07 Jun 2024, 18:54
ފުލުހުންގެ ތަރުޖަމާނުގެ މަގާމުގައި ހުންނެވި ޗީފް ސުޕްރިޓެންޑެންޓް އޮފް ޕޮލިސް އަޙްމަދު ޝިފާނާއި ސެންޓްރަލް ޕޮލިސިން ކޮމާންޑުގެ ހެޑް ޗީފް ސުޕްރިޓެންޑެންޓް އޮފް ޕޮލިސް އަބްދުﷲ ޝަރީފް، އެސިސްޓެންޓް ކޮމިޝަނަރުގެ މަގާމަށް ޕްރޮމޯޓްކޮށްފިއެވެ.
ފުލުހުންގެ މިޑިއާއިން "ސަން"އަށް މައުލޫމާތު ދެއްވި ގޮތުގައި އެ ދެ ބޭފުޅުންނަށް މަގާމު މިހާރުވަނީ ހަވާލުކޮށްފައެވެ.
އޭސީީގެ މަގާމަށް ޕްރޮމޯޓްވި ޝިފާންވަނީ ނޭޝަނަލް ކޮލެޖް އޮފް ޕޮލިސިން އެންޑް ލޯ އެންފޯސްމަންޓްގެ ވެރިޔާގެ މަގާމާއި މާލެ ސިޓީ ޕޮލިސްގެ ވެރިޔާކަން ވެސް ކުރައްވައިފައެވެ.
ކުރީގެ ރައީސް އަބްދުﷲ ޔާމީންގެ ވެރިކަމުގައި ޝިފާން ފުލުހުންގެ ތަރުޖަމާނުކަން ވެސް ކުރެއްވިއެވެ. އެއާއެކު އަލުން އެ މަގާމަަށް އައްޔަންކުރައްވައި، މިހާރު ޝިފާން ހުންނެވީ ފުލުހުންގެ ތަރުޖަމާނުގެ މަގާމުގައެވެ.
ޝަރީފަކީ ސެންޓްރަލް ޕޮލިސިންއާއި މާލެ ސަރަހައްދުގެ ފްރޮންޓްލައިން ޕޮލިސިންގެ ވެރިޔާއެވެ. ހަމައެއާއެކު މީގެ ކުރިން އެކި ޑިޕާޓްމަންޓުތަކުގައި އިސްކޮށް މަސައްކަތްކުރައްވައިފައިވެއެވެ.