20 Mar 2024, 16:48
މި އަހަރުން ފެށިގެން ރާއްޖޭގައި ފިޠުރު އީދާއި އަޟްޙާ އީދު ނަމާދުގެ ޖަމާއަތް ފަށާ ވަގުތަކީ ހެނދުނު 07:00 ކަމަށް ކަނޑައަޅައިފިއެވެ.
އިސްލާމީ ކަންތައްތަކާބެހޭ ވުޒާރާއިން ބުނީ އީދު ނަމާދުގެ ޖަމާއަތް ފަށާ ވަގުތު އަވަސްކުރުމަށް ނިންމާފައިވަނީ ރާއްޖޭގެ އިސްލާމީ ފަތުވާދޭ އެންމެ މަތީ މަޖިލީހާއި، ދީނީ އިލްމުވެރިންނާއި، އިސްލާމީ ކަންތައްތަކާބެހޭ ވުޒާރާގައި ގާއިމުކުރެވިފައިވާ ފަލަކީ ހިސާބުތަކާ ބެހޭ ކޮމިޓީއާ މަޝްވަރާ ކުރުމަށްފަހުގައި ކަމަށެވެ.
އެ ވުޒާރާއިން ބުނީ ތުއްތު ކުދިންނާއި އަންހެނުންނާއި އުމުރުން ދުވަސްވީ މީހުން ވެސް އީދު ނަމާދުގައި ބައިވެރިވެ، އަދި މިހާރަކަށް އައިސް ރާއްޖޭގެ މައިދާންތަކާއި ހުސްބިންތަކުގައި އީދު ނަމާދު ކުރާއިރު، އެ ވަގުތަކީ އިރުގެ ހޫނުކަން ގަދަވަމުން އަންނަ ވަގުތަކަށްވުމާއެކު ތަކުލީފުތައް އުފުލަންޖެހޭ ކަމަށެވެ.
އަދި ކީރިތި ރަސޫލާގެ ސުންނަތުން ސާބިތުވާ ގޮތުގައި އެކަލޭގެފާނު ވެސް އީދު ނަމާދު ކުރައްވާފައިވަނީ އިރުގެ ހޫނުކަން ގަދަވުމުގެ ކުރިން ޟުހާ ވަގުތުގައިކަން ފެންނަން އޮތްކަން ވެސް އެ ވުޒާރާއިން ފާހަގަ ކޮށްފައިވެއެވެ.
މީގެ ކުރިން ރާއްޖޭގައި ދެ އީދުގެ ވެސް ޖަމާއަތް ފަށަނީ ހެނދުނު 07:30ގައެވެ. އެހެން ނަމަވެސް އީދު ނަމާދަކީ ބޮޑުޖަމާއަތުގައި ވެސް ކުރާ ނަމާދަކަށްވުމާއި ޖަމާއަތް ނިމުމުގެ ކުރިން އަވިއަރާތީ، ގިނަ ބަޔަކު އެ ކަމުގެ ޝަކުވާ ކުރި ކަމަށް އިސްލާމީ ކަންތައްތަކާބެހޭ ވުޒާރާއިން މީގެ ކުރިން ވަނީ ބުނެފައެވެ.
އެ ވުޒާރާއިން އިއްޔެ ކުރި އިއުލާނެއްގައި ވަނީ ފިތުރު އީދު ނަމާދުގެ ބޮޑުޖަމާއަތް އޮންނާނީ މާފަންނު ސްޓޭޑިއަމް ސަރަޙައްދާއި، ވިލިމާލެ ބޯޅަދަނޑު، ހުޅުމާލެ ފޭސް އެކެއްގެ ސިންތެޓިކް ޓްރެކް ސަރަހައްދު، އަދި ހުޅުމާލެ ފޭސް ދޭއްގެ ކްރިކެޓް ސްޓޭޑިއަމްގައި ކަމަށް ބުނެފައެވެ.