27 Jan 2024, 11:18
ޣައްޒާގައި އިސްރާއީލުން ހިންގަމުންދާ ގަތުލު އާންމު ހުއްޓުވުމަށް ފިޔަވަޅު އަޅައި، އެފަދަ އަމަލެއް ނުހިންގާނެ ކަމަށް ކަށަވަރުކުރުމަށް އިންޓަނޭޝަނަލް ކޯޓު އޮފް ޖަސްޓިސް (އައިސީޖޭ)އިން އިސްރާއީލުގެ މައްޗަށް ކުރި ހުކުމަށް ޣައްޒާގެ ވެރިކަންކުރާ ހަމާސް ޖަމާއަތުން މަރުހަބާ ކިޔައިފިއެވެ.
ހަމާސްއިން ނެރުނު ބަޔާނެއްގައި ބުނީ ދުނިޔޭގެ އެންމެ މަތީ ކޯޓުން ނެރުނު އެ އަމުރުގެ މާނައަކީ ޣައްޒާގައި ތިބި ފަލަސްތީނު ރައްޔިތުންނަށް އިސްރާއީލުން ހުރިހާ ގޮތަކުން ކުރާ އަނިޔާވެރިކަން ހުއްޓުވުން ކަމަށެވެ. އަދި އެއީ ޣައްޒާގެ ރައްޔިތުންނާ ދެކޮޅަށް އިސްރާއީލުން ހިންގަމުންދާ ހަނގުރާމައިގެ ކުށްތައް ދުނިޔެއަށް ހާމަކޮށްދޭން ކުރަމުންދާ މަސައްކަތްތަކަށް ލިބުނު ކުރިއެރުމެއްގެ ގޮތުގައި ހަމާސްއިން ސިފަކުރެއެވެ.
ކޯޓުގެ އަމުރު ތަންފީޒުކުރުމަށް ބައިނަލްއަގުވާމީ މުޖުތަމައުއަށް ހަމާސްއިން ވަނީ ގޮވައިލައިފައެވެ. އަދި ދެކުނު އެފްރިކާއިން އިސްރާއީލާ ދެކޮޅަށް ހުށަހެޅި ނަސްލު ނައްތާލުމުގެ މައްސަލައިގެ އެންމެ ފަހުގެ ހުކުމަށް އިންތިޒާރުކުރާ ކަމަށްވެސް އެ ޖަމާއަތުން ބުންޏެވެ.
ފަލަސްތީނުގެ ޣައްޒާގެ މުސްލިމުންގެ ނަސްލު ނައްތައިލުމަށް އިސްރާއީލުގެ ފައުޖުތަކުން ހިންގަމުންދާ ގަތުލުއާންމު ހުއްޓައިލަން އައިސީޖޭއިން އިސްރާއީލުގެ މައްޗަށް އަމުރު ކޮށްފައި ވަނީ ހުކުރު ދުވަހުއެވެ. ފަލަސްތީނުގެ މުސްލިމުންނާ ދެކޮޅަށް ޔަހޫދީން ހިންގަމުންދާ ގަތުލުއާންމުގެ މައްސަލަ އައިސީޖޭއަށް ހުށަހަޅާފައި ވަނީ ދެކުނު އެފްރިކާއިންނެވެ.
ނަމަވެސް އެ މައްސަލައިގައި ކޯޓުގެ ހުކުމް އިއްވާފައިވާއިރު، ދެކުނު އެފްރިކާއިން އެދިފައިވާ ގޮތަށް، އިސްރާއީލުގެ ލާއިންސާނީ އުދުވާނަށް ނިމުމެއް ގެނެސް މިހާރުން މިހާރަށް ހަނގުރާމަ ހުއްޓައިލުމަށް ކޯޓުން އަމުރު ކޮށްފައެއް ނުވެއެވެ.
ފަލަސްތީނުގެ މުސްލިމުންނާ ދެކޮޅަށް ގަތުލުއާންމުތައް ހިންގާފައިވާ އިސްރާއީލު ސިފައިންނާ ދެކޮޅަށް ފިޔަވަޅު އަޅައި، އަދަބު ދޭން ޖެހޭނެ ކަމަށް ކޯޓުގެ އަމުރުގައި އިތުރަށް ގޮވައިލައިފައިވެއެވެ. ޣައްޒާގެ މުސްލިމުންނަށް ފޯރުކޮށްދޭ އިންސާނީ އެހީ މިހާރަށްވުރެ އިތުރުކުރުމަށްވެސް އެ އަމުރުގައި ގޮވައިލައިފައިވެއެވެ.