27 Jan 2024, 12:00
އެމެރިކާގެ ދާއިމީ އެމްބަސީއެއް ރާއްޖޭގައި ހުޅުވުމާ ގުޅުންހުރި މަޝްވަރާތައް ކުރުމަށް، އެގައުމުގެ ސްޓޭޓް ޑިޕާޓްމެންޓު ސައުތު އެންޑް ސެންޓްރަލް އޭޝިއަން އެފެއާސްގެ އެސިސްޓެންޓް ސެކްރެޓަރީ ޑޮނަލްޑް ލޫ ރާއްޖެ ވަޑައިގަންނަވާނެކަން އިއުލާންކޮށްފިއެވެ.
އެމެރިކާގެ ސްޓޭޓް ޑިޕާޓްމެންޓުން ނެރުނު ބަޔާނެއްގައިވާ ގޮތުން ލޫ، އަންނަ ބުދަ ދުވަހާ ހަމައަށް އިންޑިއާއާއި ރާއްޖެއަށް ދަތުރުފުޅެއް ކުރެއްވުމަށް ވަނީ ހަމަޖެހިފައެވެ.
އޭނާ އިންޑިއާއަށް ކުރައްވާ ދަތުރުފުޅު އިއްޔެ ފައްޓަވާފައިވާ ކަމަށާއި، ނިއު ދިއްލީގައި އޮންނަ އިންޑިއާ-ޔޫއެސް ފޯރަމްގައި އެމެރިކާގެ ޑެލިގޭޝަންގައި އިސްކޮށް ހުންނަވާނީ އޭނާ ކަމަށް ސްޓޭޓް ޑިޕާޓްމެންޓުގެ ބަޔާނުގައިވެއެވެ.
އެ ޑެލިގޭޝަނުން އިންޑިއާ ސަރުކާރުގެ އޮފިޝަލުންނާއި ޕްރައިވެޓް ސެކްޓާގެ މެންބަރުންނާއި ތައުލީމީ ދާއިރާއާއި މީޑިއާއާ ބައްދަލުކޮށް، ދެ ގައުމުން ގުޅިގެން ކުރެވޭނެ މަސައްކަތްތަކާ ގުޅޭ ގޮތުން މަޝްވަރާ ކުރާނެ ކަމަށް އެ ބަޔާނުގައިވެއެވެ.
އެއަށްފަހު ލޫ އާއި އެމެރިކާގެ ޑެލިގޭޝަން ރާއްޖެ ވަޑައިގެން، ދިވެހި އޮފިޝަލުންނާ ބައްދަލުކުރައްވާނެ ކަަމަށް ސްޓޭޓް ޑިޕާޓްމެންޓުން ބުންޏެވެ. އެ ބައްދަލުވުންތަކުގައި ވެސް ދެ ގައުމުން ގުޅިގެން ކުރާ މަސައްކަތްތައް އިތުރުކުރުމާ ގުޅޭ ގޮތުން މަޝްވަރާކޮށް، މާލޭގައި އެމެރިކާގެ ދާއިމީ އެމްބަސީއެއް އެޅުން އަވަސްކުރުމަށް ވާހަކަ ދައްކާނެ ކަމަށް އެ ބަޔާނުގައިވެއެވެ.
މީގެ އިތުރުން އެ ޑެލިގޭޝަނުން މަދަނީ ޖަމިއްޔާގެ މެންބަރުންނާއި މަތީ ތައުލީމުގެ ދާއިރާގެ އޮފިޝަލުންނާ ބައްދަލުކުރާނެ ކަމަށް ސްޓޭޓް ޑިޕާޓްމެންޓުން ބުންޏެވެ.
އެމެރިކާގެ ވެރިރަށް ވޮޝިންޓަންގައި ރާއްޖޭގެ އެމްބަސީއެއް މިދިޔަ ޖޫން މަހުގެ 17ގައި އަލުން ވަނީ ހުޅުވައިފައެވެ.
އޭގެ ކުރިން 2007 ވަނަ އަހަރު ރާއްޖޭގެ އެމްބަސީއެއް އެމެރިކާގައި ހިންގި ނަމަވެސް 2008 ވަނަ އަހަރު އެ އެމްބަސީވަނީ ބަންދުކޮށްފައެވެ.