28 Jan 2024, 07:35
"އަހަރެން ހުރިހާކަމަކަށް އެއްބަސްވެއްޖައިން. އަހަރެންގެ އެލިޒެތް ސަލާމަތްކޮށްދީ." ރާދިން އެއްޗެއް ނުބުނުމުން އިސް އުފުލާލާފައި ހެންރީ އަނެއްކާވެސް ބުނެލިއެވެ. ހެންރީގެ މޫނުމައްޗަށް އަރާފައިބަމުންދިޔަ އަސަރުތައް ބަލަން އިނުމަށްފަހު ރާދިން ވާހަކަ ދެއްކިއެވެ.
"ޝަރުތެއްގެ މަތިން." އަޑުގައި ހަރުކަށިކަމާއި ޔަޤީންކަން އެކުލެވޭފަދައަކުން ރާދިން ބުންޏެވެ.
"ކޮބާ ޝަރުތަކީ؟" ހިތް އަވަސްވެފައިވާ ޙާލު ހެންރީ އަހާލިއެވެ. އޭނާ ވަނީ ކޮންމެ ފަދަ ޙާލެއްގައި ވެސް އެލިޒެތްގެ ފުރާނަ ސަލާމަތް ކުރަން ބޭނުންވެފައެވެ. އެލިޒެތްއަކީ އޭނާގެ ހިތުގެ ލޯތްބެވެ. އެހިތުގެ ހަމަޖެހުމެވެ. އޭނާގެ ސަބަބުން އެލިޒެތްއަށް އެފަދަ ގެއްލުމެއް ލިބުމުގެ ޒިންމާ ނަގަން ހެންރީ ހުރީ ތައްޔާރަށެވެ. ކޮންމެ ޙާލެއްގައި ވެސް އެލިޒެތްގެ ފުރާނަ ސަލާމަތް ކުރުމަކީ މިއަދު އޭނާގެ އަޒުމެކެވެ. ކުރި ކުޑަށް އަދަބު ލިބިގަނެއްޖެނަމަ ފަހަރުގައި އެލިޒެތްވެސް އޭނާއަށް މާފުކޮށްފާނެއެވެ.
"އެއްވެސް ޙާލަތެއްގައި ކަލޭގެ ހެކިބަސް ބަދަލުކޮށްގެން ނުވާނެ." ރާދިން އޭނާގެ ޝަރުތު އިއްވާލިއެވެ. ހެންރީ ނިކަން އަވަސް އަވަހަށް ބޯ ޖަހާލިއެވެ.
"ކޮބާ އެލިޒެތް؟" އޭނަ ރާދިންއާ ސުވާލުކޮށްލިއެވެ.
"އެލިޒެތްގެ ފަރުވާގެ ކަންތައް ބަރާބަރަށް ދާނެ. ކަލޭ ހެކިބަސް ބަދަލު ނުކުރާހާ ހިނދު އެލިޒެތްއަށް ލިބެން ޖެހޭ ފަރުވާ އެންމެ ފުރިހަމައަށް ލިބޭނެ." ރާދިން ބުންޏެވެ.
