31 Jul 2024, 08:49
ގިނަ ބައެއްގެ މެދުގައި މަގުބޫލުކަން ހޯދާފައިވާ ބޮލީވުޑް ބަތަލާ ޖެކްލީން ފެނާންޑެޒް އާއި ކުރީގެ ބައެއް ފިލްމުތަކުން ފެނިފައިވާ އެކްޓަރު ނީލް ނިތިން މުކޭޝް ވެބް ސީރީސްއަކަށް ތައްޔާރުވަމުން އަންނަކަން އިއުލާނުކޮށްފިއެވެ.
ދެ ތަރިންގެ ވެސް ކެރިއަރުގެ ފުރަތަމަ އޯޓީޓީ ވެބް ސީރީސް އަކީ، އަބިޝެކް ޝަރުމާ ޑައިރެކްޓްކޮށް, ޕްރޮޑިއުސަރު އަދިތުޔަ ބަޓް ލިޔެ ތައްޔާރުކޮށްފައިވާ ސީރީސްއެކެވެ.
"ގޯޓްސް"ގެ ނަމުގައި އުފައްދާ މި ސީރީސްގެ މަސައްކަތް ނިންމާލުމަށްފަހު އެކަން ފާހަގަކުރުމަށް ބޭއްވި ހަފްލާގެ ފޮޓޯއެއް ސޯޝަލް މީޑިއާގައި އަންނަނީ ދައުރުވަމުންނެވެ.
އެކްޓަރު ނީލް ނިތިން ހިއްސާކުރި މި ފޮޓޯއާ އެކު ބުނެފައި ވަނީ ޕްރޮޑިއުސަރު އަދިތިޔަ ބަޓްއާ އެކު ކުރެވުނު މަސައްކަތާ މެދު ވަރަށް ބޮޑަށް ހިތްހަމަޖެހޭ ކަމުގައެވެ.
ޖެލްލީން އާއި ނީލްގެ އިތުރުން "ގޯޓްސް" ވެބް ސީރީސްއިން ފެންނާނެ މުހިއްމު ތަރިންގެތެރޭ ޓެލެވިޒަން ސީރީސްތަކުން ފެންނަ ބައެއް ތަރިން ހިމެނެއެވެ. އޭގެތެރޭގައި، ސްޓާ ޕްލަސްގެ މަގުބޫލު ސީރީސް "އަނޫޕަމާ"ގެ ތަރި ކުންވަރު އަމަރު ހިމެނެއެވެ.
ބަތަލާ ޖެކްލީން ތުރުކީގެ ފިލްމީ ތަރި ބުރާކް ޑެނިޒްއާ އެކު--ފޮޓޯ/ބޮލީވުޑްހަންގާމާ
ގިނަ ޒުވާނުންތަކެއް ވެބް ސީރީސްގެ މުހިއްމު ރޯލްތަކުން ފެންނައިރު އެ ތަރިން ކުޅޭ ރޯލާ ބެހޭ މައުލޫމާތު ވަނީ ސިއްރުކުރެވިފައެވެ. މި ވެބް ސީރީސް ބެލުންތެރިންނާ ހަމައަށް ގެނެސްދޭނެ ތާރީޚެއް އަދި އިއުލާނު ނުކުރެއެވެ.
ފިލްމު "މާޑަ2"، "ރޭސް2"، "ކިކް" އަދި "ހައުސްފުލް"ފަދަ ފިލްމުތަކުގައި މުހިއްމު ރޯލް ކުޅެފައިވާ ޖެކްލީން އެންމެ ފަހުން ފެނިފައި ވަނީ، 2022ވަނަ އަހަރު ރިލީޒްކުރި ފިލްމު "ސާކަސް"އިންނެވެ. ބަތަލާ ދެ ފިލްމެއްގައި މަސައްކަތް ކުރަމުން އަންނައިރު އޭގެތެރެއިން އެންމެ އަވަހަށް ރިލީޒްކުރަން ތައްޔާރުވަމުން އަންނަ ފިލްމަކީ އެކްޓަރު ސޯނޫ ސޫދު ޕްރޮޑިއުސްކުރާ ފިލްމު "ފަތޭހް"އެވެ.