27 Jan 2024, 16:45
ކުރިއަށް އޮތް ރައްޔިތުންގެ މަޖިލީހުގެ އިންތިޚާބުގައި ވެރިކަން ކުރާ ޕީޕީއެމް، ޕީއެންސީގެ އަމާޒަކީ ސުޕަމެޖޯރިޓީ ހޯދުން ކަމަށާއި މަދުވެގެން 62 ގޮނޑި ލިބޭނެ ކަމަށް ރައީސް ޑރ. މުޙައްމަދު މުއިއްޒު މިއަދު ވިދާޅުވެއްޖެއެވެ.
ޕީޕީއެމް، ޕީއެންސީގެ ޕްރައިމަރީގައި ވޯޓުލުން ކުރިއަށްދާ ގޮތް ބެއްލެވުމަށް ވަޑައިގަން ނޫސްވެރިންނާ ވާހަކަދައްކަވަމުން ރައީސް ވިދާޅުވީ މި ސަރުކާރުން ރައްޔިތުންނަށްކޮށްދޭ ކަންކަން ރައްޔިތުން ބަލައިގަންނަ ކަމަށާއި ސަރުކާރަށް ތާއިދު އޮތް ކަމަށެވެ. އަދި މީގެ ކުރިން ޕާޓީ ޕްރައިމަރީއަށް ފަހު، ބައިބައިވުން އުފެދި، ބައެއް މެންބަރުން މިނިވަންކޮށް ވާދަކުރަން ދާ ނަމަވެސް މިފަހަރު ތަފާތު ވާނެ ކަމަށް ގަބޫލުކުރެެއްވޭ ކަމަށް އެ މަނިކުފާނު ވިދާޅުވިއެވެ.
"މިފަހަރު އުއްމީދުކުރަނީ ކުރީގައި އެފެނުނު މަންޒަރުތައް ނުފެންނާނެ ކަމަށް، ވަރަށް ބޮޑަށް ގަބޫލުކުރެވޭ އެންމެންވެސް ހަމަ ގައުމު އިސްކޮށްގެން ޕާޓީގެ މަސްލަހަތުގައި ގައުމު އިސްކޮށްގެން އެކަތިގަނޑަކަށް ވާނެ ކަމަށް ވަރަށް ގަބޫލުކުރެވޭ،" ރައީސް ވިދާޅުވިއެވެ.
ޕްރައިމަރީއާ ދިމާކޮށް ޕީޕީއެމް، ޕީއެންސީގެ ދަފުތަރަށް ބަދަލުގެނެސްފައިވާ ކަމަށް ކުރެވޭ ތުހުމަތުތަކާ ގުޅިގެން އެ މަނިކުފާނު ވިދާޅުވީ އެފަދަ ކަމެއް ކުރާނެ ކަމަށް ގަބޫލުނުކުރެވޭ ކަމަށެވެ. އަދި ބައެއް ފަރާތްތަކުން ރަނގަޅަށް ބަލަންވާ ވަރަށް ނުބަލައި އެފަދަ ޝަކުވާ ކުރާ ކަމަށް ވެސް ރައީސް ވިދާޅުވިއެވެ.
ޕީޕީއެމް، ޕީއެންސީ ޕްރައިމަރީގެ ވޯޓުލުން ރައީސް ޑރ. މުޙައްމަދު މުއިއްޒު ބައްލަވައިލެއްވުން: އެ މަނިކުފާނު ވިދާޅުވީ މަޖިލިސް އިންތިޚާބުގައި ކޯލިޝަނަށް މަދުވެގެން 62 ގޮނޑި ލިބި، ސުޕަމެޖޯރިޓީ ލިބޭނެ ކަމަށް -- ސަން ފޮޓޯ: އިންފިނިޓް މޮމެންޓްސް/ މޫސާ ނަދީމް
"އަޅުގަނޑުމެން ބޭނުންވަނީ ފްރީ އެންޑް ފެއާ އިލެކްޝަނެއް ބާއްވަން. ދެން ތުހުމަތެއް ޝަކުވާއެއް އޮތިއްޔާ ހުށަހަޅައިގެން، ވަރަށް ދެފުށްފެންނަ ގޮތަށް އެންމެންނަށް ވެސް ހަމަހަމަކޮށް އަޅުގަނޑުމެން އެކަމެއް ބަލައިދޭނަން،" ރައީސް ވިދާޅުވިއެވެ.
މި ޕްރައިމަރީގައި 71،000 މީހުންނަށް ވޯޓުލެވޭކަން ފާހަގަކުރައްވައި ރައީސް ވިދާޅުވީ، ވޯޓުލުން ކުރިއަށްދަނީ ވަރަށް ފޯރިގަދަކޮށް ކަމަށެވެ. އަދި ހަމަނުޖެހުންތަކެއް ހިނގި ނަމަވެސް އެކަން ހައްލުވެ، ޕްރައިމަރީ ސުލްހަވެރިކޮށް ކުރިއަށްދާ ކަމަށް އެ މަނިކުފާނު ވިދާޅުވިއެވެ.
އެ ޕްރައިމަރީގައި 227 ވޯޓު ފޮށި ބަހައްޓާފައިވާއިރު، 73 ދާއިރާއަކުން 283 ކެންޑިޑޭޓުން ވާދަކުރެއެވެ.
ކުރިއަށް އޮތް މަޖިލިސް އިންތިޚާބު އަންނަ މާޗު މަހުގެ 17އަށް ތާވަލުކޮށްފައިވާއިރު، އެ އިންތިޚާބުގައި 93 މެންބަރުން ހޮވާނެއެވެ. އެހެންކަމުން، ސުޕަމެޖޯރިޓީ ނުވަތަ ތިންބައިކުޅަ ދެބައި ލިބޭނީ 62 މެންބަރުން އިންތިޚާބުވުމުންނެވެ.