ހެންރީގެ ފަރާތުން ރާދިން ބޭނުންވާ ފަދަ ޔަޤީންކަން ލިބުމުން އޭނާ ނުކުތެވެ. ނީލްއަށް ޝުކުރު އަދާކޮށްފައި ރާދިން ގޮސް ސްޓޭޝަނުން ނުކުތްއިރު މުނީރުއާ މައާލްއާ ދެމީހުން ކާރުގައި އޭނާގެ އިންތިޒާރުގައި ތިއްބެވެ. ރާދިން ކާރަށް އެރުމާއެކު ޑްރައިވަރު ކާރު ދުއްވާލިއެވެ. މުނީރު އިނީ ކުރީ ސީޓުގައެވެ. ފަހަތުގައި މައާލްއާ ރާދިންއެވެ. ރާދިން އިރުއިރުކޮޅަކާ މައާލްއަށް ބަލައިލި ނަމަވެސް، މައާލް އިނީ ބޭރަށް ނަޒަރު ހުއްޓާލައިގެންނެވެ. ރާދިން އޭނާއަށް ބަލާކަން މައާލްއަށް އެނގުނު ނަމަވެސް، އޭނާ ބެލީ އެކަން ނޭނގޭ ކަމަށް ހަދާލައިގެން އިނދެވޭތޯއެވެ. ގެއަށް ދިޔަ މަގުމަތީގައި އެކަކުވެސް ވާހަކައެއް ނުދައްކައެވެ. ކާރުތެރެއަށް ވެރިވެފައިވަނީ ހިމޭންކަމެވެ. ދައްކަން ބޭނުންވާ ވާހަކަތައް ކިތަންމެ ގިނަ ނަމަވެސް، އެއީ ކުރަން ފަސޭހަކަމަކަށް އެކަކަށްވެސް ނުވިއެވެ. ހިމޭންކަން ޚިޔާރުކުރީ އެހެންވެގެންނެވެ.
ގެއަށް ދިޔުމަށްފަހު، މައާލް އޭނާގެ ކޮޓަރިއަށް ދިޔުމުން ރާދިންއާ މުނީރާ ދެމީހުން ބޮޑުކޮޓަރީގެ ސޯފާތަކުގައި މަޑުކޮށްލިއެވެ.
"ބައްޕާ… އަޅުގަނޑު ވާހަކައެއް ބުނަން ބޭނުން." ރާދިން މުނީރަށް ބަލާލިއެވެ. މުނީރު ރާދިންއަށް ބަލާލާފައި ބޯ ޖަހާލުމުން، އޭނާ ވާހަކަ ފެށިއެވެ.
"މިކޮޅުން ފުއާދުގެ ކޭސް ނިމުނުހާ އަވަހަކަށް މާލެ ގޮސް އަޅުގަނޑު ގަސްތުމިކުރަނީ މައާލްގެ ބައްޕައާ ބައްދަލުކުރަން ދާން. އަދި އެއަށްފަހު މައާލްއަށް ހަަޤީޤަތް ކިޔައިދޭން. އެ ހިސާބަށް ދެވެންދެން ކޮންމެވެސް ގޮތަކުން މިކަންތައް މައާލްއަށް ސިއްރުކުރަން ބޭނުންވަނީ… ޝާކިރު އަންކަލްމެންގެ ވަސިއްޔަތް ފުއްދައިދޭން އަޅުގަނޑު ބޭނުން." ރާދިން އޭނާގެ ޚިޔާލެއް ފާޅުކުރިއެވެ.
"މައާލްއަށް މި ހުރިހާކަމެއް ސިއްރުކުރެވިދާނެހެން ރާދިންއަށް ހީވޭތަ؟ އެހެންވިއްޔާ ރާދިންއަށް ފެންގޮތަކަށް ތިކަމުގައި އަމަލުކުރީމަ ރަނގަޅުވާނެ. އެކަމަކު މައާލްއަށް ޝޮކެއް ލިބި، އަނެއްކާ އިހު ހުރި ޙާލަތަށް ވެއްޓޭކަށް ބައްޕަ ބޭނުމެއް ނޫން." މުނީރު ބުނެލުމާއެކު ރާދިން ބޯ ޖަހާލިއެވެ.
"އަޅުގަނޑު އިރާދުކުރެއްވިއްޔާ މައާލްއަށް ދެރަގޮތެއް ވިޔަކަ ނުދޭނަން. މައާލްގެ އަސްލު ބައްޕަ މިކޮޅަށް ގެނެވޭނެ ނަމަ އެކަންތައްވެސް ކުރަން ބޭނުން. މަައާލްއަށްޓަކާ އެވަރުކަމެއް ނުކޮށްދެވެންޏާ ކޮބާ މިހުރިހާ މުދަލަކާއި ފައިސާތަކެއްގެ ބޭނުން؟" ރާދިންގެ އަޑުގައި މަޑުމޮޅިކަން ވެއެވެ. ހަޤީގަތް މައާލްއަށް އެނގުމުން ވާނެ ގޮތް އަންދާޒާކޮށްލާކަށް އޭނާއަކަށް ނޭނގެއެވެ. އެ ވަގުތު މައާލްއާ އެންމެ ގާތުގައި ހުންނަން ރާދިން ބޭނުންވެއެވެ. އެފަދަ ވާހަކަތަކެއްގައި މުނީރާ ރާދިންއާ ދެމީހުން އެތަކެއް އިރަކު ތިއްބެވެ.
