27 May 2024, 23:59
އިސްރާއީލުން ފަލަސްތީނުގެ ޣައްޒާގައި އޮންނަ ރަފަހަށް ދޭ ހަމަލާތައް ރާއްޖެއިން ކުށްވެރިކޮށް، އައިސީޖޭގެ އަމުރަށް ތަބާވުމަށް އިސްރާއީލަށް ގޮވާލައިފިއެވެ.
ފޮރިން މިނިސްޓްރީން މިއަދު ނެރުނު ބަޔާނެއްގައި ވަނި، އިސްރާއީލުން ޣައްޒާއަށް ދެމުންދާ ހަމަލާތައް ރާއްޖެއިން ކުށްވެރިކުރާ ކަމަށެވެ. އެގޮތުން ގެދޮރު ގެއްލިފައިވާ ފަލަސްތީނުގެ އެތައް ސަތޭކަ ރައްޔިތުން ރަފަހްގައި ދިރިއުޅެމުންދިޔަ ޓެންޓްތަކަށް އިސްރާއީލުން މިފަހުން ދިން ހަމަލާތައް ވެސް ހަރުކަށި އިބާރާތުން ކުށްވެރިކުރާ ކަމަށް އެ ބަޔާނުގައިވެއެވެ.
އެ ބަޔާނުގައި ވަނީ އެފަދަ ހަމަލާތައް ދިނުމާއި ގަތުލްއާންމު ހިންގުމަކީ ބައިނަލްއަގުވާމީ ގާނޫނާ ޚިލާފުވާ ކަމެއް ކަމަށާއި ރަފަހަށް ހަމަލާ ދިނުން ހުއްޓާލަން އަންގައި އައިސީޖޭއިން މިދިޔަ ހުކުރު ދުވަހު ނެރުނު އަމުރަށް އަމަލުކުރަން ރާއްޖެއިން އިސްރާއީލަށް ގޮވާލާ ކަމަށެވެ.
މީގެ އިތުރުން، ޣައްޒާގައި ގަތުލްއާންމެއް ހިންގުން ހުއްޓުވުމަށް އިސްރާއީލަށް ކުރެވެން އޮތް ހުރިހާ ކަމެއް ކުރުމަށް އަންގައި މީގެ ކުރިން އައިސީޖޭއިން ނެރުނު އަމުރަށް އަމަލުކުރުމަށް ވެސް ރާއްޖެއިން ގޮވާލިއެވެ.
ފޮރިން މިނިސްޓްރީން ބުނީ ދިވެހި ސަރުކާރާއި ރައްޔިތުން ފަލަސްތީނުގެ ރައްޔިތުންނާއެކު ސާބިތުވެ ތިބޭނެ ކަމަށާއި ފަލަސްތީނުގެ މުސްތަގިއްލު ދައުލަތެއް އުފެއްދުމަށް ތާއިދުކުރުމުގައި ދެމިއޮންނާނެ ކަމަށެވެ.
ރަފަހްއާއި މިސްރާ ދެމެދު އޮންނަ ބޯޑަރު ސަރަހައްދު ބަންދުކޮށް، އިސްރާއީލުން އަންނަނީ މިމަހުގެ ހަޔަކުން ފެށިގެން ރަފަހްއަށް ވަރުގަދަ ހަމަލާތައް ދެމުންނެވެ. އެ ހަމަލާ ފެށުމުގެ ކުރިން، ޣައްޒާގެ އެކި ސަރަހައްދުތަކަށް ނިސްބަތްވާ ގާތްގަނޑަކަށް 1.4 މިލިއަން ރެފިއުޖީން ރަފަހްގައި ތިބި ކަމަށް ރިޕޯޓުތައް ބުނެއެވެ.
އެ ހަމަލާތައް ހުއްޓާލަން ބައިނަލްއަގުވާމީ މުޖުތަމައުން ގޮވާލަމުންދާއިރު އިސްރާއީލުން ވަނީ އެކަމަށް ދެކޮޅު ހަދައިފައެވެ. އެގޮތުން އައިސީޖޭއިން ބުނެފައިވާ ގޮތަށް އިސްރާއިލުން ގަތުލްއާންމެއް ނުހިންގާ ކަމަށާއި އެހެންކަމުން އަމުރަށް ތަބާވާން ނުޖެހޭ ކަމަށް އިސްރާއީލުން ބުނެފައިވެއެވެ.
މިދިޔަ އަހަރުގެ އޮކްޓޯބަރު މަހުގެ ހަތް ވަނަ ދުވަހުން ފެށިގެން އިސްރާއީލުން ޣައްޒާއަށް ދެމުންދާ ހަމަލާތަކުގައި މިހާތަނަށް 36,050 މީހުން ޝަހީދުކޮށްފައިވާއިރު އޭގެ ތެރޭގައި 15,000އަށް ވުރެ ގިނަ ކުޑަކުދިން ހިމެނެއެވެ.