25 Jan 2024, 20:56
ކަރަބާއޮ ކަޕް ފުޓްބޯޅަ މުބާރާތުގެ ފައިނަލުން ލިވަޕޫލް ޖާގަ ހޯދައިފިއެވެ.
މިމުބާރާތުގެ ފައިނަލުން ލިވަޕޫލް ޖާގަ ހޯދީ ސެމީފައިނަލްގައި ފުލަމްއާ ބައްދަލުކޮށް ކުޅުނު ދެލެގް ތިން ލަނޑު ދެ ލަނޑުގެ އެގްރިގޭޓް ނަތީޖާއަކުން ކާމިޔާބު ކޮށްގެންނެވެ. މިދެޓީމްގެ މެދުގައި ކުޅުނު ފުރަތަމަ ލެގް ލިވަޕޫލްގެ ދަނޑުގައި ކުޅެ ދެ ލަނޑު އެއް ލަނޑުން ކާމިޔާބު ކޮށްފައިވަނީ ލިވަޕޫލްއެވެ. ނަމަވެސް ފުލަމްގެ ދަނޑުގައި ރޭ ކުުޅުނު ދެވަނަ ލެގް ނިމުނީ އެއް ލަނޑު އެއް ލަނޑުން ދެޓީމް އެއްވަރު ވެގެންނެވެ.
ދެ ޓީމްގެ ފަރާތުން ވާދަވެރި ކުޅުމެއް ފެނުނު ދެވަނަ ލެގްގައި ގިނައިރު ބޯޅަ ގެންގުޅެ ގިނަ ހަމަލާ އުފައްދާފައިވަނީ ލިވަޕޫލުންނެވެ. މިމެޗުގެ ފުރަތަމަ ލަނޑު ޖަހައި މެޗުގެ ލީޑު ނަގައިފާވަނީ ލިވަޕޫލުންނެވެ.
މެޗުގެ 11 ވަނަ މިނެޓްގައި މި ލަނޑު އެޓީމަށް ކާމިޔާބުކޮށްދިނީ ލުއިސް ޑިއާޒްއެވެ. މިމެޗުގެ ފުރަތަމަ ހާފުގައި އިތުރު ލަނޑެއް ނުފެނުނު ނަމަވެސް ލަނޑު ޖަހާނެ ރަނގަޅު ފުރުސަތު ދެޓީމަށްވެސް މިހާފުގައި ލިބުނެވެ.
މިމެޗުގައި ފުލަމްއިން ކާމިޔާބު ކުރި ހަމައެކަނި ލަނޑު މެޗުގެ 76 ވަނަ މިނެޓްގައި ޖަހައިދިނީ އީސާ ޑިއޮޕްއެވެ. މިލަނޑާއެކު މިމެޗުގައި އިތުުރު ލަނޑެއް ޖެހޭތޯ ފުލަމްއިން މަސައްކަތް ކުރި ނަމަވެސް އެޓީމަށް އެކަން ކާމިޔާބު ކުރެވޭގޮތެއް ނުވިއެވެ.
މިކާމިޔާބީއާއެކު ލިވަޕޫލުން މިމުބާރާތުގެ ފައިނަލްގެ ޖާގައެއް ކަށަވަރު ކޮށްފައިވާއިރު މިއަންނަ މަހުގެ 25 ވަނަ ދުވަހު ވެމްބްލީ ސްޓޭޑިއަމްގައި ކުޅުމަށް ހަމަޖެހިފައިވާ ފައިނަލް މެޗުގައި ބައްދަލުކުރާނީ ޗެލްސީއާއެވެ. ޗެލްސީއިން ފައިނަލުން ޖާގަހޯދީ މިޑިލްސްބްރާ އާއި ބައްދަލުކުރި ސެމީފައިނަލް ހަ ލަނޑު ދެ ލަނޑުގެ އެގްރިގޭޓް ނަތީޖާ އަކުން ކާމިޔާބު ކޮށްގެންނެވެ.