ފުއާދުގެ މައްޗަށް ބެލެކްމެއިލިންއާއި، ގަސްތުގައި މީހަކު މެރިކަމުގެ ދައުވާ ކުރެވުނު އިރު އެ ދައުވާ އޭނާގެ މައްޗަށް ސާބިތުވެސް ވިއެވެ. އޭގެ އިތުރުން ފުލުހުންނަށް ފިލަން އުޅުނު ކަމުގެ ދައުވާވެސް އޭނާގެ މައްޗަށް ސާބިތުވިއެވެ. އޭގެ އިތުރުން މައާޅްގެ ރިޕޯޓްތައް އޮޅުވާލުމުގައި ފުއާދާއި، ސްޓެފަން ބައިވެރިވިކަން ވެސް ތަހުގީގަށް ފަޅާއަރާ އެކަން ވެސް އެދެމީހުންގެ މައްޗަށް ސާބިތުވިއެވެ. ސްޓެފަންގެ މައްޗަށް ތަހުގީގު ހިންގެނީ ވަކިންނެވެ.
ޖެހިގެން އައި ހަފްތާގެ ތެރޭގައި ފުއާދުގެ މައްޗަށް ހިންގުނު ތަހުގީގު ނިންމާ ހުކުމް ކުރުމަށް ކޯޓަށް ހުށައެޅުނެވެ. ފުރަތަަމަ ދުވަހު މައާލް ކޯޓަށް ދިޔަނަމަވެސް އޭގެ ފަހުން މުޅިންވެސް ދިޔައީ މުނީރާ ރާދިންއާ ދެމީހުންނެވެ. ފަހު ދުވަހު އެތަނަށް ފުއާދުގެ ލޯބިވެރިޔާ ކެތްރީންވެސް އައެވެ. ހެންރީ ކޯޓުގައި ފުއާދާ ދެކޮޅަށް ހެކިބަސް ދިންއިރު، ފުލުހުންގެ ހެކި ތަކުގެ އަލީގައި ފުއާދު އުމުރަށް ޖަލަށް ލުމަށް ހުކުމް ކުރެވުނީ އެ ދުވަހުއެވެ.
ފުއާދުގެ ހުރިހާ ހަޤީގަތެއް ކެތްރީންއަށް އެނގުމުން އޭނާއަށް ވެސް ވަނީ ޝޮކެއް ލިބިފައެވެ. ފުއާދު އޭނާގެ ގާތުގައި ބުނެފައިވަނީ ޝާކިރުގެ ބިޒްނަސްއިން ކޮންމެ މަހަކުވެސް ވަކި ވަރަކަށް ފައިސާ ދިނުމަކީ އޭނާގެ ބައްޕަ މަރުވަމުން ކޮށްފައި ވާ ވަސިއްޔަތެއް ކަމުގައެވެ. ފުއާދު އެހާ ބައިވަރު ލާރި ހޯދަނީ ބްލެކްމެއިލްކޮށްގެން ކަމުގައި އޭނާގެ ހިތަށް ވެސް ނާރައެވެ. އެ ހަޤީގަތް އޭނާއަށްވެސް އެނގުނީ ފުލުހުން އޭނާވެސް އެ މައްސަލައިގައި ހައްޔަރުކުރި ހިސާބުންނެވެ.
