27 Jan 2024, 22:21
މިއަދު އޮތް ޕީޕީއެމް/ޕީއެންސީ މަޖިލިސް ޕްރައިމަރީގައި، ކަލާފާނު ސްކޫލުގައި ބަހައްޓައިފައިހުރި މެދުހެންވޭރު ދާއިރާގެ ވޯޓުލުމުގެ ހަމަނުޖެހުމާއެކު މިރޭ ވެސް މަރުކަޒުގައި ހަމަނުޖެހުން ހިންގައިފިއެވެ.
މިކަމާ ގުޅިގެން ސޯޝަލް މީޑިއާގައި ދައުރުވަމުން އަންނަ ބައެއް ޕޯސްޓުތަކުން ފެންނަނީ، ކަލާފާނު ސްކޫލު ހޯލުގައި ހަމަ ނުޖެހުން ހިންގާ މަންޒަރެވެ.
އެގޮތުން ވޯޓު ގުނަމުން ދިޔަ ވަގުތު ބަޔަކު ކަރުދާސް ބަންޑެއްޔެއް ނަގައި ވީދާލައެވެ. ގިނަ އަދަދެއްގެ ކަރުދާސް ވީދައިލައިފައިވެއެވެ.
މި ކަމާ ގުޅިގެން އެ ސްކޫލުގައި ފުލުހުން ވެސް އަންނަނީ ހަރަކާތްތެރި ވަމުންނެވެ. މިއަދު ހެނދުނު ވެސް ކަލާފާނު ސްކޫލުގައި ހަމަަނުޖެހުން ހިންގައިފައިވެއެވެ.
ކަލާފާނު ސްކޫލުގެ އިތުރުން ތާޖުއްދިން ސްކޫލު ސަރަހައްދުގަ އިވެސް ވަނީ ހަމަނުޖެހުން އުފެދިފައެވެ.
ވޯޓުފޮށިތައް ބަންދުކުރަންވީ ގަޑިއާ ގުޅޭގޮތުން ވެސް ބައެއް މަރުކަޒުތަކުގައި ހަމަނުޖެހުން ހިނގައިފައިވެއެވެ.
ޕްރޮގްރެސިވް ކޮންގްރެސް ކޯލިޝަންގެ މި ޕްރައިމަރީގެ ވޯޓުލުން މިއަދު ހެނދުނު ފެށި، ވޯޓުގެ ކިއުތައް ބަންދުކުރަން ކަނޑައަޅައިފައިވާ ރަސްމީ ގަޑިއަކީ ހަވީރު 17:00އެވެ.
ނަމަވެސް ލަހުން ވޯޓުލުން ފެށުނު ފޮށިތައް ހުރުމާއެކު އެ ފޮށިތައް ބަންދުކުރާނީ އެ ލަސްވި ވަގުތު ހަމަވަންދެން ފުރުސަތު ދިނުމަށްފަހުގައެވެ.
ވޯޓުލުމަށް އިތުރު ވަގުތު ދިނީ ކޮން ދާއިރާތަކެއްގެ ކޮން ފޮއްޓަކަށް ކަމެއް އެ ކޯލިޝަނުން ރަސްމީކޮށް އިއުލާނެއް ނުކުރެއެވެ. އަދި ވޯޓުލުމުގެ ކަންކަން ކުރިއަށްދާ ގޮތާ ގުޅޭގޮތުން އެ ޕާޓީގެ ފަރާތުން ރަސްމީކޮށް މީޑިއާއަށް މައުލޫމާތު ދީފައެއް ވެސް ނުވެއެވެ.
އެ ޕްރައިމަރީގައި 73 ދާއިރާއަކުން 71،597 މީހުންނަށް ވޯޓުލުމުގެ ހައްގު ލިބިގެންވާ ކަމަށް އެ ކޯލިޝަނުންވަނީ ބުނެފައެވެ. އެ ދާއިރާތަކަށް 283 ކެންޑިޑޭޓުން ވާދަކުރެއެވެ.