27 Jan 2024, 11:12
ވެރިކަން ކުރާ ޕީޕީއެމް/ޕީއެންސީ ކޯލިޝަންގެ ރައްޔިތުންގެ މަޖިލީސް ޕްރައިމަރީގެ ވޯޓުލުން ހެނދުނު ފަށައިފިއެވެ.
އެ ޕްރައިމަރީގައި 73 ދާއިރާއަކުން 71،597 މީހުންނަށް ވޯޓުލުމުގެ ހައްގު ލިބިގެންވާ ކަމަށް އެ ކޯލިޝަނުންވަނީ އިއްޔެ ބުނެފައެވެ.
ޕީޕީއެމް/ޕީއެންސީގެ އިސް ތަރުޖަމާނު ހީނާ ވަލީދު އިއްޔެ ވިދާޅުވީ، ޕްރައިމަރީގެ ވޯޓުލުން މިއަދު ހެނދުނު 10:00 އިން ފެށިގެން ހަވީރު 17:00 އާ ހަމައަށް ކުރިއަށް ގެންދަން ނިންމާފައިވާ ކަމަށެވެ.
ޕީޕީއެމް/ޕީއެންސީ ޕްރައިމަރީ: ހެންވޭރު ދަނޑުގައި ބައެއް ވޯޓު ފޮށިތަކުގެ ވޯޓުލުން ގަޑިއަށް ނުފެށުނު -- ސަން ފޮޓޯ: އިންފިނިޓް މޮމެންޓްސް/ މުހައްމަދު މާވީ
މި ޕްރައިމަރީއަށް ރާއްޖޭގެ އެކި ކަންކޮޅުތަކުގައި 227 ވޯޓު ފޮށި ބަހައްޓަން ވަނީ ނިންމައިފައެވެ.
އެގޮތުން، މާލޭގައި އަތޮޅުތަކުގެ ފޮށިތައް ހެންވޭރު ފުޓުބޯޅަ ދަނޑުގައި ބަހައްޓާފައިވާއިރު، ކަލާފާނު ސްކޫލާއި ޖަމާލުއްދީން ސްކޫލާއި ތާޖުއްދީން ސްކޫލާއި ވިލިމާލޭ ޔޫތު ސެންޓަރުގެ އިތުރުން، ހުޅުމާލޭ ކާމިލްދީދީ ސްކޫލާއި ރެހެންދި ސްކޫލުގައި ވެސް ވޯޓުފޮށިތައް ބަހައްޓާފައިވެއެވެ.
ފާހަގަކޮށްލެވޭ ގޮތުގައި އެ ކޯލިޝަނުން ވަނީ ރައްޔިތުންގެ މަޖިލީހުގެ މެންބަރުންގެ ގޮތުގައި މިހާރު ވެސް ތިއްބެވި އެމްޑީއޭގެ ރައީސް އަހުމަދު ސިޔާމް މުހައްމަދާއި ޖުމްހޫރީ ޕާޓީގެ ލީޑަރު ގާސިމް އިބްރާހިމާއި އެމްއެންޕީގެ ރައީސް މުހައްމަދު ނާޒިމަށް އިޚުތިރާމު ކުރެއްވުމުގެ ގޮތުން އެ ތިން ބޭފުޅުން ވާދަކުރައްވައި ދާއިރާއަށް ކެންޑިޑޭޓުން ނުނެރޭން ނިންމައިފައެވެ.
ހަމައެހެންމެ، އެންމެ ކެންޑިޑޭޓަކު ވާދަކުރުމުގެ ސަބަބުން 13 ބޭފުޅަކަށް ޕީއެންސީގެ ޓިކެޓު ވަނީ ޕްރައިމަރީއަކައިނުލާ ކަށަވަރުވެފައެވެ. އެއީ:
ހޯރަފުށީ ދާއިރާ: އަލީ މޫސާ
- ބާރަށު ދާއިރާ: ޕީއެންސީގެ ނައިބު ރައީސް އިބްރާހީމް ޝުޖާއު
- ހަނިމާދޫ ދާއިރާ: އިދުރީސް އަބްދުﷲ
- އޭދަފުށީ ދާއިރާ: މިހާރުގެ ވެސް މެންބަރު އަހްމަދު ސަލީމް
- މަހިބަދޫ ދާއިރާ: މިހާރުގެ ވެސް މެންބަރު އަހްމަދު ޠާރިގު
- ނިލަންދޫ ދާއިރާ: ފާތިމަތު ސައުދާ
- ތިމަރަފުށީ ދާއިރާ: އިބްރާހިމް ސަނާހް
- ފޮނަދޫ ދާއިރާ: ޕީއެންސީގެ ޗެއާޕާސަން އަބްދުއްރަހީމް އަަބްދުﷲ
- ހިތަދޫ މެދު ދާއިރާ: ނޫސްވެރިޔާ އަހްމަދު އަޒާން މަރްޒޫގް
- ހުޅުދޫ ދާއިރާ: ކުރީގެ މެމްބަރު މުޙައްމަދު ޝާހިދު (ޝާޑު)
- ގަލޮޅު ދެކުނު ދާއިރާ: އިބްރާހިމް މުޙައްމަދު
- ހެންވޭރު ހުޅަނގު ދާއިރާ: އަލީ އިބްރާހިމް
- ހުޅުމާލެ މެދު ދާއިރާ: އަބްދުﷲ ޝަޒީމް
ފާހަގަކޮށްލެވޭ ގޮތުގައި ޕީއެންސީން ފުރަތަމަ ވަނީ ބައެއް ކެންޑިޑޭޓުންގެ ކެންޑިޑެސީ ބަލައިނުގަންނަން ނިންމައިފައެވެ. އެގޮތުން، އެކަށިގެންވާ ވަރަށް ޕާޓީއަށް ޚިދުމަތްނުކުރާ ކަމަށް ބުނެއާއި ޕާޓީ ފިތުނަކުރަން މަސައްކަތް ކުރި ކަމުގެ ތުހުމަތުގައި ވެސް ފުރަތަމަ ބައެއް ކެންޑިޑޭޓުންގެ ކެންޑިޑެސީ ބާތިލުކުރިއެވެ.
އެކަމަކު، މައްސަލަ ބޮޑުވުމުން ކޯލިޝަން ލީޑަރު ރައީސް ޑރ. މުހައްމަދު މުއިއްޒު ވަނީ ފޯމު ހުށަހެޅުއްވި ހުރިހާ ކެންޑިޑޭޓުންނަށް ޕްރައިމަރީގައި ވާދަކުރެއްވޭނެކަން އިއުލާނުކުރައްވައިފައެވެ.