ފުއާދަށް ޙުކުމް އިއްވި ދުވަހު ފުއާދުގެ ދަރިއެއްކަމަށްވާ ޝިހާދު ވެސް ލަންޑަނަށް އައެވެ. ހުރިހާ ހަޤީގަތެއް އެނގުމުން ޝިހާދުވެސް ހުރީ ހައިރާންވެފައެވެ. އޭނާ އެންމެ ދެރަވެ ރުޅިއައީ އޭނާގެ މަންމައާއި މުޅި އާއިލާ ލަންކާގައި ބައިތިއްބާފައި ފުއާދު ސިއްރު ލޯބިވެރިއެއް ގެންގުޅުނީތީއެވެ. އެ ހުރިހާ ވާހަކައެއް ޝިހާދު އޭނާގެ މަންމައަށް ކިޔައިދިނުމުން މަންމަ ނިންމީ ފުއާދުގެ ކިބައިން ވަރިވުމަށެވެ. ޝިހާދުގެ މަންމަގެ އެ ނިންމުމާ ޝިހާދާއި އޭނާގެ ދެ ކޮއްކޮވެސް ރުހި ގަބޫލުވިއެވެ.
ކޯޓުތެރޭގައި ހުރި ފުއާދު ހަޅޭއްލަވަން ފެށިއެވެ. ހީވަނީ މޮޔަވީހެންނެވެ. އޭނާ އެއިން އެއްވެސްކަމެއް ނުކުރާކަމަށް ބުނެ އޭނާ އަޑުގަދަކުރިނަމަވެސް، އޭރު ވަގުތު ފާއިތިވެއްޖެއެވެ. އޭނާގެ މައްޗަށް ޙުކުމް ކުރެވިއްޖެއެވެ. އޭނާ މީހުންގެ ތެރެއަށް ގިނަވެ އެކަނި ވެރިވެއްޖެއެވެ.
ޖެހިގެން އައި ދުވަހު، ހެންރީއާ ފުއާދު ޖަލަށް ގެންދެވުނުފަހުން ރާދިން ހެންރީއާ ބައްދަލުކުރަން ދިޔައެެވެ.
"އެލިޒެތް… ކޮބާ؟" ރާދިން ފެނުމާއެކު ހެންރީއަށް އެންމެ ފުރަތަމަ ވެސް ސުވާލުކޮށްލެވުނީ އެލިޒެތްއާ ބެހޭގޮތުންނެވެ.
"އެލިޒެތްގެ ޙާލަތަށް އިތުރު ކުރި އެރުމެއް ނާދޭ. އަހަރެމެން ވާނީ އެލިޒެތްގެ ކަންތައްތައް ބަލަން ބަޔަކާ ހަވާލުކޮށްފަ. އެމީހުން ހުރިހާކަމެއް ކޮށްދޭނެ." ރާދިން ބުނެލިއެވެ. ހެންރީ އިސްޖަހާލައިގެން އިނުމަށްފަހު ވާހަކަ ދެއްކިއެވެ.
"އަހަންނަށް މާފުކުރޭ… ރާދިންމެން ތިޔަ ކޮށްދިން ކަންތަކަށް އަހަރެން ޝުކުރުވެރިވަން. އަހަރެންގެ އެލިޒެތްއަށްޓަކައި ތިޔަ ކޮށްދިނީ ވަރަށް ވެސް ބޮޑުކަމެއް. އަހަންނަށް އެނގޭ މާޒީ އަލުން އިއާދަ ނުކުރެވޭނެކަން. އަދި އަހަރެން ކުރީ މާފުނުކުރެވޭނެ ވަރުގެ ކުށެއްކަން. އެކަމަކުވެސް އެންމެ ފަހަރަކު ޝާކިރުގެ ދަރިފުޅު ގާތުން އަހަރެން މާފަށް އެދެން ބޭނުން...... އެންމެ ފަހަރަކު..." ހެންރީގެ ދެލޮލުން ކަރުނަތައް ފައިބަން ފެށިއެވެ. ފައިސާގެ ދަހިވެތިކަމުގައި ކުރެވުނުކަމަކުން އޭނާއަށް އެވަނީ ހީވެސް ނުކުރާވަރުގެ ބޮޑު ދެރައަކާ ކުރިމަތިލާން ޖެހިފައެވެ.
