13 May 2024, 19:11
މި އަހަރުގެ ހޮޓެލް އޭޝިއާ 2024 އެގްޒިބިޝަން އެންޑް އިންޓަނޭޝަނަލް ކަލިނަރީ ޗެލެންޖްގެ ޑިޖިޓަލް ޕާޓްނަރަކަށް ވުމަށް ދިރާގުން ސޮއިކޮށްފިއެވެ.
ހޮޓެލް އޭޝިއާއަކީ ދިވެހިރާއްޖޭގައި އިންތިޒާމްކޮށްގެން ބާއްވާ އެންމެ ފާހަގަކޮށްލެވޭ ފުޑް އެންޑް ހޮސްޕިޓާލިޓީ ޓްރޭޑް ޝޯއެވެ. މިއަހަރު ކުރިއަށްދާނީ ހޮޓެލް އޭޝިއާގެ 18ވަނަ އެޑިޝަނެވެ.
ދިރާގުން ބުނީ މިއަހަރުގެ އިވެންޓްގެ އެގްޒިބިޝަން ހަރަކާތް އޮންނާނީ މިއަދުން ފެށިގެން އަންނަ ބުދަ ދުވަހުގެ ނިޔަލަށް ދަރުބާރުގެއާއި އުސްފަސްގަނޑުގައި ކަމަށެވެ.
މި އިވެންޓްގެ އިންޓަނޭޝަނަލް ކަލިނަރީ ޗެލެންޖު އިއްޔެ ފަށާފައިވާއިރު، އަންނަ ބުދަ ދުވަހުގެ ނިޔަލަށް ދަރުބާރުގެއާއި ޤައުމީ ޔުނިވާސިޓީ (އެމްއެންޔޫ)ގައި މި ހަރާކާތް ކުރިއަށްދާނެއެވެ.
ދިރާގުން ބުނީ، މި އެގްޒިބިޝަންގައި ރާއްޖެއާއި ރާއްޖޭން ބޭރުން 100 އަށްވުރެ ގިނަ އެގްޒިބިޓަރުން ބައިވެރިވެ، އެފަރާތްތަކުގެ އުފެއްދުންތަކާއި ޚިދުމަތްތައް ދައްކާލާނެ ކަމަށެވެ.
މީގެއިތުރުން، އާ އުފެއްދުންތައް ލޯންޗުކޮށް ދައްކާލުމުގެ އިތުރުން، އެކި ވޯކްޝޮޕް ހަރަކާތްތައްވެސް އެގްޒިބިޝަންގެ ތެރެއިން ވަކި އިވެންޓްތަކެއް ގޮތުގައި ކުރިއަށްދާނެކަން ދިރާގުން ވަނީ ފާހަގަކޮށްފައެވެ.
ދިރާގުން ބުނީ، ކަލިނަރީ މުބާރާތްތަކުގައި ފާހަގަކޮށްލެވޭ ޖަޖިން ޕެނަލަކާއެކު 25 ކެޓަގަރީއަކުން 600 އަށްވުރެ ގިނަ ދިވެހި އަދި ބައިނަލްއަގުވާމީ ކަލިނަރީ އިންޑަސްޓްރީގެ ފަންނުވެރިން ޗެލެންޖުގައި ބައިވެރިވާނެ ކަމަށެވެ.
މި އިވެންޓްގެ ސަބަބުން އެފަރާތްތަކުގެ ހުނަރުތައް އާންމުންނަށް ދައްކާލުމުގެ ފުރުސަތު ލިބުމުގެ އިތުރުން ސަރަހައްދީ ކަލިނަރީ ކޮމިއުނިޓީ ތެރޭގައި ނެޓްވޯކްކުރުމުގެ ފުރުސަތުވެސް ފަހިވާނެކަން ދިރާގުން ފާހަގަކުރިއެވެ.