09 Feb 2024, 07:50
ބޮލީވުޑްގެ ބައެއް ފިލްމުތަކުން ފެނިފައިވާ ބަތަލާ ސޮހާ އަލީ ހާން މަންމަ ޝަރުމިލާ ޓޭގޯރްގެ ބައޮގްރާފީ އަމިއްލައަށް ލިޔަން ޝައުގުވެރިވާ ކަމަށް ސޮހާ ބުނެފިއެވެ.
ފިލްމު ކުޅުމުގެ އިތުރުން ލިޔުންތެރިއެއްގެ ގޮތުގައި މަސައްކަތް ކުރާ ސޮހާ ބުނެފައިވަނީ ކުރީގެ މަގުބޫލު ބަތަލާ ޝަރުމިލާ ޓޭގޯރުގެ ދިރިއުޅުމުގެ ރަން ޒަމާނުގެ ހަޔާތުގެ މައްޗަށް ބިނާކޮށް ފޮތެއް ލިޔެ ނެރުމަކީ އަބަދުވެސް ދެކެމުން އައި ހުވަފެނެއް ކަމަށެވެ. އެހެންނަމަވެސް އެކަން އެންމެ އިންސާފުވެރިކަމާއެކު ފުރިހަމައަށް ކުރެވިދާނެކަމުގެ އިތުބާރު އަމިއްލަ ނަފުސާމެދު އޮތްކަމާ މެދު ސުވާލު އުފެދޭ ކަމަށް ސޮހާ ވަނީ ބުނެފައެވެ.
ސޮހާ އަލީ ޙާން އަކީ ބަތަލާ ޝަރުމިލާއާއި ފިރިމީހާ މަންސޫރު އަލީ ޚާންގެ ކައިވެންޏަށް ލިބުނު ތިން ކުދިންގެ ތެރެއިން އެންމެ ހަގު ކުއްޖާއެވެ. ފިލްމު "ދިލް މާންގޭ މޯ" އަދި "ރަންގް ދެ ބަސަންތީ" ފަދަ ފިލްމުތަކުން ފެނިފައިވާ ބަތަލާ ވަނީ އެކްޓަރު ކުނާލު ކެމޫއާ ކައިވެނި ކުރުމަށް ފަހު ފިލްމީ ދާއިރާއާ ވަރަށް ބޮޑަށް ދުރުހެލިވެފައެވެ. ފިލްމީ ދާއިރާއާ ދުރުހެލިވުމަށްފަހު ސޮހާ ގިނަ ވަގުތު ހުސްކޮށްފައި ވަނީ އަލަތު ދަރިފުޅު އިނާޔާއާ އެކު ވަގުތު ހޭދަ ކުރުމަށެވެ.
ސޮހާ އަލީ ޚާން ފިރިމީހާ ކުނާލް އަދި ދަރިފުޅު އިނާޔާއާ އެކު-- ފޮޓޯ/އިންޓަނެޓް
ސޮހާ 2017 ވަނަ އަހަރު ލިޔުނު ފޮތް "ދަ ޕެރިލިސް އޮފް ބީންގް މޮޑަރެޓްލީ ފެމިލީ"އަށް ވަނީ 2018 ވަނަ އަހަރުގެ ކްރޮސްވޯޑް ބުކް އެވޯޑް ވެސް ލިބިފައެވެ. މިހާރު ވެސް ކުޑަކުދިންނަށް ހާއްސަކޮށްގެން ފޮތްތަކެއް ލިޔެ ނެރުމުގެ މަސައްކަތް ކުރަމުން އަންނަ ބަތަލާ ބުނެފައިވަނީ ސޮހާ އަކީ ޝަރުމިލާގެ އުފަން ދަރިއަކަށް ވެފައި މަންމަގެ ހަޔާތުގެ ދުވަސްތައް އެންމެ ގާތުން ފެނުނު އެކަކަށް ސޮހާ ވާނެ ކަމަށެވެ. އެހެންވެ، މަންމަގެ ދިރިއުޅުމުގެ ވާހަކަތައް މަންމައަށް ތަރުހީބު ކުރާ ފަރާތްތަކަށް ގެނެސްދޭން ބޭނުންވާ ކަމަށެވެ.
ދިގު މުއްދަތަކަށް ފިލްމީ މަސައްކަތްތަކާ ދުރުގައި ހުރުމަށް ފަހު ސޮހާ އަންނަނީ ބަތަލާ ނުޝްރަތު ލީޑް ރޯލް ކުޅޭ ފިލްމު "ޗޯރީ2"ގައި މަސައްކަތް ކުރަމުންނެވެ. މި ފިލްމު މި އަހަރު ރިލީޒް ކުރުމަށް ތައްޔާރު ވަމުން އަންނައިރު ސޮހާ ބުނެފައި ވަނީ ބިރުވެރި ފިލްމެއްގައި މަސައްކަތް ކުރުމަކީ އަބަދުވެސް ބޭނުންވި ކަމެއް ކަމަށެވެ.
މީގެ އިތުރުން، ސޮހާ އަންނަނީ ފިރިމީހާ ކުނާލް އުފައްދާ ބައޮޕިކްއެއްގައި ކޯ ޕްރޮޑިއުސަރެއްގެ ގޮތުގައި ވެސް މަސައްކަތް ކުރަމުންނެވެ.