19 Feb 2024, 12:19
ރާއްޖޭގެ ތަރައްގީއަށާއި، މިހާރު ގައުމުގެ މިނިވަންކަން ހިމާޔަތްކުރުމަށް ކުރަމުން އަންނަ މަސައްކަތަށް، ކުރިއަށް އޮތް މަޖިލިސް އިންތިޚާބުގެ އަޣުލަބިއްޔަތު ސަރުކާރަށް ހޯދައިދިނުން މުހިންމު ކަމަށް ރައީސް ޑރ. މުޙައްމަދު މުއިއްޒު މިއަދު ވިދާޅުވެއްޖެއެވެ.
އައްޑޫ، ހުޅުދޫ، މީދޫ ރައްޔިތުންނާ ބައްދަލުކުރުމަށް ބޭއްވި ޖަލްސާގައި ވާހަަކަފުޅުދައްކަވަމުން ރައީސް ވިދާޅުވީ، ރާއްޖޭގެ ދުސްތޫރީ ނިޒާމު ރޭވިފައި އޮތް ގޮތުން، ސަރުކާރަކުން ރައްޔިތުންނަށް ކިތަންމެ ގިނަ ކަންތައްތަކެއް ކޮށްދޭން ބޭނުންވި ނަމަވެސް، ރައްޔިތުންގެ މަޖިލީހުގެ އަޣުލަބިއްޔަތު ނުލިބޭނަމަ އެ ކަން ކުރުމަށް ހުރަސް އެޅޭކަމަށެވެ.
އެހެންވެ ރައްޔިތުންގެ މަޖިލިސް ވާންޖެހެނީ ސަރުކާރަށް އެއްބާރުލުންދޭނެ މަޖިލީހަކަށް ކަމަށް ރައީސް ވިދާޅުވިއެވެ.
"މި ސަރުކާރުން ތި ބޭފުޅުންނަށް ކޮށްދެއްވަން ބޭނުންވާ ކަންކަން ކުރުމަށް މަގުފަހިކޮށްދިނުމަށް ޓަކައި އިންތިޚާބުގައި ކަންކަން ނިންމައިދެއްވުމަކީ ކުރައްވާނެ ކަމެއްކަން އަޅުގަނޑު ޔަގީންކުރަން،" ރަައީސް ވިދާޅުވިއެވެ.
އެއާއެކު ރައީސް ވަނީ އަންނަ މަހު އޮންނަ މަޖިލިސް އިންތިޚާބުގައި ރައްޔިތުން ވިސްނައި ޒިންމާދާރުވެ ނިންމުން ނިންމުމަށް އެދިވަޑައިގެންފައެވެ.
ރައީސް ވިދާޅުވީ މަޖިލިސް، ސަރުކާރަށް ލިބުމަކީ ރަށާއި، މުޅި ގައުމުގެ ތަރައްގީއަށް މުހިންމު ކަމެއް ކަމަށެވެ. އަދި މިއީ ސިޔާސީ ކަމެއް ނޫންކަމަށް ވެސް ވިދާޅުވިއެވެ.
އެގޮތުން ރާއްޖެއިން ބޭރުގެ އަސްކަރީ ސިފައިން ފޮނުވައި، މިނިވަންކަން ކަށަވަރުކުރުމަށް ކުރާ މަސައްކަތަށް ހުރަސް ނޭޅި، ކުރިއަށް ގެންދިއުމަށް ވެސް އިންތިޚާބު މުހިންމު ކަމަށް ވިދާޅުވިއެވެ.
އެއާއެކު ރައީސް ވަނީ އައްޑޫ ރައްޔިތުންނަށް ވެސް ވެވަޑައިގެންނެވި ވައުދުތައް ފުއްދަވައިދެއްވާނެ ކަމަށް ވިދާޅުވެފައެވެ. އެގޮތުން މިއަދު ސޮއިކުރެވުނު ބްރިޖުގެ އަމަލީ މަސައްކަތް މި އަހަރު ފަށައި، އެންމެ ގިނަވެގެން ހަތަރު އަހަރުން ނިންމަވައިދެއްވާނެކަމަށް ވިދާޅުވިއެވެ.
މަޖިލިސް އިންތިޚާބު އަންނަ މަހު ބާއްވަން ހަމަޖެހިފައިވާއިރު މިހާރު ކެންޑިޑޭޓުންގެ ގުރު ނެގުން ވަނީ ނިމިފައެވެ.