27 Jan 2024, 23:53
ވެރިކަން ކުރާ މައި ކޯލިޝަން، ޕީޕީއެމް، ޕީއެންސީގެ ފަރާތުން ރައްޔިތުންގެ މަޖިލީހުގެ އިންތިޚާބުގައި ވާދަކުރާނެ ކެންޑިޑޭޓުން ކަނޑައަޅަން ބޭއްވި ޕްރައިމަރީގައި ކުރީގެ ބައެއް މެމްބަރުންނަށް ޓިކެޓު ކަށަވަރު ނުކުރެވި ނާކާމިޔާބުވެއްޖެއެވެ.
ޕީއެންސީގެ ޓިކެޓު ހޯދަން ޕްރައިމަރީގައި ޑިފެންސް މިނިސްޓަރު ޣައްސާން މައުމޫނުގެ ދައްތާފުޅު ދުންޔާ މައުމޫނާއި، މީގެކުރިން މަކުނުދޫ ދާއިރާގެ މެމްބަރުކަން ކުރެއްވި އަނާރާ ނައީމް ވެސް ވާދަކުރެއްވިއެވެ.
މީގެ އިތުރުން، ކުރީގެ މެމްބަރު މުޙައްމަދު ވަހީދު (ލޯޔަރު ވައްޑެ) ވެސް ވާދަކުރެއްވިއެވެ.
ނަމަވެސް މި ހުރިހާ މެމްބަރުންނަށްވީ ނާކާމިޔާބެވެ.
މިއަދުގެ ޕްރައިމަރީގައި ކުރީގެ ގިނަ މެމްބަރުންތަކަކަށް ޓިކެޓު ކަށަވަރުވެފައި ވެސް ވެއެވެ. އޭގެ ތެރެއިން ޓިކެޓު ކަށަވަރުކުރެއްވި ބައެއް ބޭފުޅުންގެ ތެރޭގައި ހިމެނެނީ:
ވިލިމާލެ ދާއިރާ - ކުރީގެ މެމްބަރު މުޙައްމަދު އިސްމާއީލް
- މާފަންނު މެދު ދާއިރާ - ކުރީގެ މެމްބަރު އަސްމާ ރަޝީދު
- މާފަންނު ދެކުނު ދާއިރާ - ކުރީގެ މެމްބަރު އަބްދުﷲ ރިފާއު (ބޮޗޭ)
- އިނގުރައިދޫ ދާއިރާ - ކުރީގެ މެމްބަރު މުޙައްމަދު ފަލާހު
- މިލަންދޫ ދާއިރާ - ކުރީގެ މެމްބަރު ހަސަން މުފީދު
- ތިނަދޫ އުތުރު ދާއިރާ - ކުރީގެ މެންބަރު ސައުދުﷲ ހިލްމީ
އެ ޕްރައިމަރީގައި 73 ދާއިރާއަކުން 71،597 މީހުންނަށް ވޯޓުލުމުގެ ހައްގު ލިބިގެންވާ ކަމަށް އެ ކޯލިޝަނުންވަނީ ބުނެފައެވެ. އެ ދާއިރާތަކަށް 283 ކެންޑިޑޭޓުން ވާދަކުރެއެވެ.
އެ ޕްރައިމަރީ ބާއްވަން ތައްޔާރުވެފައި ވަނިކޮށް، ބައެއް ކެންޑިޑޭޓުންގެ ކެންޑިޑެސީ ބަލައިނުގަންނަން ނިންމި މައްސަލަ ޕާޓީގެ ތެރޭގައި ވަރަށް ހޫނުވިއެވެ. އެގޮތުން ކެންޑިޑެސީ ބާތިލުކުރީ އެކަށިގެންވާ ވަރަށް ޕާޓީއަށް ޚިދުމަތްނުކުރާ ކަމަށް ބުނެއާއި ޕާޓީ ފިތުނަކުރަން މަސައްކަތް ކުރި ކަމުގެ ތުހުމަތުގައެވެ.
އެކަމަކު، މައްސަލަ ބޮޑުވުމުން ކޯލިޝަން ލީޑަރު ރައީސް ޑރ. މުހައްމަދު މުއިއްޒު ވަނީ ފޯމު ހުށަހެޅުއްވި ހުރިހާ ކެންޑިޑޭޓުންނަށް ޕްރައިމަރީގައި ވާދަކުރެއްވޭނެކަން އިއުލާނުކުރައްވައިފައެވެ.