08 Jun 2024, 21:51
ފޮރިން ޓްރާންސެކްޝަންގެ ގޮތުގައި ރާއްޖޭން އެހެން ގައުމުތަކަށް ފޮނުވޭ ފައިސާގެ އަަދަދު އިތުރުކޮށްދިނުމަށް ސްރީލަންކާއިން އެދިއްޖެއެވެ.
ލަންކާގެ ފޮރިން މިނިސްޓަރު އަލީ ސަބްރީގެ ދައުވަތަކަށް، ރަސްމީ ދަތުރުފުޅެއްގައި ރާއްޖޭގެ ފޮރިން މިނިސްޓަރު މޫސާ ޒަމީރު ލަންކާއަށް ވަޑައިގަތީ މިދިޔަ ހޯމަ ދުވަހުގައެވެ. އަދި ދަތުރުފުޅަށް ފަހު މިނިސްޓަރު ރާއްޖެ ވަޑައިގަތީ މިދިޔަ ބުރާސްފަތި ދުވަހުގައެވެ.
އެ ދަތުރުފުޅުގެ ތެރެއިން އެ ދެ މިނިސްޓަރުން ބޭއްވި މަޝްވަރާތަކަކަށް ފަހު، މީޑިއާއާ ވާހަކަދައްކަވަމުން ލަންކާގެ ފޮރިން މިނިސްޓަރު ވިދާޅުވެފައިވަނީ ރާއްޖޭގައި ތިބި ލަންކާގެ މަސައްކަތެރިންނަށް ފަސޭހަވާނެހެން، ރާއްޖޭން ކުރެވޭ ފޮރިން ޓްރާންސެކްޝަންގެ ފައިސާގެ އަދަދު މުރާޖާކުރުމަށް ދިވެހި ސަރުކާރުގައި އެދިފައިވާނެ ކަމަށެވެ.
ސްރީލަންކާގެ ފޮރިން މިނިސްޓްރީން މީގެ ކުރިން ހާމަކޮށްފައިވާ ގޮތުގައި 15،000 - 20،000 އާއި ދޭތެރޭގެ އަދަދަކަށް އެ ގައުމުގެ މީހުން ރާއްޖޭގައި ދަނީ ވަޒީފާ އަދާކުރަމުންނެވެ.
ފަތުރުވެރިކަމުގެ ދާއިރާއިން ފެށިގެން ސިއްހީ ދާއިރާއާއި ތައުލީ ދާއިރާގެ އިތުރުން ލޭބަރުންނާއި ހައުސްމެއިޑުންގެ ގޮތުގައި ވެސް ލަންކާ މީހުން ރާއްޖޭގައި މަސައްކަތް ކުރެއެވެ. އޭގެ ތެރޭގައި ބޮޑެތި މުސާރަތައް ލިބޭ ވަޒީފާތައް ވެސް ހިމެނެއެވެ.
ބޭންކް އޮފް މޯލްޑިވްސް (ބީއެމްއެލް)އިން ކަނޑައަޅާފައިވަނީ ފޮރިން ޓްރާންސެކްޝަންގެ ގޮތުގައި ރާއްޖޭން ބޭރަށް މަހަކު ފޮނުވޭނީ 250-300 ޑޮލަރު ކަމަށެވެ. އެއީ ރާއްޖޭގެ އިގްތިސާދަށް ވަންނަ ޑޮލަރު ބޮޑެތި އަދަދުތަކުން ބޭރުވިޔަ ނުދިނުމަށެވެ.
މިނިސްޓަރު ޒަމީރު ލަންކާއަށް ކުރެއްވި ރަސްމީ ދަތުރުފުޅުގެ ތެރެއިން ގިނަ މަޝްވަރާތަކެއްވަނީ ކުރައްވާފައެވެ. އެ ގޮތުން ރާއްޖެއާއި ސްރީލަންކާ، މި ދެ ގައުމަކީ މަސްވެރިކަމަށް ވަރަށް ބޮޑަށް ބަރޯސާވެފައިވާ ދެ ގައުމަށް ވާތީ، ޤަވައިދާ ޚިލާފަށް ކުރާ މަސްވެރިކަން ހުއްޓުވުމަށް ދެ ގައުމުގެ ފޮރިން މިނިސްޓަރުން މަޝްވަރާ ކުރެއްވިއެވެ.
އެ ގޮތުން ދިވެހި އިސްރަށްވެހީންނަށް ލަންކާގައި ވަޒަންވެރިވެވޭނެ މަގުފަހިކޮށްދިނުމަށާއި، ވިސާ ހަމަޖެއްސުމާއި ގުޅޭ ގޮތުން މަޝްވަރާ ކުރެއްވި ކަމަށް ލަންކާގެ ނޫސްތަކުން ރިޕޯޓުކޮށްފައިވެއެވެ.