27 Jan 2024, 18:11
ވެރިކަން ކުރާ މައި ކޯލިޝަން، ޕީޕީއެމް، ޕީއެންސީގެ ފަރާތުން ރައްޔިތުންގެ މަޖިލީހުގެ އިންތިޚާބުގައި ވާދަކުރާނެ ކެންޑިޑޭޓުން ކަނޑައަޅަން މިއަދު ހެނދުނު ފެށި އެ ޕާޓީގެ އެތެރޭގެ އިންތިޚާބުގެ ވޯޓުލުމުގެ ވަގުތު ހަމަވެ ގިނަ ފޮށިތަކެއް ބަންދުކޮށްފިއެވެ.
ޕްރޮގްރެސިވް ކޮންގްރެސް ކޯލިޝަންގެ މި ޕްރައިމަރީގެ ވޯޓުލުން މިއަދު ހެނދުނު ފެށި، ވޯޓުގެ ކިއުތައް ބަންދުކުރަން ކަނޑައަޅައިފައިވާ ރަސްމީ ގަޑިއަކީ ހަވީރު 17:00އެވެ.
ނަމަވެސް ލަހުން ވޯޓުލުން ފެށުނު ފޮށިތައް ހުރުމާއެކު އެ ފޮށިތައް ބަންދުކުރާނީ އެ ލަސްވި ވަގުތު ހަމަވަންދެން ފުރުސަތު ދިނުމަށްފަހުގައެވެ.
ޕީޕީއެމް/ޕީއެންސީ މަޖިލިސް ޕްރައިމަރީ ވޯޓުލުމުގެ ތެރެއިން: މި ޕްރައިމަރީގައި 17،000 މީހުންނަށް ވޯޓުލެވޭ -- ސަން ފޮޓޯ: އިންފިނިޓް މޮމެންޓްސް/ މުހައްމަދު މާވީ
ވޯޓުލުމަށް އިތުރު ވަގުތު ދިނީ ކޮން ދާއިރާތަކެއްގެ ކޮން ފޮއްޓަކަށް ކަމެއް އެ ކޯލިޝަނުން ރަސްމީކޮށް އިއުލާނެއް ނުކުރެއެވެ. އަދި ވޯޓުލުމުގެ ކަންކަން ކުރިއަށްދާ ގޮތާ ގުޅޭގޮތުން އެ ޕާޓީގެ ފަރާތުން ރަސްމީކޮށް މީޑިއާއަށް މައުލޫމާތު ދީފައެއް ވެސް ނުވެއެވެ.
ވޯޓުފޮށިތައް ބަންދުކުރަންވީ ގަޑިއާ ގުޅޭގޮތުން ވެސް ބައެއް މަރުކަޒުތަކުގައި ހަމަނުޖެހުން ހިނގައިފައިވެއެވެ.
މިއަދު މާލޭގައި ވޯޓުލުން ކުރިއަށް ގެންދިޔައިރު ބައެއް މަރުކަޒުތަކުގައި ވަރަށް ބޮޑަށް ހަމަނުޖެހުން ވެސް ހިންގައިފައިވެއެވެ. އޭގެ ތެރޭގައި ކަލާފާނު ސްކޫލުގައި ވެސް ހަމަނުޖެހުން އުފައްދައި، އަޑުގަދަކޮށްފައިވެއެވެ.
މީގެ އިތުރުން ތާޖުއްދީން ސްކޫލު ސަރަހައްދުގައި ވެސް ހަމަނުޖެހުން އުފެދިފައިވެއެވެ.