25 Jan 2024, 15:10
ރައީސުލްޖުމްހޫރިއްޔާ ޑރ. މުހައްމަދު މުއިއްޒު މި މަހުގެ އަށްވަނަ ދުވަހު ޗައިނާއަށް ކުރެއްވި ފުރަމާނަ ދަތުރުފުޅަށް 2.4 މިލިއަން ރުފިޔާ ޚަރަދުވެފައިވާ ކަމަށް ރައީސް އޮފީހުން މިއަދު ހާމަކޮށްފިއެވެ.
އެއީ، ޗައިނާގެ ރައީސް ޝީ ޖިން ޕިންގެ ރަސްމީ ދައުވަތުފުޅަކަށް ކުރެއްވި ފުރަމާނަ ދަތުރުފުޅެކެވެ. އެ މަނިކުފާނު މި މަހުގެ އަށްވަނަ ދުވަހު ފުރާވަޑައިގެންއިރު، އެނބުރި މާލެ ވަޑައިގަތީ މި މަހުގެ 13 ވަނަ ދުވަހުއެވެ.
އެ ދަތުރުފުޅުގައި އަނބިކަނބަލުން ސާޖިދާ މުހައްމަދާއި ވަޒީރުންގެ މަޖިލީހުގެ ގިނަ ބޭފުޅުން ބައިވެރިވެ ވަޑައިގަތެވެ.
އެ ދަތުރުފުޅުގައި އެ މަނިކުފާނު ސިންގަޕޯ އަދި ދުބާއީގައި ޓްރާންސިޓް ކުރެއްވި ކަމަށް ޚަރަދުން ދައްކައެވެ.
ދަތުރުފުޅުގެ އިތުރު ޚަރަދު:
މާލެ/ސިންގަޕޯ/ޒިއަމެން - ބިޒްނަލް ކްލާހުން ތިން ޓިކެޓް - 185،826.42 ރުފިޔާ
- މާލެ/ސިންގަޕޯ/ޒިއަމެން - އިކޮނޮމީ ކްލާހުން 27 ޓިކެޓް - 676،552.50 ރުފިޔާ
- ބެއިޖިން/ ދުބާއީ/މާލެ- ބިޒްނަސް ކްލާސް 10 ޓިކެޓް- 904،383.00 ރުފިޔާ
- ބެއިޖިން/ ދުބާއީ/މާލެ- އިކޮނޮމީ ކްލާސް 19 ޓިކެޓް- 253،720.68 ރުފިޔާ
މީގެ އިތުރުން 30 ބޭފުޅުންނަށް ޕޮކެޓް މަނީގެ ގޮތުގައި 300،495 ރުފިޔާ ހޭދަވެފައިވެއެވެ. އަދި، ޗައިނާގައި ދިރިއުޅުއްވާ ދިވެހީންނާ ބައްދަލު ކުރެއްވި އިވެންޓުގެ ޚަރަދަށް 3،374.79 ރުފިޔާ އަދި ސިމް ކާޑާއި ވީޕީއެންގެ ޚަރަދުގެ ގޮތުގައި 14،341.69 ރުފިޔާ ހޭދަކުރައްވާފައި ވެއެވެ.
އިންސިޑެންޓަލް ޚަރަދުގެ ގޮތުގައި 89،419 ރުފިޔާ ހޭދަވިއެވެ.
މި ދަތުރުފުޅުގައި ބައިވެރިވެ ވަޑައިގެންނެވި ބޭފުޅުންގެ ތިއްބެވުމާ ފަރިއްކޮޅު ޚަރަދުތައް ހަމަޖައްސައިދެއްވީ ޗައިނާ ސަރުކާރުންނެވެ.
ރައީސްގެ ފުރަތަމަ ފުރަމާނަ ދަތުރުފުޅުގެ ޚަރަދުތައް ހާމަކޮށްފައިވާއިރު، އެ ދަތުރުފުޅުގެ ތެރެއިން މުހިއްމު 20 އެއްބަސްވުމެއްގައި ވަނީ ސޮއިކޮށްފައެވެ. އަދި، ޗައިނާ ސަރުކާރުން ވަނީ މުހިއްމު ގިނަ އެހީތަކެއް ދޭން ނިންމައިފައެވެ.