25 Jan 2024, 14:15
ހުޅުމާލޭގައި ވަގުތީ ކެޓް ޝެލްޓަރެއް އަޅަން މާލޭ ސިޓީ ކައުންސިލާއި އެގްރިކަލްޗާ އެންޑް އެނިމަލް ވެލްފެއާ މިނިސްޓްރީން މިއަދު އެއްބަސްވުމެއްގައި ސޮއިކޮށްފިއެވެ.
މި އެއްބަސްވުމުގައި ސިޓީ ކައުންސިލްގެ ފަރާތުން ސޮއިކުރެއްވީ މޭޔަރު އާދަމް އާޒިމެވެ. އަދި، މިނިސްޓްރީގެ ފަރާތުން ސޮއި ކުރެއްވީ ސްޓޭޓް މިނިސްޓަރު ހުސައިން އިސްމާއިލެވެ.
ހުޅުމާލޭގައި ކެޓް ޝެލްޓަރު ގާއިމުކުރަނީ 5000 އަކަފޫޓުގެ ބިމެއްގައެވެ. މި ތަނުގައި ކެޓް ޝެލްޓަރު ގާއިމް ކުރެވުމުން މާލޭގައި އުޅޭ ބުޅާތައް ގެންގޮސް އެ ތަކެއްޗަށް ފަރުވާ ދެވޭނެ އިންތިޒާމު ގާއިމުކުރާނެއެވެ.
އެއްބަސްވުމުގައި ސޮއި ކުރުމަށްފަހު މޭޔަރު އާޒިމް ވިދާޅުވީ، މި ކަމަށްޓަކާ ކައުންސިލުން ވަރަށް ފުރިހަމަ މަސައްކަތްތަކެއް ކޮށްފައިވާ ކަމަށެވެ. އަދި، މިކަމަށް ބޭނުންވާ ބިން ވެސް ފަސޭހަކަމާ އެކު ހަމަޖެހުނު ކަމަށާއި އެކަމުން ދޭހަވަނީ ކައުންސިލްގެ މަސައްކަތްތަކަށް ސަރުކާރުން އެއްބާރުލުން ދޭކަން ކަމަށް މޭޔަރު ވިދާޅުވިއެވެ.
ވަގުތީ ކެޓް ޝެލްޓަރު އަޅަން ސޮއިކުރުން -- ސަން ފޮޓޯ: އިނފިނިޓް މޮމެންޓްސް/ އަހުމަދު އަމަން ލަތީފް
އޭނާ ވިދާޅުވީ، މާލޭގައި ބުޅަލުގެ އާބާދީ މިހާރު އަންދާޒާ ކުރެވޭ ގޮތުގައި 3000އާ ހަމައަށް އަރާކަމަށެވެ.
"އަޅުގަނޑުމެންނަށް އަންދާޒާ ކުރެވެނީ 3000 ބުޅާ 9000 ބުޅަލަށް ބަދަލުވާނެއޭ މި އަހަރު ނިމެންވާއިރަށް މިކަމަސް އެޓެންޑް ނުކޮށްފިއްޔާ،" އާޒިމް ވިދާޅުވިއެވެ.
ސްޓޭޓް މިނިސްޓަރު ހުސައިން އިސްމާއިލް ވިދާޅުވީ، ދުރު ރާސްތާއަށް ޕްލޭންކޮށްފައި ވަނީ އެ ތަނުގައި ޕެޓް ކެއާ ފެސިލިޓީއެއް ގާއިމކުރުމަށް ކަމަށެވެ.
"ގާތްގަނޑަކަށް އެއް އަހަރާ 18 މަސްދުވަސްތެރޭ އެކަން ވެސް ނިމިގެން ދާނެ. ނިމޭއިރު އެތަނުގައި ކެޓް ކެފޭތައް ނޫނީ ކެޓް ހޮޓާ، ކްލިނިކް ހުންނާނެ. ދެން ސްޓޯލްތައް ހުންނާނެ،" މިއީ ތަފާތު ކޮންސެޕްޓަކަށް ތައްޔާރުކުރާ ފެސިލިޓީއެއްކަން ފާހަގަކުރައްވާ އޭނާ ވިދާޅުވިއެވެ.
އޭނާ ވިދާޅުވީ، ވަގުތީ ކެޓް ޝެލްޓަރުން ވެސް މާލެއަށް މި ވުގުތު ދިމާވެފައިވާ ގޮންޖެހުންތަކަށް ހައްލެއް ލިބޭނެ ފެންވަރު ހުންނާނެކަމަށެވެ.
ހުރިހާ ވަގުތަކު ވެސް ސިއްހީ ޚިދުމަތް ލިބޭނެހެން ހުޅުމާލެ ދެވަނަ ފިޔަވައްސާ ގުޅިފައި އޮތް ފަރުކޮޅުފުށީގައި ޕެޓް ކެއާ ފެސިލިޓީއެއް ގާއިމު ކުރަން ނިންމާ މި މަހުގެ 11ވަނަ ދުވަހު ވެސް ވަނީ އެއްބަސްވުމެއްގައި ސޮއިކޮށް ބިން ހަވާލުކޮށްފައެވެ.