13 Aug 2024, 08:41
ހިތްގައިމު މިއުޒިކާއި ލަވަތަކުން ގިނަ ބައެއްގެ މަގުބޫލުކަން ހޯދާފައިވާ ލަވަކިޔުންތެރިޔާ އަދުނާނު ސާމީ ނުވަ އަހަރު ފަހުން ބޮލީވުޑްގެ ފިލްމަކަށް ލަވަ ތައްޔާރުކޮށްދޭން ނިންމައިފިއެވެ.
ފިލްމު "ބަޖްރަންގީ ބައިޖާން"އަށް ތައްޔާރުކޮށްދިން މިއުޒިކާ އެކު ގިނަ ބައެއްގެ މަގުބޫލުކަން ހޯދި ލަވަކިޔުންތެރިޔާ މިއުޒިކް ތައްޔާރުކޮށްދޭން ނިންމާފައިވާ ފިލްމަކީ މިއުޒިކަލް ހޮރޯ ފިލްމު "ކަސޫރު"އަށެވެ.
ޑައިރެކްޓަރު މުދައްސަރު އަޒީޒުގެ ސްކްރީންޕްލޭއަކަށް އުފައްދާ މި ފިލްމަށް މިއުޒިކް ތައްޔާރު ކުރުމުގައި އަދުނާނު ސާމީއާއެކު މަސައްކަތް ކުރާނެ އަނެއް ލަވަކިޔުންތެރިޔަކީ ޕާޔަލް ދޭވްއެވެ. އަދުނާނު މި ފިލްމަށް ޚާއްސަކޮށް ތައްޔާރުކުރާ މިއުޒިކް ޓްރެކްއިން ފެންނާނީ އެކްޓަރު އާފްތާބު ޝިވްދަސާނީ އާއި އުރުވަޝީ ރައުތޭލާ ކަމަށް ފިލްމީ ޚަބަރުތައް ބުނެއެވެ.
އަދުނާނު ސާމީ ބޮލީވުޑްގެ އެކްޓަރު ސަލްމާން ޚާންއާ އެކު--ފޮޓޯ/ބޮލީވުޑްހަންގާމާ
މި ފިލްމުގެ ލޯބީގެ ލަވައެއް ތައްޔާރުކޮށްދިނުމުގެ މަސައްކަތާ އަދުނާނު ސާމީ ހަވާލުވުމަކީ ފިލްމަށް ލިބުނު އިތުރު ފުރިހަމަ ކަމެއް ކަމަށް ޕްރޮޑިއުސަރު އާސިފް ޝޭހް ވަނީ ބުނެފައެވެ.
އަދުނާނު ސާމީގެ މިއުޒިކަކީ ބެލުންތެރިންނަށް އަބަދުވެސް ވަރަށް ކަމުދާ މިއުޒިކަކަށް ވުމާއެކު މިފަހަރު ތައްޔާރުކުރާ ޓްރެކްއަކީ ވެސް ބެލުންތެރިންނަށް ކަމުދާނެ ޓްރެކްއަކަށް ވާނެ ކަމަށް ގަބޫލުކުރާ ކަމުގައި އާސިފް ވަނީ ބުނެފައެވެ.
ކަބީރު ޚާން ޑައިރެކްޓްކުރި ފިލްމު "ބަޖްރަންގީ ބައިޖާން"އަށް އަދުނާނު ސާމީ ތައްޔާރުކޮށްދިން ޓައިޓްލް ޓްރެކްއަކީ ވަރަށް ބޮޑު މަޝްހޫރުކަމެއް ލިބުނު ލަވައެކެވެ. ފިލްމުތަކަށް އުފައްދާ މިއުޒިކްގެ އިތުރުން ވެސް އަދުނާނު ސާމީ ތައްޔާރުކުރާ މިއުޒިކް ވީޑިއޯތަކަކީ ވެސް އާއްމުންގެ މެދުގައި ވަރަށް މަގުބޫލު ވީޑިއޯ ލަވަތަކެކެވެ.