14 Mar 2024, 15:53
ޔުއޭފާ ޗެމްޕިއަންސް ލީގުގެ ކުއާޓާ ފައިނަލުން ސްޕެނިޝް ލަލީގާގެ އެޓްލެޓިކޯ މެޑްރިޑް ޖާގަހޯދައިފިއެވެ.
މި މުބާރާތުގެ ކުއާޓާ ފައިނަލްއިން އެޓްލެޓިކޯ ޖާގަހޯދާފައިވަނީ ރައުންޑް އޮފް ސިކްސްޓީންގައި މިދިޔަ ސީޒަންގައި ފައިނަލްގައި އެއް ކޮޅުން ވާދަކުރި އިޓާލިއަން ސެރީއާގެ އިންޓާ މިލާނާއި ބައްދަލުކޮށް އެގްރިގޭޓް ނަތީޖާއަށް ބަލާއިރު ދެ ލަނޑު ދެ ލަނޑުން ދެ ޓީމު އެއްވަރުވުމުން ޕެނަލްޓީ ޖަހައިގެން ތިން ލަނޑު ދެ ލަނޑުން ކުރި ހޯދައިގެންނެވެ.
މި ދެ ޓީމުގެ މެދުގައި ކުޅުނު ފުރަތަމަ ލެގު އިންޓާގެ ދަނޑުގައި ކުޅެ އެއް ލަނޑު ސުން ލަނޑުން ކާމިޔާބު ކޮށްފައިވަނީ އިންޓާއެވެ. އަދި އެޓްލެޓިކޯގެ ދަނޑުގައި ރޭ ކުޅުނު ދެވަނަ ލެގުގެ ފުރިހަމަ ވަގުތު ހަމަވިއިރު ދެ ލަނޑު އެއް ލަނޑުން ކުރި ހޯދީ އެޓްލެޓިކޯއެވެ. ނަތީޖާ އަކަށްވީ އިތުރު ވަގުތު ކުޅެ އަދި އެއަށްފަހު ޕެނަލްޓީ ޖަހައިގެން ނަތީޖާ ނެރެން ޖެހުމެވެ.
ދެވަނަ ލެގުގައި ދެ ޓީމުގެ ފަރާތުން ވަރަށް ވާދަވެރި އަދި ބަލާ ހިތްވާ ކުޅުމެއް ފެނުނެވެ. އަދި މި މެޗުގައި އިންޓާއިން ގިނައިރު ބޯޅަ ގެންގުޅުނު އިރު ގިނަ ހަމަލާ އުފައްދާފައިވަނީ އެޓްލެޓިކޯއިންނެވެ.
އެޓްލެޓިކޯއިން ހާސްވީ މެޗުގެ 33 ވަނަ މިނެޓުގައި އިންޓާއިން އުފެއްދި ކައުންޓާ އެޓޭކެއްގައި ލަނޑެއް ޖަހާ މެޗުގެ ލީޑު ނެގުމާއެކުއެވެ. މި ލަނޑު އެ ޓީމަށް ޖަހައިދިނީ ފެޑެރީކޯ ޑިމާކޯއެވެ.
ނަމަވެސް އިންޓާއަށް މިލީޑު ދެމެހެއްޓޭވަރުވީ ދެ މިނެޓަށެވެ. މެޗުގެ 35 ވަނަ މިނެޓުގައި އެންޓޮއިން ގްރީޒްމަންވަނީ ލަނޑެއް ޖަހާ މެޗުގެ ނަތީޖާ ހަމަހަމަ ކޮށްފައެވެ.
މި ލަނޑާއެކު އެޓްލެޓިކޯއަށް އިތުރު ހިތްވަރެއް ލިބި އެޓީމުން އުފައްދަމުންދިޔަ ހަމަލާތައް އިތުރު ކުރިތަން ފެނުނެވެ.
މި މެޗުގެ ދެވަނަ ހާފުގައި ވެސް ދެ ޓީމުގެ ފަރާތުން ފެނުނީ ދާދި އެއްގޮތް ކުޅުމެކެވެ. އަދި މި ހާފުގައި ދެ ޓީމަށް ވެސް ލަނޑު ޖަހާނެ ރަނގަޅު ދެ ތިން ފުރުސަތު ލިބުނެވެ.
މެޗު ނިމެން 3 މިނެޓަށް ވެފައިވަނިކޮށް އެޓްލެޓިކޯއަށް މެޗުގެ ލީޑު ނަގައިދީ އެގްރިގޭޓް ނަތީޖާއިން ދެ ޓީމު ހަމަހަމަ ކޮށްދިން ލަނޑު ޖަހައިދިނީ މެމްފިސް ޑިޕާއީއެވެ.
މި މެޗުގެ އިތުރު ވަގުތުގައިވެސް ދެޓީމުންކުރެ އެއްވެސް ޓީމަކަށް އިތުރު ލަނޑެއް ކަމިޔާބު ކުރެވޭގޮތް ނުވުމުން ނަތީޖާ ނެރެފައިވަނީ ޕެނަލްޓީ ޖަހައިގެންނެވެ.
ޕެނަލްޓީ ޝޫޓް އައުޓްގައި ތަރިއަކަށް ވެގެންދިޔައީ އެޓްލެޓިކޯގެ ކީޕާ ޔާން އޮބްލެކްއެވެ. އޭނާވަނީ އެލެކްސިސް ސަންޗޭޒް އާއި ޑެވީ ކްލާސެން ޖެހި ދެ ޕެނަލްޓީ ދިފާއުކޮށްފައެވެ. އަދި އިންޓާގެ ކެޕްޓަން ލައުޓާރޯ މާޓިނޭޒް ޖެހި ޕެނަލްޓީ ދިޔައީ ހުރަސް ދަނޑިމަތިން ބޭރަށެވެ.
އަދި އިންޓާގެ ކީޕާ ޔާން ސޮމާ އެޓްލެޓިކޯގެ ސައުލް މިގުއޭޒް ޖެހި ޕެނަލްޓީ މަތަކުރި ނަމަވެސް އެޓީމުން ދެން ޖެހި ތިން ޕެނަލްޓީ ވެސް ވަނީ ކާމިޔާބު ކޮށްފައެވެ. އެހެން ކަމުން އެޓްލެޓިކޯއަށް ކުރި ލިބުނީ ތިން ލަނޑު ދެ ލަނޑުންނެވެ.