"އަހަރެން ހެންރީގެ ތި ވާހަކަ މައާލްއާ ހިސާބަށް ގެންދާނަން. ދެން ދަނީ." އެހެން ބުނެލާފައި ރާދިން އެތަނުން ނުކުތެވެ. އެއަށްފަހު، ބޭރަށް ނުކުމެ "ސްޓާރ ޕެލެސް" އަށްދާން މިސްރާބުޖެހިއެވެ. ގެއާ ހިސާބަށް އާދެވުމުން ރާދިން ކާރުގެ ދުވެލި މަޑުކޮށްލިއެވެ. ދޮރު ވާނަކަށް ހުރި މީހާ ގޭޓު ހުޅުވާލަދިނުމުން ކާރު އެތެރެއަށް ވައްދާލާފައި ޕާކުކޮށްލިއެވެ. އެއަށްފަހު ދޮރު ހުޅުވާލާފައި ނުކުމެލިއެވެ. ލީ ފުންނޭވާއާއެކު ފިނިއާތްވެއް އަރައިގެން ދިޔައެވެ. ރާދިން ގޮސް ގެއަށް ވަތްއިރު، މުނީރު ޓީވީ އަޅުވައިގެން އިނެވެ. އޭނާ ގޮސް މުނީރު ކައިރިއަށް ހުއްޓިފައި، ހެންރީއާ ވާހަކަ ދެއްކިކަމުގައި ބުނެލިއެވެ.
"ކޮބާ މައާލް!" ރާދިން މުނީރާ ސުވާލުކޮށްލިއެވެ.
"މަތީގަ ވީ…" މުނީރު ޖަވާބު ދިނެވެ.
"އަޅުގަނޑު އެބަ އަންނަން." އެހެން ބުނެލާފައި ރާދިން ތެދުވީ މުނީރުގެ ހުއްދަވެސް ލިބިގެންނެވެ. އޭނާ ސިޑިން އަރައިގެން ގޮސް، މައާލްގެ ކޮޓަރީގައި ޓަކި ޖަހާލާފައި ދޮރު ހުޅުވާލިއެވެ.
"ރާދިން." މައާލް އެނދުން ތެދުވެލާ އިށީނދެލިއެވެ. ރާދިން އައިސް މައާލްގެ ކައިރީގައި އެނދުގައި އިށީންނަމުން ހެންރީގެ މެސެޖް މައާލްއަށް ރައްދުކޮށްލިއެވެ. މައާލް ވަކި އެއްޗެއް ނުބުނެއެވެ. އޭނާ އިން ގޮތަށް އިނީއެވެ.
"މިއަދު ހަވީރު ހަތަރެއް ޖަހާއިރު ޗެކަޕްއަށް ދާން ޖެހޭ ވާހަކަ ބައްޕަ ބުނި." ކަމެއް ހަނދާންވާ ފަދައަކުން ރާދިން ބުނެލިއެވެ.
"ހޫމް." މައާލް މިފަހަރުވެސް ހޫމްއެއް ލައްވާލުމުން ފިޔަވާ އިތުރު އެއްޗެއް ނުުބުނެއެވެ.
"މައާލް. އަހަންނަށް ބަލައެއް ނުލާނަންތަ؟" ރާދިންގެ އަޑުގައިވި އަސަރުން މައާލްއަށް ރާދިންއަށް ބަލައިލަން މަޖުބޫރުވެއްޖެއެވެ. މައާލް ރާދިންއަށް ބަލައިލުމާއެކު، ރާދިން މަޑުމަޑުން މައާލްގެ އަތުގައި ހިފައްޓާލިއެވެ.
