26 Aug 2024, 15:15
ދުނިޔޭގެ އެންމެ މަޤުބޫލު މެސެޖިން ޕްލެޓްފޯމް ތަކުގެ ތެރެއިން އެއް ޕްލެޓްފޯމް ކަމުގައިވާ ޓެލެގްރާމްގެ ފަހަތުގައިވާ، ރޫސީ މިލިޔަނަރު ޕަވެލް ޑޫރޯވް އަކީ ކާކު ހެއްޔެވެ؟
"ރަޝިއަން މާކް ޒަކަބާގް" ގެ ލަޤަބުން މަޝްހޫރުވެފައިވާ މި ޒުވާން މިލިޔަނަރު ކުށްލިއަކަށް ދުނިޔޭގެ މީޑިއާގެ ފަލަ ސުރުޚީތަކަށް އެރީ އިއްޔެ އޭނާ ފްރާންސަށް ކުރި ދަތުރެއްގައި އެގައުމުގެ ފުލުހުން ހައްޔަރުކުރެވުމާ ގުޅިގެންނެވެ.
ޕަވެލް ޑޫރޯވްގެ ޕްރޮފައިލް:
ޕަވެލް ޑޫރޯވްއަކީ 39 އަހަރުގެ ޓެކްނޮލޮޖީ ވިޔަފާރިވެރިއެކެވެ. އޭނާ އުފަންވެފައިވަނީ ރަޝިޔާގައެވެ. ނަމަވެސް، މިހާރު އޭނާއަކީ ފްރާންސްގެ އިތުރުން ޔުނައިޓެޑް އެރަބް އެމިރޭޓްސް، އަދި ސެއިންޓް ކިޓްސް އެންޑް ނެވިސްގެ ރައްޔިތެކެވެ. ފޯބްސް މަޖައްލާގެ އަންދާޒާގައި، ޑޫރޯވްގެ މުއްސަނދިކަމުގައި ނުވަތަ އޭނާގެ މިލްކިއްޔާތުގައި 15.5 ބިލިއަން ޑޮލަރު އެބަހުއްޓެވެ. މިއީ އޭނާ ދުނިޔޭގެ އެންމެ މުއްސަނދި މީހުންގެ ލިސްޓުގައި 120 ވަނައަށް ގެންގޮސްދޭ އަދަދެކެވެ.
ޑޫރޯވްގެ ކާމިޔާބީގެ ވާހަކަ:
ޑޫރޯވްގެ ކާމިޔާބީގެ ވާހަކަ ފެށެނީ ވީކޮންޓަކްޓެ (VKontakte) ނަމަކަށް ކިޔާ ސޯޝަލް މީޑިއާ ޕްލެޓްފޯމެއް އުފެއްދުމުންނެވެ. ނަމަވެސް 2014 ގައި ރަޝިޔާގެ ސަރުކާރާ އޮތް ޚިޔާލު ތަފާތުވުމަކާ ގުޅިގެން އޭނާ އެ ޤައުމު ދޫކޮށް ފިލައިގެން ދިޔައެވެ. އޭގެ ފަހުން، 2017 ގައި އޭނާ ދުބާއީއަށް ބަދަލުވިއެވެ. އަދި 2021 ގައި ފްރާންސްގެ ރައްޔިތަކަށް ވެސް ވިއެވެ.
ޓެލެގްރާމް: ޑޫރޯވްގެ އެންމެ މަޝްހޫރު އުފެއްދުން:
ދެހާސްތޭރަ ގައި ޑޫރޯވް ފެށި ޓެލެގްރާމް އެޕަކީ މިހާރު ދުނިޔޭގެ އެންމެ މަޤުބޫލު މެސެޖިންގ އެޕްތަކުގެ ތެރެއިން އެއް އެޕްލިކޭޝަނެވެ. މިދިޔަ އަހަރު ޓެލެގްރާމް ވަނީ މަހަކު 700 މިލިއަން އެކްޓިވް ޔޫޒަރުންގެ ހާއްސަ ލަނޑުދަނޑި ހާސިލުކޮށްފައެވެ. އަދި ކުރިއަށް އޮތް އަހަރުގެ ތެރޭގައި އެއް ބިލިއަން ޔޫޒަރުންގެ އަދަދު ހާސިލުކުރުމަކީ ޓެލެގްރާމްގެ އަމާޒެކެވެ.
