24 Aug 2024, 08:53
ކޮންމެ އަހަރަކު އިންޑިއާގައި ބާއްވާ މަހަރަޝްތްރާ ސްޓޭޓް ފިލްމު އެވޯޑުގެ އެންމެ ޝަރަފުވެރި އެވޯޑު 'ލައިފްޓައިމް އެޗީވްމަންޓް އެވޯޑު" ކުރީގެ މަޝްހޫރު ބަތަލާ އާޝާ ޕަރޭކް އަދި ސޮނީގެ "ސީއައިޑީ" ސީރީސްގެ އެކްޓަރު ޝިވާޖީ ސަތަމްއާ ހަވާލުކޮށްފިއެވެ.
މިދިޔަ ބުދަ ދުވަހު މުމްބާއީގެ ޑޯމް އެސްވީޕީ ސްޓޭޑިއަމްގައި ބޭއްވި ހާއްސަ ރަސްމިއްޔާތުގައި ދެ ތަރިންނާ އެވޯޑު ހަވާލުކޮށްދީފައި ވަނީ ޗީފް މިނިސްޓަރު އެކްނާތު ޝިންޑޭއެވެ.
ސިޔާސީ ދާއިރާގެ އިތުރުން މަރާޓީ ފިލްމު އިންޑަސްޓްރީގެ ގިނަ ތަރިންތަކެއް ބައިވެރިވި މި ރަސްމިއްޔާތަކީ މަރާޓީ އިންޑަސްޓްރީގައި މަސައްކަތްކުރާ ވަރަށް ގިނަ ބައެއްގެ އަގުވަޒަންކޮށް އެފަދަ ފަންނާނުންނަށް ހާއްސަކޮށް ބޭއްވުނު ރަސްމިއްޔާތެކެވެ.
އާޝާ ޕަރޭކް ކުރީގެ އެކްޓަރު ޝައްމީ ކަޕޫރާ އެކު--ފޮޓޯ/ފިލްމުފެއަ
މި ރަސްމިއްޔާތުގައި ކުރީގެ ބަތަލާ އާޝާ ޕަރޭކަށް ދެވުނު އެވޯޑަކީ ހިންދީ ސިނަމާއަށް ގިނަ މަސައްކަތްތަކެއް ކޮށްދީފައިވާ ކުރީގެ އެކްޓަރު ރާޖް ކަޕޫރުގެ ހަނދާނުގައި ދެވުނު އެވޯޑެކެވެ.
އެކްޓަރު ޝިވަޖީ ސަތަމްއަށް ދެވުނު އެވޯޑަކީ މަރާޓީ ފިލްމުތަކުގެ އިތުރުން ވަރަށް ގިނަ ހިންދީ ފިލްމުތައް ވެސް ޑައިރެކްޓްކޮށް ޕްރޮޑިއުސް ކޮށްފައިވާ ވީ.ޝަންތަރަމްގެ ހަނދާނުގައި ދެވުނު އެވޯޑެކެވެ.
މި ޝަރަފުވެރި އެވޯޑުތަކާ އެކު ދެ ތަރިންނަށް ފައިސާގެ އިނާމު ވެސް ވަނީ ލިބިފައެވެ. މި ދެތަރިންގެ އިތުރުން އިންޑިއާގެ މަޝްހޫރު ލަވަ ކިޔުންތެރިޔާ އަނޫރާދާ ޕައުދްވާލްއަށް ވަނީ ކުރީގެ ލަވަކިޔުންތެރިޔާ ލަތާ މަންގޭޝްކަރުގެ ހަނދާނުގައި ދެވޭ އެވޯޑުވެސް ހަވާލުކޮށްފައެވެ.
ކުރީގެ ފިލްމީ ތަރި އާޝާ ޕަރޭކް އަކީ 1960ގެ އަހަރުތަކުން ފެށިގެން ހިންދީ ސިނަމާގެ މަޝްހޫރު ވަރަށް ގިނަ ފިލްމުތަކުގައި މަސައްކަތްކޮށްފައިވާ ފިލްމީ ތަރިއެކެވެ.