11 Feb 2024, 06:45
އިންޑިއާގެ ކުރީގެ އެކްޓަރު މިތުން ޗަކްރަބަތީގެ ހާލު ދެރަވެ އައިސީޔޫގައި ފަރުވާ ހޯދަމުން އަންނަކަމަށް އިންޑިއާގެ މީޑިއާތަކުން ބުނެފިއެވެ.
އިންޑިއާގެ ނޫސްތަކުގައި ބުނެފައިވާ ގޮތުން 73 އަހަރުގެ އެކްޓަރު ހޮސްޕިޓަލަށް ގެންދެވުނީ އިއްޔެގެ ހެނދުނުގެ ވަގުތެއްގައި މޭގައި ރިއްސަން ފެށުމާ ގުޅިގެންނެވެ.
އިންޑިއާގެ ކަލްކަތާގެ ހޮސްޕިޓަލެއްގައި އެޑްމިޓްކޮށް މިތުންއަށް ފަރުވާ ދެމުން އަންނައިރު ފަހުގެ ޚަބަރުތައް ބުނާގޮތުން އެކްޓަރަށް ވަނީ ސިކުނޑިއަށް ޖެހޭ (އަސްކީމެކް) ސްޓްރޯކެއް ޖެހިފައެވެ. ކަލްކަތާގައި ހުންނަ އެޕޯލޯ ހޮސްޕިޓަލުގެ މެޑިކަލް ޓީމުން ނެރުނު ނޫސް ބަޔާނެއްގައި ބުނެފައިވަނީ ހޮސްޕިޓަލަށް ގެނައުމަށްފަހު ފަރުވާ ލިބެން ފެށުމުން މިތުންގެ ހާލު އިހުނަށްވުރެ ރަނގަޅު ކަމަށެވެ.
މިތުންގެ ދަރިފުޅު މިމޯ ޗަކްރަބަތީ މީޑިއާއަށް މައުލޫމާތު ދެމުން ބުނެފައިވަނީ ދާދި ފަހުން މިތުން ވަނީ އާދައިގެ މަތިން މެޑިކަލް ޗެކަޕެއް ހަދާފައި ކަމަށާއި ސިއްހީ އެއްވެސް މައްސަލައެއް މިތުންގެ ނެތް ކަމަށެވެ. ބައެއް މީޑިއާތަކުން ބައްޕަގެ ސއްހީ ހާލަތާ ގުޅުވައިގެން ދޮގު މައުލޫމާތުތަކެއް ފަތުރަމުން އަންނަ ކަމަށާއި އާއްމުން ކަންބޮޑުވާވަރުގެ އެއްވެސް މައްސަލައެއް ބައްޕަ މިތުންއަށް ކުރިމަތިނުވާކަމަށް މިމޯ ވަނީ ބުނެފައެވެ.
މިތުން ޗަކްރަބަތީ އާއިލާގެ މެމްބަރުންނާ އެކު-- ފޮޓޯ/އިންޓަނެޓް
އިންޑިއާގެ އެކި ފަންނުގައި މަސައްކަތް ކުރާ ފަންނުވެރިންނަށް އަރުވާ ޝަރަފުވެރި ޕަދްމާ ބުޝަން އެވޯޑް މިތުންއަށް ލިބޭނެކަން އިއުލާނުކޮށްފައިވާއިރު އޭނާ އަކީ ވެރިކަން ކުރާ ބީޖޭޕީ ޕާޓީ ތަމްސީލުކުރާ ވަރުގަދަ ސިޔާސީ ލީޑަރެއް ވެސްމެއެވެ.
އެތައް އަހަރު ދުވަހެއްގެ ބުރަ މަސައްކަތުގެ އަގުވަޒަން ކުރުމުގެ ގޮތޮން އެރުވުނު ޕަދުމާ ބުޝަން އެވޯޑް އެކްޓަރު ހަދިޔާކުރަން ބޭނުންވަނީ އޭނާއަށް ތާއިދުކުރާ ސަޕޯޓަރުންނަށް ކަމަށާއި ކުރިއަށް އޮތް ތަނުގައި ވެސް އާއްމުންގެ ލޯބި ލިބޭނެކަމަށް އުއްމީދުކުރާ ކަމަށް މިތުން ވަނީ ބުނެފައެވެ. މިތުން އެންމެ ފަހުން ބެލުންތެރިންނަށް ފެނިފައި ވަނީ ޑާންސް ރިއަލިޓީ ޝޯ "ޑާންސް ބަންގާލް ޑާންސް"ގައެވެ.