27 Jan 2024, 22:49
ޣައިރު މުސްލިމު ޑިޕްލޮމެޓުންނަށް ހާއްސަކޮށް ސައުދީ އަރަބިޔާގައި ރާ ވިއްކުން ހުއްދަކުރަން ނިންމައިފިއެވެ.
ބީބީސީން ރިޕޯޓުކޮށްފައިވާ ގޮތުގައި 70 އަހަރަށްވުރެ ގިނަ ދުވަސް ފަހުން ރާ ވިއްކުން ހުއްދަ ދެނީ ސައުދީގެ ވެރިރަށް ރިޔާދުގައެވެ.
ސައުދީއަކީ ރާ ގަނެވިއްކުމުގައި ހަރުކަށި އުސޫލުތަކެއް ގެންގުޅޭ ގައުމެކެވެ. ރާ ގަނެވިއްކުން ސައުދީގައި ގާނޫނަކުން މަނާކުރީ 1952 ވަނަ އަހަރެވެ. އެގޮތަށް މަނާކުރީ ސައުދީގެ އޭރުގެ ރަސްގެފާނު އަބްދުލްއަޒީޒް ރަސްގެފާނުގެ ދަރިކަލުންގެ ތެރެއިން ދަރިކަލަކު މަސްތުވެގެންހުރެ އިނގިރޭސި ޑިޕްލޮމެޓެއްގެ ގަޔަށް ބަޑިޖަހައި އަވަހާރަކޮށްލުމާ ގުޅިގެންނެވެ.
އައު ހުއްދައިގެ ދަށުން ރާވިއްކާ ފިހާރަ ހުޅުވާނީ ރިޔާދުގައެވެ. އެ ފިހާރައިން ޚިދުމަތް ހޯދާ ކަސްޓަމަރުން ފުރަތަމަ ޖެހޭނީ މޮބައިލް އެޕެއް މެދުވެރިވެގެން ރަޖިސްޓްރީ ކުރުމަށް ފަހު ސައުދީގެ ޚާރިޖީ ވުޒާރާގެ ކްލިއަރެންސް ކޯޑެއް ހޯދާށެވެ.
އަދި ކޮންމެ މީހަކަށް ވެސް މަހެއްގެ މައްޗަށް ރާ ގަނެވޭނީ ކަނޑައެޅިފައިވާ ވަކި މިންވަރަކަށްކަމަށް ބީބީސީން ރިޕޯޓުކުރެއެވެ. އެ ފިހާރަ ހުންނާނީ ރިޔާދުގައި އެމްބަސީތަކާއި ޑިޕްލޮމެޓުން ދިރިއުޅޭ ސަރަހައްދެއް ކަމަށްވާ ރިޔާދުގެ ޑިޕްލޮމެޓިކް ކުއާޓާގައެވެ.
މުސްލިމް ނޫން ޑިޕްލޮމެޓުންނަށް މީގެކުރިން ރާ ގެނައުން ހަމައެކަނި ހުއްދަ އޮންނަނީ ޑިޕްލޮމެޓިކް ބޭނުމަށް އެއްޗެހި އެތެރެކުރާ އުސޫލުގެ ތެރެއިން ގެނައުމަށެވެ.
ރާ ވިއްކުން ހުއްދަކުރަން ސައުދީން އަލުން ނިންމީ ވިޔަފާރިއަށާއި ފަތުރުވެރިކަމަށް ސައުދީ ހުޅުވައިލުމަށް ސައުދީގެ ވަލީއަހުދު މުހައްމަދު ބިން ސަލްމާން ކުރައްވަމުން އަންނަ މަސައްކަތްތަކުގެ ތެރެއިންކަމަށް މީޑިއާ ރިޕޯޓުތައް ބުނެއެވެ.
އޭގެ އިތުރުން އެއީ ހަމައެކަނި ތެލަށް ބަރޯސާނުވެ، ސައުދީގެ އިގުތިސާދު ބިނާ ކުރުމަށް ގެންގުޅޭ 'ވިޝަން 2030' ގެ ދަށުން އެޅި ފިޔަވަޅެއް ކަމަށް ވެސް ރިޕޯޓުތައް ބުނެއެވެ.