27 Jan 2024, 17:15
ތަހުގީގީ އިދާރާއަކުން ކަންތައްކުރި ގޮތާމެދު އޮންލައިންކޮށް ޝަކުވާ ހުށަހެޅޭ ނިޒާމެއް ޕްރޮސިކިއުޓާ ޖެނެރަލް (ޕީޖީ) އޮފީހުން ތައާރަފުކޮށްފިއެވެ.
ޕީޖީ ޙުސައިން ޝަމީމް މިއަދު ކުރެއްވިބްލޮގް ޕޯސްޓެއްގައިވިދާޅުވީ، މީހަކު ޖިނާއީ މައްސަލައެއް ތަހުގީގީ އިދާރާއަކަށް ހުށަހެޅުމުން، އެ އިދާރާއިން އެމައްސަލަ ބަލާގޮތާމެދު ހިތްހަމަނުޖެހޭނަމަ އެކަން ބަލައިދިނުމަށް އެދި ޕީޖީއަށް ޝަކުވާއެއް ހުށަހެޅިދާނެކަމަށް ޖިނާއީ އިޖުރާއަތުގެ ގާނޫނުގައި އޮންނަ ކަމަށެވެ. އެގޮތުން ރާއްޖޭގެ ޖިނާއީ އަދުލުގެ ނިޒާމު އޮންނަ ގޮތުން ޕްރޮސިކިއުޓާ ޖެނެރަލަކީ ތަހުގީގީ އިދާރާތައް މަސައްކަތްކުރާގޮތް ބަލައި، ފާރަވެރިވުމުގެ ޒިންމާއެއް އޮތް މީހެއް ކަމަށް ބްލޮގްގައިވެއެވެ.
ޝަމީމް ވިދާޅުވީ މިއަދު ތައާރަފުކުރި ނިޒާމާއެކު، ޕީޖީ އޮފީހުގެ އޮންލައިން ޕޯޓަލުގައި ޝަކުވާ ހުށަހަޅާ ޓެބެއް ފެންނާނެ ކަމަށެވެ. އެ ޓެބްގައި ޝަކުވާއެއް ހުށަހަޅަން ފިތާލުމުން، ފޯމެއް ފެންނާނެ ކަމަށާއި އެފޯމުގެ ގިނަ، އާންމު ބައިބައި ހުންނާނީ ފުރާފައި ކަމަށް އޭނާ ވިދާޅުވިއެވެ.
"ޝަކުވާ ހުށަހަޅާ މީހާ ކުރަންޖެހޭނީ ދެކަމެކެވެ. އޭނާގެ ޝަކުވާއަކީ ކޮބައިކަމާއި، އޭނާ ތަޙްޤީޤީ އިދާރާއަށް ހުށަހެޅި ލިޔުމުގެ ކޮޕީއެއް އަޕްލޯޑުކުރުމާ މިދެކަމެވެ. އެލިޔުން ބޭނުންވަނީ، މައްސަލައެއް ހުށަހެޅުނުކަން ޔަޤީންކުރަންޖެހޭތީއެވެ." ބްލޮގްގައިވެއެވެ.
ޝަމީމް ވިދާޅުވީ އެ ފޯމު ހުށަހެޅުމުން، އެފޯމު، އޮފީހުގެ ނިޒާމުގެ ތެރެއަށް އޮޓޮމެޓިކުން އެންޓްރީވާނެ ކަމަށެވެ. ޝަކުވާ ފޯމު ސީދާ ގޮސް ލިބޭނީ އެމައްސަލައެއް ބެލުމާ ހަވާލުވެ ހުރި ޕްރޮސިކިއުޓަރުގެ ސްކްރީނަށް ކަމަށާއި އޭނާ އެޝަކުވާ ފޯމު ކިޔުމަށްފަހު، ޖަވާބުދޭނެކަމަށް އަންދާޒާކުރާ ދުވަހެއް ކަނޑައަޅަންޖެހޭނެ ކަމަށް ޝަމީމް ވިދާޅުވިއެވެ.
