27 Jan 2024, 14:39
ޣައްޒާގެ އާންމުންނަށް އެހީވުމަށް ދަރުމައަށް މަސައްކަތްކުރާ ކެނެޑާގެ ރައްޔިތެއް ކަމަށްވާ މަންސޫރު ޝޮއުމާން އާދީއްތަ ދުވަހުން ފެށިގެން ގެއްލިފައިވާ ކަމަށް އޭނާގެ އާއިލާއާއި ޓީމުން ބުނެފިއެވެ.
ޣައްޒާގައި ހާލުގައި ޖެހިފައިވާ މީހުންނަށް އެހީތެރިކަން ފޯރުކޮށްދެމުންދާ މަންސޫރު އެންމެ ފަހުން ފެނުނީ ޣައްޒާގެ ހާން ޔޫނިސްގައި ހުންނަ ނާސިރު ހޮސްޕިޓަލުން ކަމަށް ރިޕޯޓުތައް ބުނެއެވެ. މަންސޫރު ގެއްލިފައި ވަނީ އިސްރާއީލުގެ ފައުޖުތަކުން ނަސީރު ހޮސްޕިޓަލަށް ހަމަލާ ދިން ފަހުންނެވެ.
ހަމަލާތަކާ ގުޅިގެން މަންސޫރު ވަނީ ޣައްޒާއާއި މިސްރު ގުޅޭ ސަރަހައްދީ ރޮނގު ކައިރީގައި އޮންނަ ރަފަޙް ސިޓީއަށް ފިލައިގެން ދިއުމަށް އުޅެފައި ކަމަށާއި ނަމަވެސް އޭގެފަހުން އޭނާ ފެނިފައިނުވާ ކަމަށް ރިޕޯޓުތައް ބުނެއެވެ.
މަންސޫރު ގެއްލުމާ ގުޅިގެން ސޯޝަލް މީޑިއާއަށް އޭނާގެ މަންމަ ދޫކޮށްލި ވީޑިއޯއެއްގައި ބުނާ ގޮތުން މަންސޫރަކީ ކޮންމެ ދުވަހަކުވެސް އޭނާގެ އާއިލާއަށް ޚަބަރުވާ މީހެކެވެ. އޭނާގެ އަންހެނުންނާއި މަންމަގެ ހާލު ބަލަން ކޮންމެ ދުވަހަކުވެސް ގުޅާ ކަމަށް މަންސޫރުގެ މަންމަ ބުންޏެވެ. ނަމަވެސް އާދީއްތަ ދުވަހުން ފެށިގެން މަންސޫރުގެ ޚަބަރެއް ނުވާ ކަމަށް އޭނާގެ މަންމަ ވީޑިއޯގައި ބުނެއެވެ.
މަންސޫރާއި އޭނާގެ އަންހެނުން އަދި ފަސް ކުދިންނަކީ ޣައްޒާގައި ތިބި ކެނެޑާގެ ރައްޔިތުންގެ ތެރެއިން އެންމެ ފުރަތަމަ ޣައްޒާއިން ނުކުންނަން ހުއްދަ ދިން މީހުންގެ ތެރޭގައި ހިމެނޭ މީހުންނެވެ. ނަމަވެސް މަންސޫރު ޣައްޒާގައި މަޑުކުރީ ޣައްޒާގެ އާންމުންނަށް އެހީތެރިކަން ފޯރުކޮށްދިނުމަށް އަމިއްލައަށް އެދިގެންނެވެ.
ޣައްޒާގައި އިސްރާއީލުން ހިންގާ ޖަރީމާތަކުގެ އެންމެ ފަހުގެ ތާޒާ ޚަބަރުތައް ގެނެސްދޭ މަންސޫރުގެ އިންސްޓާގްރާމް އެކައުންޓު ގިނަ ބަޔަކު ފޮލޯކުރެއެވެ.