"ޕްލީޒް… ލެޓް މީ…" މައާލް އަތް ދަަމައިގަންނަން އުޅުމުން ރާދިން ބުނެލިއެވެ. އޭނާ މަޑުމަޑުން މައާލްއާ ގާތްވެލާފައި ކުޑަކޮށް އެނބުރިލިއެވެ. މަޑުމަޑުން މައާލްގެ ނިތުގައި ބޮސްދީފައި ރާދިން ދުރުވެލިއެވެ. ހަޤީގަތުގައި އޭނާގެ ހިތް ނުތަވަސްވަނީއެވެ. މިހުރިހާކަމަށްފަހު ދެން ޖެހޭނީ ރާއްޖެ ދާށެވެ. އޭގެފަހުން މައާލް އޭނާއާ މައާލްގެ އެ ގުޅުމާ މެދު ނިންމާ ކޮންމެ ގޮތަކާ ރާދިން ރުހި ގަބޫލުވާނެއެވެ. މައާލް ގެއްލިދާނެކަމުގެ ބިރުވެރިކަން އެހިތުގައި އެހާ ބޮޑީ އެހެންވެގެންނެވެ. އަނގައިން ނުބުނި ނަމަވެސް، އެތަކެއް ވާހަަކައެއް ދެމީހުން ދެއްކިއެވެ. އެކަކު އަނެކަކަށްޓަކައި ވާ ތެދުވެރި ލޯބީގެ ހެއްކަމަށް އެ ދެމީހުންގެ ލޮލުގައިވާ އަސަރުތައް އެކަނިވެސް ފުދެއެވެ.
މެންދުރު ކައިގެން ރާދިންއާ މައާލްގެ އިތުރުން މުނީރުވެސް، ހޮސްޕިޓަލަށް ދާން ތައްޔާރުވެލިއެވެ. އެމީހުން ނުކުތްއިރު ޑްރައިވަރު ތައްޔާރަށް ހުއްޓެވެ. އެންމެން ކާރަށް އެރުމުން ދޮރު ލައްޕާފައި އައިސް އޭނާވެސް ޑްރައިވަރު ސީޓަށް އަރާ ކާރު ދުއްވާލިއެވެ. ހޮސްޕިޓަލަށް ދެވުމުން ތިން މީހުންވެސް ކާރުން ފައިބައިގެން ގޮސް އެތެރެއަށް ވަދެފައި ލޮލުގެ ޑިޕާރޓްމެންޓަށް ދިޔައެވެ. ކައުންޓަރުގައި އިން ކުއްޖާ ހުއްދަ ދިނުމާއެކު މައާލްއާ އެކު އެތެރެއަށް ވަނީ ރާދިންއެވެ.
ޑޮކްޓަރު ޖާމީ މައާލްގެ ލޮލުގެ ޗެކަޕް ހެދުމަށްފަހު، ހިނިތުންވެލާފައި ވާހަކަ ދެއްކިއެވެ.
"އިތުރު މައްސަލައެއް ފާހަގައެއް ނުކުރެވޭ. ސާރޖަރީއަށްފަހު ރިކަވަރ ވަމުން ދިޔަ ގޮތާ މެދު ވަރަށް ހިތްހަމަ ޖެހޭ. ދެން އިތުރު ޗެކަޕެއް އެހާ އަވަހަށް ނުހެދިޔަސް ރަނގަޅުވާނެ. " ޖޭމީ ބުނެލިއެވެ.
"ކޮން އިރަކުން ދެން އެންމެ އަވަހަށް ޗެކަޕެއް ހަދަން ޖެހޭނީ؟" ރާދިން ސުވާލުކޮށްލިއެވެ.
"އެއް އަހަރު ފަހުން ހަދާލީމަ އޯކޭ ވާނެ. އޭގެ ކުރިންވެސް އިތުރު ކަމެއް ދިމާވެއްޖެނަމަ އާދޭ." ޖާމީ ބުނެލިއެވެ.