އެ ނިޒާމު ފަރުމާކޮށްފައިވާ ގޮތުން، ޕްރޮސެކިއުޓަރަށް އެ ސްކްރީނުން އެހެން ސްކްރީނަކަށް، ނުވަތަ އެހެން މަސައްކަތަކަށް ދެވޭނީ، ޖަވާބުދޭނެ ދުވަހެއް ލިޔުމަށްފަހު ކަމަށާއި ޖަވާބުދޭނެ ދުވަހެއް ނޯޓުކުރާ ވަގުތު، ޝަކުވާ ހުށަހެޅި މީހާއަށް މެސެޖެއް ލިބޭނެކަން ޝަހީމް ފާހަގަކުރެއްވިއެވެ.
"މިވެނި ޕްރޮސިކިއުޓަރަކު، އޭނާ ހުށަހެޅި ޝަކުވާ ބަލަމުންދާކަމަށާއި، މިވެނި ދުވަހެއްގައި ޖަވާބެއް ލިބޭނޭކަމަށް އިންތިޒާރުކުރުމަށް، އެ މެސެޖުގައި އޮންނާނެއެވެ. އެމެސެޖުގައި ބުނާ ދުވަހުގެ ކުރިއަށް، އިރާދަކުރެއްވިއްޔާ ޖަވާބު ދޭނެއެވެ." ބްލޮގްގައިވެއެވެ.
ޝަމީމް ވިދާޅުވީ އެއަށްފަހު، ޖަވާބު ތައްޔާރުވުމާއެކުވެސް، ޝަކުވާ ހުށަހެޅި މީހާއަށް މެސެޖެއް ލިބޭނެ ކަމަށާއި ޝަކުވާ ހުށަހަޅާކަށްވެސް، ޖަވާބު ހޯދާކަށްވެސް އެއްވެސް ތަނަކަށް ދާކަށް ނުޖެހޭނެ ކަމަށެވެ. އެގޮތުން އޮންލައިން ޕޯޓަލްގެ ތެރެއިން، އެމީހަކު މިހާތަނަށް ޕީޖީ އޮފީހާ ކުރި ހުރިހާ މުޢާމަލާތުތަކެއް، ހުށަހެޅި ފޯމުތަކާއި އެފޯމުތަކަށް ދީފައިވާ ޖަވާބުތައްވެސް ފެންނަން ހުންނާނެ ކަމަށް އޭނާ ވިދާޅުވިއެވެ.
މީގެ އިތުރުން، މިވަގުތު ހަމައެކަނި ޝަކުވާ ފޯމަށް މެސެޖު ދާގޮތް ހެދި ނަމަވެސް، ކައިރި މުސްތަގުބަލެއްގައި، ޕީޖީ އޮފީހަށް ފޮނުވާ ކޮންމެ ސިޓީއަކަށްވެސް، އެސިޓީ ފޮނުވި މީހަކަށް، ސިޓީއާ ހަވާލުވެހުރި މީހެއްގެ މަޢުލޫމާތާއި، ޖަވާބުލިބޭނެކަމަށް އަންދާޒާކުރާ ދުވަހުގެ މައުލޫމާތު ފޯރުކޮށްދޭގޮތް ހަދާނެ ކަމަށް ޝަމީމް ވިދާޅުވިއެވެ. އެ ޓެކްނޮލޮޖީ ޕީޖީ އޮފީހަށް މިހާރު ލިބިފައިވާކަން އޭނާ ފާހަގަކުރެއްވިއެވެ.
ޝަމީމް ވިދާޅުވީ މި ބަދަލުތައް ގެނައުމުގެ މަގުސަދަކީ ޕީޖީ އޮފީސް، ލަގްޒަރީ ޕަބްލިކް ސާވިސްއަކަށް ހެދުން ކަމަށެވެ.