25 Jan 2024, 23:56
ރާއްޖޭގެ ގައުމީ ބޭންކް، ބޭންކް އޮފް މޯލްޑިވްސް (ބީއެމްއެލް)ގެ ހުރިހާ ނޮންއެކްޒެކެޓިވް މެންބަރުން ވަކިކޮށްފައިވާ ކަމަށް ބީއެމްއެލްއިން މިރޭ ބުނެފިއެވެ.
ބީއެމްއެލްއިން މިރޭ "ސަން"އަށް ބުނީ، ނޮން އެކްޒެކެޓިވް މެންބަރުން ވަކިކޮށްފައިވާ ކަމުގެ ސިޓީ ޕީސީބީން ފޮނުވައިފައިވާ ކަމަށެވެ.
އެގޮތުން ވަކި ކޮށްފައިވާ މެންބަރުންގެ ތެރޭގައި ޗެއާޕާސަން ޔޫޝަޢު ސަޢީދު ހިމެނޭ ކަމަށް މައުލޫމާތު ލިބިފައިވެއެވެ.
ބީއެމްއެލްއިން ވަނީ، އެ މެންބަރުން ވަކި ކުރުމާ ގުޅިގެން އެ ބޭންކުން ކަސްޓަމަރުންނަށް ފޯރުކޮށްދޭ ޚިދުމަތަށް އެއްވެސް މެދުކެނޑުމެއް ނާންނާނެ ކަމަށް ބުނެފައެވެ.
ބީއެމްއެމްލްގެ ނޮން އެކްޒެކެޓިވް މެންބަރުން ވަކިކޮށްފައިވަނީ ބީއެމްއެލްގެ ކާޑު މެދުވެރިކޮށް ރާއްޖެއިން ބޭރުގައި ކިޔަވާ ދިވެހި ދަރިވަރުންނަށް އަންނަ ފެބްރުއަރީ މަހުން ފެށިގެން މަހަކު ޑޮލަރު ނެގޭ ލިމިޓު 1200 ބޮޑުކުރަން ނިންމާފައިވާ ދަނޑިވަޅެއްގައެވެ.
މީގެއިތުރުން، މިމަހުގެ ތެރޭގައި ޑޮލަރު ލިބުމުގައި ދަތިތަކެއް ކުރިމަތިވެ އިންޓަނޭޝަނަލް ޓްރާންސްފާ (ޓީޓީ)ތަކަށް ޑޮލަރުން ފައިސާ ހަމަޖައްސަން ދަތިވެފައިވާތީ ބައެއް ވިޔަފާރިވެރިން ކަންބޮޑުވުން ފާޅުކޮށްފައި ވަނިކޮށެވެ.