25 May 2024, 16:32
ކ. ފުނަދޫ އާއި ވެލާނާ އިންޓަނޭޝަނަލް އެއާޕޯޓު އޮންނަ ހުޅުލެއައި މާލެ މޮނޯރެއިލްއިން ގުޅާލުމަށް ދުބާއީގެ އިންޓަނޭޝަނަލް ފްރީޒޯން އޮތޯރިޓީ (އިފްޒާ)އާ ހަވާލުކޮށްފިއެވެ.
ނިމިދިޔަ ހަމަސްދުވަހު އިކޮނޮމިކް މިނިސްޓްރީން ކޮށްފައިވާ މަސައްކަތްތަކުގެ މައުލޫމާތު ދިނުމަށް މިއަދު ބޭއްވި ނޫސްވެރިންގެ ބައްދަލުވުމުގައި މިނިސްޓަރު މުޙައްމަދު ސައީދު ވިދާޅުވީ ފުނަދޫ އާއި މާލެ އާއި ހުޅުލޭ ގުޅާލަނީ 'ސިންގަލް ޓްރެކް' މޮނޯރެއިލްއަކުން ކަމަށެވެ.
"އެ މަސައްކަތަށް ފައިނޭންސް ކުރުމަށްޓަކައި ބަޔަކާ އެކު ވަނީ ސޮއިކުރެވިފައި. އެއީ އިންޓަނޭޝަނަލް ފްރީޒޯން އޮތޯރިޓީއާއެކު ސޮއިކުރެވިފައި މިވަނީ،" މިނިސްޓަރު ވިދާޅުވިއެވެ.
ސައީދު ވިދާޅުވީ ސްޕެޝަލް އިކޮނޮމިކް އެންޑް ފައިނޭންޝަލް ސާވިސަސް ޒޯނެއް ފުނަދޫގައި ތަރައްގީ ކުރުމަށް އެ ރަށުގައި މިހާރު ހުރި ފިއުލް ސްޓޯރޭޖް މާލެ ސަރަހައްދުގައި ތަނެއް ހިއްކައިގެން އެތަނަށް ޓާމިނަލް ބަދަލު ކުރުމަށްވެސް މިހާރު ބަޔަކާ ހަވާލުކޮށްފައިވާ ކަމަށެވެ.
އެ ކުންފުނީގެ ނަން ހާމަނުކުރައްވައި، މީގެ ކުރިން ސައީދު ވަނީ ތެޔޮ ޓޭންކުތައް ބަދަލުކުރުމުގެ މަސައްކަތް ޗައިނާ ކޮންޓްރެކްޓަރަކާ ހަވާލުކޮށްފައިވާ ކަމަށެވެ.
މިނިސްޓަރު ވިދާޅުވީ މިމަސައްކަތް ރައީސް ވިދާޅުވި ފަދައިން 18 މަސް ދުވަހުގެ ތެރޭގައި ނިންމުމަށް މިހާރު މަސައްކަތް ކުރަމުން އަންނަ ކަމަށެވެ. އަދި ފުނަދޫ އިމާރާތްކުރުމުގެ ކުރެހުންތަކުގެ މަސައްކަތްތައް ވެސް މިހާރު ކުރަމުން އަންނަ ކަމަށް އޭނާ ވިދާޅުވިއެވެ.
ސައީދު ވިދާޅުވީ، ރާއްޖޭގެ ރައްޔިތުން ބޭނުންވާނެ އަދި ޒިޔާރަތްކުރާ ފަރާތްތަކުން ލޯބިކުރާނެ ޓެކްނޮލޮޖީގެ ޒަމާނީ އިމާރާތެއް ފުނަދޫގައި ބިނާކުރުމަކީ ރައީސް ޑރ. މުހައްމަދު މުއިއްޒު ބޭނުންފުޅުވާ ގޮތް ކަމަށެވެ. އެގޮތަށް އެކަން ކުރިއަށްގެންދާނެ ކަމަށް ވެސް އޭނާ ވިދާޅުވިއެވެ.
އިހަވަންދިއްޕޮޅުގައި ތަރައްގީ ކުރާ މޯލްޑިވްސް އިކޮނޮމިކް ގޭޓުވޭ ތަރައްގީ ކުރުމުގެ މަސައްކަތް ވެސް ހަވާލުކޮށްފައިވަނީ އިފްޒާއާއެވެ.
ފުނަދޫގައި ހުރި ތެޔޮ ޓޭންކުތައް ބަދަލުކުރަނީ ރައީސް ޑރ. މުޙައްމަދު މުއިއްޒު މިދިޔަ ޖެނުއަރީ މަހު އިފުތިތާހު ކުރެއްވި، ވެލާނާ އިންޓަނޭޝަނަލް އެއާޕޯޓު ތަރައްގީކުރުމުގެ ބިޔަ މަޝްރޫއުގެ ތެރެއިންނެވެ.
ރައީސް ވިދާޅުވީ އެ މަޝްރޫއުގެ ދަށުން، ސީ ޕްލޭން ޓާމިނަލާއި، ފުނަދުއާއި، މާލެއާއި ހުޅުލެއާ ގުޅުވާލައި، ބްރިޖެއް ތަރައްގީކުރާނެ ކަމަށެވެ. އަދި މޮނޮރެއިލް ޚިދުމަތާއެކު ޕަބްލިކް ޓްރާންސްޕޯޓު ސިސްޓަމެއް ގާއިމުކުރައްވާނެ ކަމަށް ވެސް އެ މަނިކުފާނު ވިދާޅުވެފައިވެއެވެ.