22 May 2024, 07:35
މިހާރު ފްރާންސްގެ ކާންސްގައި ކުރިއަށްދާ ފިލްމު ފެސްޓިވަލް އަކީ ފިލްމީ ދުނިޔޭގެ އެންމެ ފާހަގަކޮށްލެވޭ އެއް އިވެންޓެވެ. ފިލްމުތަކުގެ އިތުރުން މި އިވެންޓަކީ ފެޝަންގެ ބޮޑެތި މެސެޖުތައް ވެސް ފެންނަ އިވެންޓެކެވެ. މި ފަހަރު ހޮލީވުޑްގެ އޭލިސްޓު ތަރި ކޭޓް ބްލަންޗެޓް މި އިވެންޓުގައި ދައްކާލީ ވަރުގަދަ މެސެޖެކެވެ.
ކާންސް ފިލްމު ފެސްޓިވަލްގައި މި ފަހަރު ވެސް ތަފާތު އެކި ހެދުންތައް ވަނީ ފެނިގެން ގޮސްފައެވެ. އޭގެ އެކި ހެދުންތަކުން އެތައް ބައެއްގެ މެދުގައި ހިޔާލު ތަފާތުވުން ފެނިގެން ގޮސްފައިވެއެވެ. ނަމަވެސް، ކޭޓް ލައިގެން ދިޔަ ހެދުން ފިޔަވާ އިތުރު ހެދުމަކުން ބޮޑު މެސެޖެއް ފެނިގެން ގޮސްފައެއް ނުވެއެވެ.
އޮސްކާ ވެސް ހޯދާފައިވާ މަގުބޫލު އެކްޓަރު ކޭޓް ލައިގެން ދިޔަ ހެދުމުން ދައްކާލީ ފަލަސްތީނަށް އޭނާ އޮތް ސަޕޯޓުގެ މެސެޖެވެ.
ލުއީ ވުޓޯންގެ ކަސްޓަމް މި ހެދުން ފަރުމާ ކޮށްފައިވަނީ ކޭޓަށެވެ. އަދި، މި ހެދުމަށް އެއްލާ ކަޅިއަކުން ހެދުން އެހާ ޚާއްސަ ކަމަކަށް ނުފެނިދާނެއެވެ. ނަމަވެސް، ކޭޓްގެ ހެދުމާ އެކު ރަތް ދޫލައެއްގެ މަތީގައި ހުރެ ހުޅުވާލުމާ އެކު ފެނިގެންދިޔައީ ފަލަތީނުގެ ދިދައިގެ ކުލަތަކެވެ.
މިއީ ކާންސްގައި ފަލަސްތީނަށް ސަޕޯޓު ދިން މި ވަރުގެ ބޮޑު ފުރަތަމަ ތަރިއެވެ. ކޭޓްގެ މި ހިމޭން މެސެޖާ އެކު އެތައް ބައެއްގެ ތައުރީފު ވަނީ ކޭޓްއަށް ރައްދުވެފައެވެ.
މިއީ ކޭޓް ފަލަސްތީނަށް ސަޕޯޓު ކުރާކަން ފާޅުކުރި ފުރަތަމަ ފަހަރެއް ނޫނެވެ. އޮކްޓޯބަރު މަހުން ފެށިގެން ދެމުންދާ ހަމަލާތަކުގައި ފަލަސްތީނަށް ލިބެމުންދާ ގެއްލުންތަކާ ގުޅިގެން އެކަން ހުއްޓުވުމަށް ގޮވާލި އެންމެ ފުރަތަމަ ތަރީންގެ ތެރޭގައި އޭނާ ހިމެނޭނެއެވެ. އަދި، ޔޫރަޕިއަން ޔޫނިއަން (އީޔޫ)ގައި ވެސް ފަލަސްްތީނުގެ ހައްގުގައި ކޭޓް ވަނީ އެކި ފަހަރުގެ މަތީން ވަކާލާތު ކޮށްފައެވެ.