26 Aug 2024, 19:15
ސްވިޑަންއަށް އުފަން ކުރީގެ ތަޖުރިބާކާރު ކޯޗު ސްވެން ގޯރާން އެރިކްސަން މަރުވެއްޖެއެވެ.
އުމުރުން 76 އަހަރުގެ އެރިކްސަން މަރުވެފައިވަނީ ކެންސަރު ބަލީގައެވެ. އެރިކްސަންއަށް އެންމެ ބޮޑު މަގުބޫލްކަމެއް ލިބިފައިވަނީ 2001 ވަނަ އަހަރު އިންގްލަންޑްގެ ކޯޗަކަށް ވި ހިސާބުންނެވެ. އޭނާވީ އިންގްލަންޑްގެ ކޯޗުކަން ކުރި އިނގިރޭސިވިލާތަށް ނިސްބަތްނުވާ ފުރަތަމަ ކޯޗަށެވެ.
އެރިކްސަންގެ ދެ ކުދިން ކަމުގައިވާ ލީނާ އާއި ޔޯހާން ހާމަކުރިގޮތުގައި އެކުދިންގެ ބައްޕަވަނީ މިއަދު ހެނދުނު ބިޔޯކެފޯގައި ހުންނަ އޭނާގެ ގޭގައި މަރުވެފައެވެ. އެރިކްސަން ކެންސަރު ބައްޔާ ހަނގުރާމަ ކުރަމުންދާކަން އޭނާ މިއަހަރުގެ ކުރީކޮޅު ހާމަކުރުމާއެކު ފުޓްބޯޅައިގެ ދުނިޔެއިންވަނީ ހަމްދަރުދީ ފާޅުކޮށްފައެވެ. މިގޮތުން އިންގްލަންޑާއި އިޓަލީވިލާތް، ޕޯޗުގަލް އަދި ސްވިޑްންގެ ގިނަ ކްލަބްތަކުންވަނީ އޭނާއަށް ދައުވަތުދީގެން އެކްލަބްތަކަށް ގެންގޮސްފައެވެ.
އެރިކްސަން އުމުރުން 27 އަހަރުގައި ކުޅުން ހުއްޓާލުމަށްފަހު 1977 ވަނަ އަހަރުވަނީ ކޯޗިންގެ ތެރެއަށް ވަދެފައެވެ. މިގޮތުން އޭނާ އެންމެ ފުރަތަމަ ކޯޗު ކޮށްދީފައިވަނީ ޑެގަފޯސް ކިޔާ ޓީމެކެވެ. އެއަށްފަހު ސްވިޑްންގެ ގޮތެންބާގްއާ ހަވާލުވެ އެޓީމަށް ސްވިޑަން ލީގު ކާމިޔާބު ކޮށްދިނުމުގެ އިތުރުން ސްވިޑިޝް ކަޕް ދެ ފަހަރު އެކްލަބާއެކު ކާމިޔާބު ކުރިއެވެ. އަދި 1982 ވަނައަހަރު ޔުއޭފާ ކަޕްވެސް އެޓީމުން ވަނީ ކާމިޔާބު ކޮށްފައެވެ.
އެރިކްސަންވަނީ އޭނާގެ ކޯޗިން ކެރިއަރުގައި 12 ކްލަބަކަށް ކޯޗުކޮށްދީފައެވެ. އޭގެ ތެރޭގައި ބެންފީކާ، ރޯމާ، ފިއޮރެންޓީނާ، ސެމްޕްޑޯރިއާ، ލާޒިއޯ، މެންޗެސްޓާ ސިޓީ އަދި ލެސްޓާ ފަދަ ޓީމުތައް ހިމެނެއެވެ.
އިންގްލަންޑް ޓީމަށް އޭނާ ކޯޗު ކޮށްދިން ހަ އަހަރުގެ ތެރޭގައި އިންގަލަންޑްއަށް ހޯދުނު އެންމެ ރަނގަޅު ކާމިޔާބީއަކީ 2002 ވަނަ އަހަރުގެ ފީފާ ވާލްޑް ކަޕާއި 2004 ވަނަ އަހަރުގެ ޔޫރޯގެ ކުއާޓާ ފައިނަލަށް ދަތުރު ކުރުމެވެ. އެރިކްސަން މަރުވި ޚަބަރާއެކު ފުޓްބޯޅައިގެ ދުނިޔޭގެ ގިނަ ފަރާތްތަކަކުން އަންނަނީ އޭނާއަށް އިޙުތިރާމް އަދާކުރަމުންނެވެ.