ޓެލެގްރާމްގެ މަޤުބޫލުކަމާއި ގޮންޖެހުންތައް:
ޓެލެގްރާމް އެޕް ވަކިން ޚާއްސަކޮށް މަޤުބޫލުވެފައިވަނީ ރަޝިޔާ، ޔުކްރެއިން އަދި ކުރީގެ ސޯވިއެޓް ޔޫނިއަންގެ ޤައުމުތަކުގައެވެ. ޓެލެގްރާމުން ބުނާގޮތުގައި އެ އެޕަކީ ޔޫޒަރުންގެ ޕްރައިވަސީއާއި އިންސާނީ ޙައްޤުތައް ހިމާޔަތްކުރުމަށް މަސައްކަތްކުރާ އެޕެކެވެ.
އަދި ދުނިޔޭގެ އެކި ކަންކޮޅުތަކުގައި ޑިމޮކްރަސީއަށް ތާއީދުކުރާ ހަރަކާތްތަކުގައި މުހިންމު ދައުރެއް އެ އެޕް އަދާކޮށްފައިވާކަމަށް ވެސް ބުނެއެވެ.
ނަމަވެސް، މި މަޤުބޫލުކަމާއެކު އެޕަށް ދިމާވެފައިވަނީ އާ ގޮންޖެހުންތަކެކެވެ. ޚާއްސަކޮށް ޔޫރަޕްގެ ޤައުމުތަކުން މި އެޕާމެދު ކަންބޮޑުވުން ފާޅުކުރަމުންދެއެވެ.
ފްރާންސުން ޑޫރޯވް ހައްޔަރުކުރެވުނު ސަބަބު:
ފްރާންސްގެ ފުލުހުން ބުނާގޮތުގައި ޑޫރޯވް ހައްޔަރުކުރެވުނީ ޓެލެގްރާމްގައި އެކަށީގެންވާ މޮޑެރޭޓަރުން ނެތުމާއި، ޔޫޒަރުންގެ ކުށްވެރި ޙަރަކާތްތަކާ ގުޅޭގޮތުން ކުރިއަށްދާ ތަޙުޤީޤަކާ ގުޅިގެންނެވެ. މި ހާދިސާއިން ދައްކުވައިދެނީ ޓެލެގްރާމްގެ ސަލާމަތާއި ރައްކާތެރިކަމާމެދު އުފެދިފައިވާ ސުވާލުތަކެވެ.
ޑޫރޯވްގެ ޚާއްސަ ސިފަތައް:
ޑޫރޯވްއަކީ އޭނާގެ އަމިއްލަ ޚާއްޞަ ސްޓައިލެއް ގެންގުޅޭ މީހެކެވެ. އޭނާ ގިނަފަހަރަށް ފެންނަނީ ގަދަ ކަޅުކުލައިގެ ހެދުން ލައިގެންނެވެ. އޭނާއަކީ ގަދަ އަނދިރި ކުލަތަކަށް ތާއީދުކޮށް ލޯބިކުރާ މީހެކެވެ.
ޕަވެލް ޑޫރޯވްއަކީ ޓެކްނޮލޮޖީގެ ދުނިޔޭގައި އެންމެ ނުފޫޒުގަދަ އަދި ކާމިޔާބު ޝަޚްސިއްޔަތުތަކުގެ ތެރެއިން އެކެކެވެ.
އޭނާގެ އުފެއްދުންތެރިކަމާއި އާ ޚިޔާލުތަކުން ވަނީ މުވާސަލާތީ ދުނިޔެ ބަދަލުކޮށްލާފައެވެ. ނަމަވެސް، މިފަދަ ބޮޑު ކާމިޔާބީއަކާއެކު އަންނަނީ ބޮޑެތި ޒިންމާތަކާއި ގޮންޖެހުންތަކެވެ. އޭނާގެ ވިސްނުމާއި އެއްގޮތަށް ޓެލެގްރާމް އެޕްލިކޭޝަން ދުވަހެއްދުވަހަކަށް ދުނިޔޭގައި ދަނީ ކުރިއަރަމުންނެވެ.