06 Aug 2024, 23:55
ގޫގުލް އިން ސާޗް ކުރުމުގައި ގާނޫނާ ހިލާފު މޮނޮޕޮލީއެއް އެބައޮތްކަމަށް އެމެރިކާގެ ފަނޑިޔާރަކު ހުކުމް ކޮށްފިއެވެ.
އެމެރިކާގެ ފަނޑިޔާރަކު އިއްވި ހުކުމުގައި، ގޫގުލްގެ ސާރޗް އިންޖީނުގެ ވިޔަފާރީގައި ގާނޫނާ ޚިލާފު މޮނޮޕޮލީއެއް އުފައްދާފައިވާކަމަށް ކަނޑައަޅައިފައިވާއިރު، މި ހުކުމާ ގުޅިގެން، ގޫގުލްގެ މައި ކުންފުނި ކަމުގައިވާ އަލްފަބެޓްގެ ހިއްސާގެ އަގު 4.5 އިންސައްތަ ދަށަށް ގޮސްފައިވާ ކަމަށް ވެއެވެ.
މި ހުކުމަކީ، އެމެރިކާގެ ބޮޑެތި ޓެކްނޮލޮޖީ ކުންފުނިތަކާ ދެކޮޅަށް ހިންގަމުންދާ އެންޓި-ޓްރަސްޓް މައްސަލަތަކުގެ ތެރެއިން ފުރަތަމަ ފަހަރަށް އިއްވުނު މުހިންމު ހުކުމެކެވެ. މި މައްސަލަ އަސްލު ހުށަހެޅީ 2020 ވަނަ އަހަރު ޓްރަމްޕް ސަރުކާރުންނެވެ.
ފަނޑިޔާރުގެ ހުކުމުގައި ފާހަގަކޮށްފައިވާ ގޮތުގައި، 2021 ވަނަ އަހަރު ގޫގުލްއިން 26.3 ބިލިއަން ޑޮލަރު ޚަރަދުކޮށްފައިވަނީ އެކި ވަސީލަތްތަކާއި ބްރައުޒަރުތަކުގައި އެ ކުންފުނީގެ ސާރޗް އިންޖީނު ޑިފޯލްޓް ގޮތުގައި ބޭނުންކުރެވޭނެކަން ކަށަވަރުކުރުމަށެވެ.
އެގޮތުން މިހާރު އޮންލައިން ސާރޗް މާކެޓްގެ 90 އިންސައްތަ އަދި ސްމާޓްފޯނުތަކުގެ 95 އިންސައްތަ ގޫގުލްގެ ބާރުގެ ދަށުގައިވާކަން އެ ހުކުމުގައި ފާހަގަކޮށްފައިވެއެވެ.
މި ހުކުމާ ގުޅިގެން އެމެރިކާގެ އެޓަރނީ ޖެނެރަލް އަދި ވައިޓް ހައުސްއިން ވަނީ މިއީ "ތާރީޚީ ކާމިޔާބީއެއް" އަދި އެމެރިކާގެ ރައްޔިތުންނަށް ލިބުނު "ނަސްރެއް" ކަމުގައި ބުނެފައެވެ. ނަމަވެސް ގޫގުލްއިން ވަނީ މި ނިންމުމާ ދެކޮޅަށް އިސްތިއުނާފު ކުރާނެކަމަށް ބުނެފައެވެ.
މި ހުކުމާ ގުޅިގެން ދެވަނަ ޝަރީޢަތެއް ބޭއްވުމަށް މަގުފަހިވެފައިވާއިރު، އޭގައި އަލްފަބެޓް ކުންފުނި ބައިބައިކުރުން ފަދަ ފިޔަވަޅުތައް އެޅުމަށް ނިންމުމުގެ ފުރުސަތު އެބައޮތެވެ. އިސްތިއުނާފުގެ މަރުހަލާތައް ހިމެނޭ ގޮތުން މުޅި މައްސަލައިގެ ޤާނޫނީ މަރުހަލާތައް 2026 ވަނަ އަހަރާ ހަމައަށް ދިގުދެމިގެންދާނެކަމަށް ދިރާސާކުރާ ފަރާތްތަކުން ބުނެއެވެ.
މި މައްސަލައިގެ އިތުރުން، މެޓާ، އެމެޒޯން އަދި އެޕަލް ފަދަ އެހެން ބޮޑެތި ޓެކްނޮލޮޖީ ކުންފުނިތަކުގެ މައްޗަށް ވެސް އެންޓި-ޓްރަސްޓް މައްސަލަތައް ހުށަހެޅިފައިވެއެވެ.
މި މައްސަލައިގެ ނިންމުމަކީ އެމެރިކާގެ އޮންލައިން ސާރޗް މާކެޓަށް އަދި ޓެކްނޮލޮޖީ ދާއިރާއަށް ބޮޑު ބަދަލުތަކެއް ގެނެސްދޭނެ ކަމެއް ކަމަށް ބެލެވެއެވެ. އަދި މުސްތަޤުބަލުގައި އެހެން ބޮޑެތި ޓެކްނޮލޮޖީ ކުންފުނިތަކުގެ މައްޗަށް ހުށަހެޅިފައިވާ މައްސަލަތަކަށް ވެސް މީގެ އަސަރުކުރާނެ ކަމަށް ލަފާކުރެވެއެވެ.