްގެ ރޯލުން ކަމަށް ރިޕޯޓުތައް ބުނެއެވެ.
ބަތަލާ މޯނާ ސިންގް ފިލްމު "ލާލް ސިންގް ޗައްދާ"ގެ މަންޒަރެއްގައި--ފޮޓޯ/ޕިންކްވިލާ
މޯނާ ސިންގް މި ވެބް ސީރީޒްގައި ފެންނާނެ ރޯލާ ބެހޭ މައުލޫމާތު ހާމަކޮށްފައިނުވި ނަމަވެސް ދެވަނަ ސީޒަންގައި އިތުރު މަރުގެ ތަހުގީގެއް ހިންގާނެ ކަމަށާއި ކުރިއަށްވުރެ ޝައުގުވެރި ހާދިސާތައް ހިމެނޭނެ ކަމަށް ނެޓްފްލިކްސްއިން ވަނީ ބުނެފައެވެ.
ޓެލެވިޒަން ސީރީޒް "ޖެސީ ޖޭސީ ކޮއި ނެހީ"އިން ބޮޑު މަޝްހޫރު ކަމެއް ހޯދި ބަތަލާ މޯނާ އެންމެ ފަހުން ބެލުންތެރިންނަށް ފެނިފައިވަނީ މިދިޔަ ޖޫން މަހު ރިލީޒްކުރި ފިލްމު "މުންޖިޔާ"އިންނެވެ.
ފިލްމުތަކުގެ އިތުރުން މޯނާއަކީ ވަރަށް ގިނަ ވެބް ސީރީޒްތައް ކުޅެ، ބެލުންތެރިންގެ މަގުބޫލުކަން ހޯދާފައިވާ ފިލްމީ ތަރިއެކެވެ. މޯނާ އެންމެ ފަހުން ބެލުންތެރިންނަށް ފެނިފައިވަނީ ނެޓްފްލިކްސްގެ ވެބް ސީރީޒް "ކާލާ ޕާނީ"އިންނެވެ.