02 Feb 2024, 10:48
ބޮލީވުޑްގެ މަޝްހޫރު ބަތަލާ ޕްރިޔަންކާ ޗޯޕްޅާ އާއި ފިރިމީހާ ނިކް ޖޯނަސް އެމެރިކާގައި ދިރިއުޅެމުން އައި ގެ ދޫކޮށް އެހެން ތަނަކަށް ބަދަލުވާން މަޖުބޫރުވެއްޖެއެވެ.
އެމެރިކާގެ މަޝްހޫރު މިއުޒިކް ބޭންޑް ޖޯނަސް ބްރަދާސްގެ ލަވަކިޔުންތެރިޔާ ނިކް ޖޯނަސްއާ ކައިވެނިކުރުމަށް ފަހު ޕްރިޔާންކާގެ ދެމަފިރިން އެމެރިކާގެ ލޮސް އެންޖެލިސްއިން ގެއެއް ގަނެފައިވަނީ 2019 ވަނަ އަހަރުއެވެ.
ހޮލީވުޑްގެ ބައެއް ފިލްމުތައް ވެސް ކުޅެފައިވާ ބަތަލާގެ މި ޑްރީމް ހައުސްއިން ދެ މީހުން ނުކުންނަން މަޖުބޫރުވީ އެ މެންޝަންގެ ފެން ދައުރުކުރާ ނިޒާމަށް ބޮޑެތި މައްސަލަތައް ކުރިމަތިވެ މޯލްޑް އިންފެކްޝަންގެ އަސަރު ވަރަށް ބޮޑަށް ދިމާވުމުންނެވެ. ދެމަފިރިންގެ ތުއްތު ދަރިފުޅު ވެސް ގޮވައިގެން ދިރިއުޅޭ މެންޝަންގައި ނޫޅެވޭ ވަރަށް ގެއްލުންތައް ލިބެން ފެށުމުން ޕްރިޔަންކާއަށް އެ މެންޝަން ސިފަކުރެވިފައި ވަނީ ބިރުވެރި ތަނެއްގެ ގޮތުގައި ކަމަށް ބޭރުގެ ނޫސްތަކުގައި ވަނީ ލިޔެފައެވެ.
ޖުމްލަ 20 މިލިއަން އެމެރިކާ ޑޮލަރުގެ މި މެންޝަން ވިއްކި ފަރާތުން މީގެކުރިން އެ ކަންކަން ހާމަކޮށްފައި ނުވާކަމަށް ބުނެ ޕްރިޔަންކާ އާއި ނިކް ވަނީ މެންޝަން ވިއްކި ފަރާތްތަކަށް ގާނޫނީ ފިޔަވަޅު އަޅަން ނިންމާފައެވެ. ފިނިހޫނުމިން ކޮންޓްރޯލް ކުރާ ވައިން ސެލަރަކާއި ޝެފްގެ ބަދިގެ އާއި ހޯމް ތިއޭޓަރާއި ބޯލިން އެލީ އާއި ސްޕާ ފަދަ ތަންތަން ހިމެނޭ ހަތް ކޮޓަރީގެ، މި މެންޝަންއަށް ލިބުނު ގެއްލުމުގެ ބަދަލު 1.5 މިލިއަނާއި 2.5 މިލިއަން ޑޮލަރާ ދެމެދުގެ އަދަދަކަށް ގާތްކުރާނެ ކަމަށް ޕްރިޔަންކާގެ ގާނޫނީ ޓީމުން ވަނީ އަންދާޒާ ކޮށްފައެވެ.
ޕްރިޔަންކާ އަދި ނިކް ލޮސް އެންޖެލިސްގައި ދިރިއުޅެމުން އައި ގެ-- ފޮޓޯ/އިންޓަނެޓް
ދަރިފުޅު މާލްތީއާ އެކު ޕްރިޔަންކާގެ ދިރިއުޅުން ވަގުތީ ގޮތުން އެހެން ތަނަކަށް ބަދަލުކޮށްފައި ވާއިރު ޕްރިޔަންކާ އާއި ނިކް އަކީ ވަރަށް ގިނައިން ލޮސް އެންޖެލިސްއިން ބޭރަށް ދަތުރުކުރާ ދެ މީހުންނެވެ.
ދެ މީހުންގެ މަސައްކަތާ ގުޅުވައިގެން އެމެރިކާއިން ބޭރުގައި ގިނަ ދުވަސްތައް ހޭދަކުރި ނަމަވެސް މި މެންޝަންއަކީ ދެ މީހުންގެ ވަރަށް ގިނަ ހަނދާންތަކާ ގުޅިފައިވާ ތަނެކެވެ.
ޖޯނަސް ބްރަދާސްއާ އެކު ނިކް ވަނީ ދާދިފަހުން އިންޑިއާގައި ފުރަތަމަ ފަހަރަށް ޕާފޯމްކޮށްފައެވެ. އެންމެ ފަހުން އެމޭޒަންގެ ވެބް ސީރީސް "ސިޓަޑެލް"އިން ފެނުނު ޕްރިޔަންކާ ބޮލީވުޑް ފިލްމަކުން އެންމެ ފަހުން ފެނިފައި ވަނީ 2019ވަނަ އަހަރުއެވެ.