22 Mar 2024, 13:34
އިންޑިއާގެ ވެރިރަށް ނިއު ދިއްލީގެ ބަނގުރަލުގެ ސިޔާސަތާ ގުޅޭ ހިޔާނާތުގެ ތުހުމަތުތަކާ ގުޅިގެން އެ ސިޓީގެ ޗީފް މިނިސްޓަރު އަދި އިދިކޮޅު ލީޑަރު އަރްވިންދު ކެޖްރިވާލް ހައްޔަރުކޮށްފިއެވެ.
އެ ތުހުމަތުގައި އަރުވިންދު ހައްޔަރުކުރީ އިންޑިއާގެ ފައިނޭންޝިއަލް ކްރައިމް އޭޖެންސީންނެވެ.
އިންޑިއާގެ ގަރުނަކަށްވުރެ ގިނަ ދުވަސްވީ އާމް އާދްމީ ޕާޓީ (އޭއޭޕީ)އަށް ނިސްބަތްވެވަޑައިގަންނަވާ އަރުވިންދު ހައްޔަރުކުރިއިރު، އޭނޭގެ ދެ ނައިބުން ވެސް ހަމަ އެ މައްސަލައިގައި މިދިޔަ އަހަރު ވަނީ ހައްޔަރުކޮށްފައެވެ.
އަރުވިންދުގެ މައްޗަށްކޮށްފައިވާ ތުހުމަތުތައް ދިއްލީގެ މާލީ ވަޒީރު އަތީޝީ ސިންގް ވަނީ ދޮގުކުރައްވައިފައެވެ. އެ މައްސަލައިގައި އަވަސް ކޯޓު އަޑުއެހުމެއް ބޭއްވުމަށް އެދިވަޑައިގެންފައިވާ ކަމަށް ވެސް އަތީޝް ވިދާޅުވިއެވެ. އަދި، އަރްވިންދު ހައްޔަރުކުރުމަކީ އިންޑިއާގެ ބޮޑުވަޒީރު ނަރެންދުރަ މޯދީގެ ވެރިކަން ކުރާ ބާރަތިޔާ ޖަނަތާ ޕާޓީ (ބީޖޭޕީ)އިން އެކުލަވާލި "ސިޔާސީ ރޭވުމެއް" ކަމަށް އޭނާ ވިދާޅުވިއެވެ.
ފައިނޭންޝަލް ކްރައިމް އެޖެންސީ އެންފޯސްމަންޓް ޑިރެކްޓަރޭޓް (އީޑީ)އިން އަރްވިންދާ ގުޅިގެން ބަލަމުން އަންނަނީ 2022 ވަނަ އަހަރު ދިއްލީ ސަރުކާރުން ތަންފީޒުކުރި ބަނގުރާ ވިއްކުމުގެ ސިޔާސަތާ ގުޅިގެން ބަލަމުން އަންނަ މައްސަލައެކެވެ. އަރްވިންދުގެ ވެރިކަމުގައި އެ ސިޔާސަތާމެދު އޮތް ހިޔާލު ތަފާތުވުން ބޮޑުވެ، ބަނގުރާ ވިއްކުމަށް ސަރުކާރަށްއޮތް ކޮންޓްރޯލް ނިމުމަކަށްގެނެސް އަމިއްލަ ވިޔަފާރިތަކަށް ނާޖާއިޒު ފައިދާވާނެ ގޮތް ވަނީ ހަދައިފައެވެ.
އެ މައްސަލައިގައި އަރްވިންދު ހުކުރު ދުވަހު ކޯޓަކަށް ހާޒިރުވާން ހަމަޖެހިފައިވާ ކަމަށާއި، އޭނާގެ މައްޗަށް ކުރާ ދައުވާ އާންމު ކުރާނެ ކަމަށް އިންޑިއާގެ ނޫސްތަކުން ބުނެއެވެ.
އަރްވިންދު ހައްޔަރުކުރުމާ ގުޅިގެން އިންޑިއާގެ އިދިކޮޅު ޕާޓީތަކުން ވަނީ ކަންބޮޑުވުން ފާޅުކޮށްފައެވެ. އެގޮތުން އިންތިޚާބުކޮށްފައި ތިބޭ ޗީފް މިނިސްޓަރުން ހައްޔަރުކުރުން އާންމުވެފައިވާ ކަމަށް ކޮންގްރެސް ލީޑަރު ރާހުލް ގާންދީ ވަނީ ވިދާޅުވެފައެވެ.