13 May 2024, 09:19
މާލޭ ކެފޭއެއްގެ ބަދިގޭގައި ހުރި ދުން ހޮޅިއަކުން ދުން ލީކުވުމުގެ ސަބަބުން ހަތް މީހަކު އަނބުރައިގަނެގެން އައިޖީއެމްއެޗަށް ގެންގޮސްފައިވާ ކަމަށް ފުލުހުން މިއަދު ބުނެފިއެވެ.
ފުލުހުން ބުނެފައިވަނީ މި ހާދިސާ ހިނގީ ބޮޑުރަސްގެފާނު މަގުގައި ހުރި ކެފޭއެއްގައި ކަމަށެވެ. މި ކަމުގެ ރިޕޯޓު ލިބުނީ މިއަދު ފަތިހު 05:50 ކަންހާއިރު، ފުލުހުންނަށް ރިޕޯޓުކޮށްފައިވާ ކަމަށެވެ.
މި ހާދިސާގައި ދުމުގެ އަސަރުކޮށްފައިވާ މީހުންގެ ތެރޭގައި ހިމެނެނީ އިންޑިއާ މީހަކާއި، ސްރީލަންކާ މީހެއްގެ އިތުރުން، ބަންގްލަދޭޝްގެ ދެ މީހުން އަދި ނޭޕާލްގެ ތިން މީހުން ކަމަށް ފުލުހުން ބުނެއެވެ.
މީގެ ތެރެއިން އެއްވެސް މީހެއްގެ ހާލު ސީރިއަސް ނޫން ކަމަށް ހޮސްޕިޓަލާ ހަވާލާދީ ފުލުހުން ބުނެފައިވާއިރު، އޭގެ ތެރެއިން އެކަކަށް އޭޑީކޭ ހޮސްޕިޓަލުގައި ފަރުވާދެމުންދާ ކަމަށް ފުލުހުން ބުނެއެވެ.
ފުލުހުން ބުނީ މި ހާދިސާއާ ގުޅިގެން ބަލަންޖެހޭ ކަންކަން ބަލަމުންދާ ކަމަށެވެ.