"ތެންކިޔު." ރާދިންއާ މައާލްއާ ދެމީހުން ޖޭމީއަށް ޝުކުރު އަދާކޮށްފައި ނުުކުމެލިއެވެ. އެއަށްފަހު މުނީރަށް ޑޮކްޓަރުގެ ވާހަކަތައް ހިއްސާކުރިއެވެ. މަގުމަތީގައި ޓްރެފިކް ބޮޑުކަމުން ޑޮކްޓަރަށް ދައްކާ ނިންމާާފައި ގެއަށް އާދެވުނުއިރު ހަތެއްޖަހާ ބޮޑުވެއްޖެއެވެ. އޭރު މަޑުމަޑުން ސްނޯގެ އަސަރު ކުރަން ފަށައިފިއެވެ. ކާރުން ނުކުތުމަށްފަހު މައާލް އިރުކޮޅަކު މަޑުކޮށްލިއެވެ. ފަޒާގައި ފިނިކަން އިންތިހާއަށް ހިފާލާފައިވާއިރު، ލާ ނޭވާއާއެކު ވެސް ފިނި އާތްވެއް އަރާލައެވެ. މެހެމުންދިޔަ ސްނޯތަކަށް ބަލަހައްޓައިގެން ހުރި މައާލްއަށް އޭނާގެ މާޒީ ހަނދާންވިއެވެ. އޭނާއަކީ ފިންޏަށް ބަލި ކުއްޖެއްނަމަވެސް، ކުޑައިރުއްސުރެ ފަށައިގެން ސްނޯ އަކީ އޭނާއަށް ވަރަށް ކަމުދާ އެއްޗެކެވެ. ޝާކިރާ ފަހުމާއާއެކު ސްނޯގެ ތެރޭގައި އޭނާ ސަކަރާތްޖަހައެވެ. ބޮޑުވަމުން އައި އިރުވެސް އެ އާދައަކަށް ބަދަލެއް ނާދެއެވެ.
"މައާލް." އޭނާއަށް ސިހުނީ ރާދިންގެ އަޑު ދާދިގާތުން އިވިފައެވެ. ބޭއިޚްތިޔާރުގައި ހިނިތުންވެލައިގެން ހުރި މައާލް މޭގައި އަތް ހުރަސްކޮށްލިއެވެ.
"ހިނގާ އެތެރެއަށް." ރާދިން ބުނެލިއެވެ.
"ވިންޓަ ފެށުމާއެކު ސްނޯ ވޭހެނެ އިރަކަށް އަހަންނަށް އަބަދުވެސް އިންތިޒާރުކުރެވޭ. ރާދިންއަށް އެނގޭތަ؟ އެ ބިއްލޫރިގަނޑުގެ ކައިރީގައި އިނދެގެން އަހަރެން ސްނޯ ވެހޭނެ އިރަކަށް އިންތިޒާރުކުރަން." ބޭރު ފެންނަ ގޮތަށް ބޮޑު ކޮޓަރީގައި ހުރި ބިއްލޫރި ގަނޑަށް އިޝާރާތްކޮށްލާފައި މައާލް ވާހަކަ ދެއްކިއެވެ. މަޑުމަޑުން އޭނާ ރާދިންއާ އެކު ހިނގައިގަތްއިރު، އެވާހަކަތައް ރާދިންއާ ހިއްސާކުރަން އެހާ ބޭނުންވީ ކީއްވެކަމެއް މައާލްއަކަށް ނޭނގުނެވެ. މައާލްގެ ހިނިތުންވުން ފެނި ރާދިންއަށް ވެސް ބޭއިޚްތިޔާރުގއި ހިނިތުންވެވުނެވެ.
އެރޭވެސް ރާދިން މަޑުކުރީ "ސްޓާރ ޕެލެސް"ގައެވެ. ޖެހިގެން އައި ދުވަހުގެ ހެނދުނު ނާސްތާގެ ވަގުތު، މައާލްއާ ރާދިންއަށް ބަލާލަމުން މުނީރު ވާހަކަ ދެއްކިއެވެ.
"މިކޮޅުގެ ހުރިހާކަމެއް ނިމުނީ ދޯ. އެހެންވީމަ ރާއްޖެ ދާން ބައްޕައަށް ފެންނަނީ." މުނީރުގެ ވާހަކައާއެކު ރާދިންއަށް މައާލްއަށް ބަލައިލެވުނެވެ.
(ނުނިމޭ)