27 Jan 2024, 14:36
ރާއްޖޭގެ ގައުމީ ބޭންކް، ބޭންކް އޮފް މޯލްޑިވްސް (ބީއެމްއެލް)އިން ދާދި ފަހުން ވަކިކުރި ޑިރެކްޓަރުންގެ ތެރެއިން ދެ ޑިރެކްޓަރަކު އަލުން މަގާމަށް އައްޔަންކޮށްފިއެވެ.
ބީއެމްއެލްގެ ހުރިހާ ނޮންއެކްޒެކެޓިވް މެންބަރުން މިދިޔަ ހަފުތާގައި ވަނީ މަގާމުން ވަކިކޮށްފައެވެ.
"ސަން"އަށް މައުލޫމާތު ލިބިފައިވާ ގޮތުގައި ބީއެމްއެލް ބޯޑަށް މެންބަރުން އަލުން އައްޔަން ކުރުމުގެ މަސައްކަތް މިހާރު ވަނީ ފަށައިފައެވެ. އެގޮތުން ކުރިން ވަކިކުރި ދެ ޑިރެކްޓަރަކު މިހާރު ވަނީ މަގާމަށް އަލުން އައްޔަންކޮށްފައި ކަމަށް މައުލޫމާތު ލިބިފައިވެއެވެ.
ބީއެމްއެލްގެ ހިންގާ ގަވާއިދުގައިވާ ގޮތުން، ބޯޑް މެންބަރުން ވަކިކުރުމާއި އައްޔަންކުރުމުގެ މަސައްކަތްތައް ކުރަނީ ޖެހެނީ އަހަރީ އާންމު ޖަލްސާއެއްގައި ނުވަތަ ޚާއްޞަ އާންމު ޖަލްސާއެއްގައެވެ.
ނަމަވެސް، އެފަދަ ޖަލްސާއެއް ބޭއްވުމަށް މިހާތަނަށް ތާވަލުކޮށްފައިނުވާ ކަމަށް "ސަން"އަށް މައުލޫމާތު ލިބިފައިވެއެވެ.
ބީއެމްއެލްއިން ވަކި ކޮށްފައިވާ މެންބަރުންގެ ތެރޭގައި ޗެއާޕާސަން ޔޫޝަޢު ސަޢީދު ހިމެނޭ ކަމަށް މައުލޫމާތު ލިބިފައިވެއެވެ.
އެ މެންބަރުން ވަކިކުރީ، ބީއެމްއެލްގެ ކާޑު މެދުވެރިކޮށް ރާއްޖެއިން ބޭރުގައި ކިޔަވާ ދިވެހި ދަރިވަރުންނަށް އަންނަ މަހުން ފެށިގެން މަހަކު ޑޮލަރު ނެގޭ ލިމިޓު 1200 ބޮޑުކުރަން ނިންމާފައިވާ ދަނޑިވަޅެއްގައެވެ. އަދި، މިމަހުގެ ތެރޭގައި ޑޮލަރު ލިބުމުގައި ދަތިތަކެއް ކުރިމަތިވެ އިންޓަނޭޝަނަލް ޓްރާންސްފާ (ޓީޓީ)ތަކަށް ޑޮލަރުން ފައިސާ ހަމަޖައްސަން ދަތިވެފައިވާތީ ބައެއް ވިޔަފާރިވެރިން ކަންބޮޑުވުން ފާޅުކޮށްފައި ވަނިކޮށެވެ.