13 Feb 2024, 23:16
އެލީޓް ރަނާސް ދުވުމުގައި ފުރަތަމަ ރެޖިސްޓާވާ މީހުންނަށް ޑިސްކައުންޓެއް ލިބޭ ގޮތަށް، އެ ދުވުމަށް ރެޖިސްޓާވާން މިއަދު ފުރުސަތު ހުޅުވާލައިފިއެވެ.
ހެޔޮ އަގުގައި ރެޖިސްޓާވުން ކުރިއަށް ދާނީ އަންނަ މާޗު މަހުގެ 15އާ ހަމައަށެވެ. އަންނަ މަހުގެ 15ގެ ފަހުން ރެޖިސްޓާ ވާނަމަ އަގަށް ބަދަލުތަކެއް އަންނާނެއެވެ.
އެގޮތުން 'އާލީ ބާޑް'ގެ ދަށުން ރެޖިސްޓާ ވުމުގެ އަގުތަކަކީ:
10 ކިލޯމީޓަރު- 380 ރުފިޔާ
- ފަސް ކިލޯމީޓަރު- 250 ރުފިޔާ
- އެއް ކިލޯމީޓަރު- 100 ރުފިޔާ
މާޗު 15ގެ ފަހުން ރެޖިސްޓާ ވާނަމަ ރެޖިސްޓާ ވެވޭނެ އަގުތަކަކީ:
10 ކިލޯމީޓަރު- 450 ރުފިޔާ
- ފަސް ކިލޯމީޓަރު- 350 ރުފިޔާ
- އެއް ކިލޯމީޓަރު- 150 ރުފިޔާ
މި ދުވުމުގައި ރެޖިސްޓާ ވުމުގެ ފުރުސަތު އެއްކޮށް ބަންދު ވާނީ މާޗް 30ވަނަ ދުވަހުއެވެ. ދުވުމާ ބެހޭ އިތުރު މައުލޫމާތު އެލީޓް ރަނާސްގެވެބްސައިޓުންލިބެން ހުންނާނެއެވެ.
އެލީޓް ރަނާސްއިން މައުލޫމާތުދިން ގޮތުގައި މި ރޭހަކީ ހުރިހާ އުމުރެއްގެ މީހުންނަށް ދުވެވޭ ކަހަލަ ރޭހެއް ބޭއްވުމުގެ މަގްސަދުގައި ބާއްވާ ރޭހެކެވެ.
އެ ދުވުމުގެ މެއިން ޕާޓްނަރެއްގެ ގޮތުގައި މަސައްކަތް ކުރަނީ އެޗްޑީސީއެވެ. އަދި އެންޖީއޯގެ ގޮތުގައި މަސައްކަތް ކުރުމަށް ހަމަޖެހެފައިވަނީ މަމްސް އެއިޑްއެވެ.
އެލީޓް ރަނާސްއިން ބުނީ އެންޖީއޯގެ ގޮތުގައި މަމްސް އެއިޑް ޚިޔާރު ކުރީ އެ ޖަމިއްޔާއަކީ ވަރަށް ގާބިލު، މަސައްކަތް ވަރަށް ރަނގަޅަށް ކުރާ ޖަމިއްޔާއަކަށްވާތީ ކަމަށެވެ.
އެ ދުވުމަށް ރެޖިސްޓާވާއިރު، މަމްސް އެންޖީއޯއަށް ފައިސާގެ އެހީ ފޯރުކޮށްދިނުމުގެ ފުރުސަތު ވެސް ލިބޭނެއެވެ.
އެލީޓް ރަނާސްއިން ބުނީ މި ދުވުމުގެ އެންމެ ބޮޑު އެއް ބެނުމަކީ ނޭޝަނަލް، ސީޒަނަލް އަދި އަލަށް ދުވާ މީހުންނަށްވެސް އެއް ޕުލެޓްފޯމެއްގައި ވާދަކުރެވޭނެ ދުވުމެއް ބޭއްވުން ކަމަށެވެ. އެގޮތުން ރޭހުގެ އެއްވަނަ ދެވަނަ އަދި ތިން ވަނައަށް ދާ ފަރާތްތަކަށް ފައިސާގެ އިނާމު ދޭ ގޮތަށް ހަމަޖެހިފައިވާ ކަމަށްވެސް އެލީޓް ރަނާސްއިން ވަނީ ބުނެފައެވެ. ނަމަވެސް ދޭނީ ކިހާ ވަރެއްކަމެއް އަދި ހާމަކޮށްފައެއް ނުވެއެވެ.
އެލީޓް ރަނާސްއަކީ ދުވުންތެރިންނަށް ތަމްރީނު ދިނުމަށް، 2019 ވަނަ އަހަރު އުފައްދާފައިވާ އެސޯސިއޭޝަނެކެވެ.