27 Jan 2024, 21:31
ވެރިކަން ކުރާ މައި ކޯލިޝަން، ޕީޕީއެމް، ޕީއެންސީގެ ފަރާތުން ރައްޔިތުންގެ މަޖިލީހުގެ އިންތިޚާބުގައި ވާދަކުރާނެ ކެންޑިޑޭޓުން ކަނޑައަޅަން ބޭއްވި ޕްރައިމަރީގައި ކުރީގެ ގިނަ މެމްބަރުންނަށް އެ ޕާޓީގެ ޓިކެޓު ޔަގީންވެއްޖެއެވެ.
މިއަދު ހެނދުނު ވޯޓުލުން ފަށައި، ހަވީރު 17:00ގައި ވޯޓު ފޮށިތައް ބަންދުކުރަން ފަށައި، ނަތީޖާ ދެނެގަތުމުގެ މަސައްކަތް ކުރަމުން އަންނައިރު މިހާރުވަނީ ކުރީގެ ގިނަ މެމްބަރުންނަށް ޓިކެޓު ލިބިފައިވާކަން ކަށަވަރުވެފައެވެ.
ޕްރޮގްރެސިވް ކޮންގްރެސް ކޯލިޝަންގެ ޓިކެޓު ކަށަވަރުކުރެއްވި ބައެއް ބޭފުޅުންގެ ތެރޭގައި ހިމެނެނީ:
ވިލިމާލެ ދާއިރާ - ކުރީގެ މެމްބަރު މުޙައްމަދު އިސްމާއީލް
- މާފަންނު މެދު ދާއިރާ - ކުރީގެ މެމްބަރު އަސްމާ ރަޝީދު
- މާފަންނު ދެކުނު ދާއިރާ - ކުރީގެ މެމްބަރު އަބްދުﷲ ރިފާއު (ބޮޗޭ)
- އިނގުރައިދޫ ދާއިރާ - ކުރީގެ މެމްބަރު މުޙައްމަދު ފަލާހު
- މިލަންދޫ ދާއިރާ - ކުރީގެ މެމްބަރު ހަސަން މުފީދު
- ތިނަދޫ އުތުރު ދާއިރާ - ކުރީގެ މެންބަރު ސައުދުﷲ ހިލްމީ
- . ހެންވޭރު އުތުރު ދާއިރާ - މާލެ ސިޓީ ކައުންސިލްގެ މެންބަރު އަހުމަދު އައިފާން
- މާފުށީ ދާއިރާ - ހުސައިން ރިޒާ އާދަމް (ކުރިން ތުލުސްދޫ ދާއިރާއަށް ވާދަކުރެއްވި)
- ހުޅުމާލެ އުތުރު ދާއިރާ - ހުސައިން ޝަރީފް
- އަލިފުށީ ދާއިރާ - އަބްދުއްލަތީފް އަބްދުއްރަހްމާން
މިއަދު މާލޭގައި ވޯޓުލުން ކުރިއަށް ގެންދިޔައިރު ބައެއް މަރުކަޒުތަކުގައި ވަރަށް ބޮޑަށް ހަމަނުޖެހުން ވެސް ހިންގައިފައިވެއެވެ. އޭގެ ތެރޭގައި ކަލާފާނު ސްކޫލުގައި ވެސް ހަމަނުޖެހުން އުފައްދައި، އަޑުގަދަކޮށްފައިވެއެވެ.
މީގެ އިތުރުން ތާޖުއްދީން ސްކޫލު ސަރަހައްދުގައި ވެސް ހަމަނުޖެހުން އުފެދިފައިވެއެވެ.
ވޯޓު ގުނަމުން އައި ވަގުތު ވެސް ބައެއް ތަންތަނުގައި ހަަމަނުޖެހުން އުފައްދައިފައިވެއެވެ.
އެ ޕްރައިމަރީގައި 73 ދާއިރާއަކުން 71،597 މީހުންނަށް ވޯޓުލުމުގެ ހައްގު ލިބިގެންވާ ކަމަށް އެ ކޯލިޝަނުންވަނީ ބުނެފައެވެ. އެ ދާއިރާތަކަށް 283 ކެންޑިޑޭޓުން ވާދަކުރެއެވެ.
އެ ޕްރައިމަރީ ބާއްވަން ތައްޔާރުވެފައި ވަނިކޮށް، ބައެއް ކެންޑިޑޭޓުންގެ ކެންޑިޑެސީ ބަލައިނުގަންނަން ނިންމި މައްސަލަ ޕާޓީގެ ތެރޭގައި ވަރަށް ހޫނުވިއެވެ. އެގޮތުން ކެންޑިޑެސީ ބާތިލުކުރީ އެކަށިގެންވާ ވަރަށް ޕާޓީއަށް ޚިދުމަތްނުކުރާ ކަމަށް ބުނެއާއި ޕާޓީ ފިތުނަކުރަން މަސައްކަތް ކުރި ކަމުގެ ތުހުމަތުގައެވެ.
އެކަމަކު، މައްސަލަ ބޮޑުވުމުން ކޯލިޝަން ލީޑަރު ރައީސް ޑރ. މުހައްމަދު މުއިއްޒު ވަނީ ފޯމު ހުށަހެޅުއްވި ހުރިހާ ކެންޑިޑޭޓުންނަށް ޕްރައިމަރީގައި ވާދަކުރެއްވޭނެކަން އިއުލާނުކުރައްވައިފައެވެ.