05 Jul 2024, 16:04
ފަސިންޖަރަކު އަމިއްލައަށް ބަރަހަނާވެ، ބޯޓަށް ކުޑަކަމުދިއުމުގެ ސަބަބުން ނިއު ހެމްޝަޔާގެ މެންޗިސްޓާއަށް ދިޔަ ފްލައިޓެއް އަނބުރާ ޖައްސައިފިއެވެ.
ފުރިއިރު އެ މީހާ ގިނަ އަދަދެއްގެ ބަނގުރަލާއި ކޯލާ ބުއި ކަމަށް މީޑިއާތަކުން ވަނީ ރިޕޯޓުކޮށްފައެވެ.
އެމެރިކާގެ ސްޓޭޓެއް ކަމަށްވާ އޮރެގަންއަށް ނިސްބަތްވާ އުމުރުން 25 އަހަރުގެ އެ މީހާ ހައްޔަރުކޮށް ދައުވާ އުފުލާފައިވަނީ ބަފަލޯ ނިޔާގަރާ އިންޓަނޭޝަނަލް އެއާޕޯޓުގައި ފްލައިޓް ޖެއްސުމަށް ފަހުއެވެ.
އޭނާ ދޫކޮށްލީ ބަފަލޯގެ ފެޑެރަލް ކޯޓަށް ހާޒިރުވުމުން ކަމަށް އެމެރިކާގެ އެޓާނީ އޮފީހުގެ ނިއުޔޯކުގެ ހުޅަނގު ޑިސްޓްރިކްޓުން ނެރުނު ބަޔާނެއްގައިވެއެވެ.
އެމެރިކަން އީގަލްގެ އެ ބޯޓު އޭގެ ފަހުން ބަފަލޯ އެއާޕޯޓުން ވަނީ ފުރައިފައެވެ. އެ ހާދިސާއާ ގުޅިގެން އެމެރިކަން އެއާލައިނުން ނެރުނު ބަޔާނެއްގައި ބުނީ، އެއާލައިންގެ މުވައްޒަފުން ކުރެއްވި މަސައްކަތަށާއި ކަސްޓަމަރުން ދެއްވި އެއްބާރުލުމަށް ޝުކުރު އަދާކުރާ ކަމަށެވެ.
އެ މީހާއަކީ ކުޑަކަމުދާ ނިޒާމުގައި މައްސަލަތަކެއް އުޅޭ މީހެއް ކަމަށް ވެސް އޮފިޝަލުންނާ ހަވާލާދީ މީޑިއާތަކުން ރިޕޯޓުކޮށްފައިވެއެވެ.