17 May 2024, 11:07
އެމެރިކާގެ މަޝްހޫރު ތަރިން ޖެނިފާ ލޮޕޭޒް (ޖޭލޯ)އާއި ބެން އެފްލެކްގެ ކައިވެންޏަށް ދެ އަހަރު ނުވަނީސް ދެމަފިރިން ވަރިވާން އުޅޭ ކަހަލަ ވާހަކަތަކެއް ދެކެވެން ފަށައިފިއެވެ.
އެކީގައި ލޯބިން އުޅެ އެންގޭޖުވުމަށް ފަހު އެ ރޫޅި ދެ މީހުން އެތައް އަހަރެއްގެ ފަހުން ދިމާވެ، އަލުން ކައިވެނިކުރީ 2022 ވަނަ އަހަރުގައެވެ. އެއާއެކު ޖޭލޯ ބުނަމުން ދިޔައީ ދެ މީހުން ދިމާވީ ވަރަށް ވަރުން އުޅެމުން ކަމަށެވެ. އަދި އެތައް އަހަރެއް ވަންދެން، ކާމިޔާބުނުވެ އޮތް ލޯތްބަށް އުފާވެރި ނިމުމެއް ލިބި އާ ފެށުމެއް ފެށޭތީ ދުވަހަކު ނުވާ ފަދަ އުފަލެއް ވެފައިވާ ކަމަށް ޖޭލޯ މީގެ ކުރީން ބުނަމުން ދިޔައެވެ.
ދެ މީހުންގެ ކައިވެންޏަށް އެއް އަހަރު ފުރުމުން ދެ މީހުންގެ ކައިވެނީގެ ހުވާތައް އާކޮށް އަލުން ކައިވެންޏެއް ކޮށްފައިވަނީ މިދިޔަ އަހަރެވެ. މިއީ 17 ވަރަކަށް އަރު ފަހުން ދެ މީހުން ދިމާވެ ލޯބި އަލުން ފެށުމުގެ ހެއްކެއް ކަމުގައި ދެމަފިރިން ބުނަމުން ދިޔައެވެ.
ނަމަވެސް މިހާރު މި ލޯބީގެ ރާގު ބަދަލުވެއްޖެއެވެ. ޖޭލޯގެ ގާތުގައި މަސައްކަތް ކުރާ މަސްދަރަކުން ބޭރުގެ މީޑިއާތަކަށް މައުލޫމާތު ދޭ ގޮތުގައި ދެ މީހުން މިހާރު އުޅެނީ ވަރިވާށެވެ. ދެ މީހުންގެ ދެމެދުގައި އޮތް ގުޅުން ހީނަރުވެފައިވާ ކަމަށް ވެސް މައުލޫމާތު ދެއެވެ.
މިހާރު ވެސް ދެ މީހުން އުޅެމުން އަންނަނީ ވަކީން ކަމުުގައި ބޭރުގެ ނޫސްތަކުން ބުނެއެވެ.
މި ވާހަކަތައް ދެކެވެން ފަށާފައިވަނީ އިވެންޓުތަކުންނާއި ބޭރުން ދެ މީހުން އެކީގައި މިހާރު ނުފެންނާތީއެވެ. މީގެކުރީން ހުރިހާ ތަނަކަށް ދެ މީހުން އެކީގައި ދިޔައިރު މިހާރު އިވެންޓުތަކުން ފެންނަނީ ޖޭލޯ އެކަންޏެވެ. އެފްލެކްގެ އެއްވެސް ޚަބަރެއް ނެތެވެ.
ދެ މީހުން ކައިވެނި ރޫޅެން އުޅޭ ކަމަށް ވާހަކަ ދެކެވޭއިރު މިކަމުގެ ފަހަތުގައިވާ ސަބަބެއް ނޭނގެއެވެ. މި ވާހަކައަކީ ޖޭލޯ އަދި އެފްލެކް ވެސް ކަށަވަރު ކޮށްދީފައިވާ ވާހަކައެއް ނޫނެވެ.
ޖޭލޯއާއި އެފްލެކް އަށް ކައިވެނި ކުރެވިފައިވަނީ ދެ ފަހަރަކު އެންގޭޖުވުމަށް ފަހުގައެވެ. ދެ މީހުން ފުރަތަމަ އެންގޭޖުވެފައި ވަނީ 2002 ވަނަ އަހަރު އެވެ. ނަމަވެސް، އެ ދެ މީހުން ކައިވެނި ކުރުމުގެ ކުރިން، 2004 ވަނަ އަހަރު ވަކިވިއެވެ.