27 Jan 2024, 10:59
މި ސީޒަން ނިމުމުން އިންގްލިޝް ޕްރިމިއާ ލީގުގެ ތާވަލްގެ އެއްވަނައިގައި އުޅޭ ލިވަޕޫލްގެ ކޯޗް ކަމުން ވަކިވާން ނިންމާފައިވާކަމަށް ޔާގަން ކްލޮޕް ހާމަކޮށްފިއެވެ.
ކްލޮޕް ހާމަކުރިގޮތުގައި އޭނާ ލިވަޕޫލް ދޫކޮށްލަން ނިންމީ އޭނާއަށް މި ޕްރެޝަރުގައި ކޮންމެ ދުވަހު މަސައްކަތް ކުރެވޭ ވަރަށް ހަކަތަ ނުހުންނާނެ ކަމަށް ފެންނާތީ ކަމަށެވެ. ލިވަޕޫލްގެ ކޯޗް ކަމާ ކްލޮޕް ހަވާލުވެފައިވަނީ 2015 ވަނަ އަހަރުއެވެ. އަދި ލިވަޕޫލާއެކު ހަދާފައިވާ އާ އެއްބަސްވުން ހަމަވާނީ 2026 ވަނަ އަހަރުއެވެ.
ކްލޮޕް ބުނި ގޮތުގައި އޭނާ ވަނީ ކްލަބް ދޫކޮށްލަން ނިންމާފައިވާކަން ލިވަޕޫލްގެ އިސްވެރިންނަށް މިދިޔަ އަހަރުގެ ނޮވެމްބަރު މަހު އަންގާފައެވެ. އުމުރުން 56 އަހަރުގެ ކްލޮޕް ބުނި ގޮތުގައި މިޚަބަރަކީ ފުރަތަމަ ފަހަރަށް އަޑުއިވޭއިރު ގިނަ ބަޔަކަށް ސިހުން ގެނުވާނެ ކަމަކަށް ވެގެން ހިނގައިދާނެކަމަށެވެ. ނަމަވެސް އޭނާ މިކަން ކުރަން ނިންމި ސަބަބު ހާމަކުރާނެ ކަމަށާއި ނުވަތަ ހާމަކުރަން މަސައްކަތް ކުރާނެ ކަމަށެވެ.
ކްލޮޕް ބުނީ ލިވަޕޫލާ ގުޅޭ ހުރިހާ ކަމަކަށް އޭނާ ލޯބި ކުރާ ކަމަށާއި ލިވަޕޫލް ސިޓީއަކަށް ބަލާއިރުވެސް އޭނާ ވަރަށް ގަޔާވާކަމަށެވެ. އަދި މިކްލަބްގެ ސަޕޯޓަރުންނާއި ޓީމާއި ސްޓާފުންގެ ވާހަކަވެސް ދައްކާނެ ކަމެއް ނެތް ކަމަށާއި އޭނާ މިހުރިހާ ފަރާތްތަކެއް ދެކެވެސް ލޯބި ވާ ކަމަށް ބުންޏެވެ. މިހުރިހާ ކަމަކާއެކުވެސް މިފަދަ ނިންމުމެއް ނިންމުމުން އަންގައިދެނީ އޭނާ މިކަން ނިންމާފައިވަނީ ވަރަށް ވިސްނާފައިކަން ކަމަށް ކްލޮޕް ބުންޏެވެ.
އޭނާ ބުނި ގޮތުގައި އޭނާއަށް މިވަގުތު އެއްވެސް މައްސަލައެއް ނެތް ކަމަށާއި ނަމަވެސް އޭނާ ގަބޫލް ކުރާ ގޮތުގައި އޭނާގެ ގައިގައި މިހަކަތަ މިގޮތުގައި އަބަދު ނުހުންނާނެ ކަމަށާއި މިއީ ކޮންމެވެސް ހިސާބަކުން ނިންމަން ޖެހޭނެ ނިންމުމެއް ކަމަށެވެ. އަދި މިފެންވަރުގައި ކޮންމެ ދުވަހު މަސައްކަތް ކުރުމަކީ ފަސޭހަ ކަމެއް ނޫން ކަމަށްވެސް ކްލޮޕް ހާމަކުރިއެވެ. ކްލޮޕް އާއެކު ލިވަޕޫލްގެ އެސިސްޓަންޓް ކޯޗުންގެ ގޮތުގައި މަސައްކަތް ކުރާ ޕެޕީން ލިންޑަސް އާއި ޕީޓާ ކްރަވީޓްޒް އާއި އެލީތު ޑިވެލޮޕްމެންޓް ކޯޗް ވީޓޯ މަޓޯސްގެ މިސީޒަން ނިމުމުން އެކްލަބާ ވަކިވާނެއެވެ.
ކްލޮޕް ހާމަކުރިގޮތުގައި އޭނާ ދެން އިންގްލަންޑްގެ އެހެން ކްލަބެއްގެ ކޯޗް ކަމާ ހަވާލު ނުވާނެއެވެ. ނަމަވެސް މިއީ ކޯޗް ކޮށްދިނުމުގެ ނިމުން ކަމަށް އަދި ބުނަން އަވަސް ކަމަށް އޭނާ ބުންޏެވެ.
ކްލޮޕްގެ ކޯޗް ކަމުގެ ދަށުން ލިވަޕޫލް ކުޅުނު 466 މެޗްގެ ތެރެއިން 283 މެޗް ވަނީ ކާމިޔާބު ކޮށްފައެވެ. އަދި މެޗްތަކުގައި ލިވަޕޫލުން ވަނީ 972 ލަނޑު ކާމިޔާބު ކޮށްފައެވެ. ކްލޮޕް އަކީ ޕްރިމިއާ ލީގާއި ޗެމްޕިއަންސް ލީގު، އެފް އޭ ކަޕް، ކަރަބާއޮ ކަޕް ކާމިޔާބު ކުރި ހަމައެކަނި ލިވަޕޫލްގެ ކޯޗެވެ.