25 Jan 2024, 11:51
އަންނަ މާރިޗު މަހުގެ 17 ވަނަ ދުވަހު ބާއްވަން ހަމަޖެހިފައިވާ 20 ވަނަ ރައްޔިތުންގެ މަޖިލީހުގެ އިންތިޚާބަށް މާލޭގެ ދެ ސަރަހައްދެއްގައި ޓެންޓު ޖަހައިގެން 40 ވޯޓުލާ މަރުކަޒު ތައްޔާރުކޮށްދޭނެ ފަރާތެއް ހޯދަން އިލެކްޝަންސް ކޮމިޝަން (އީސީ)އިން އިއްޔެ އިއުލާނުކޮށްފިއެވެ.
އީސީން މީގެ ކުރިން ބުނެފައިވަނީ މަޖިލިސް އިންތިޚާބުގައި ޖުމުލަ 700 އެއްހައި ވޯޓު ފޮށި ބަހައްޓާނެ ކަމަށެވެ. އެއީ، ކިއުތައް ވީހާ ވެސް ކުރުކުރަން ކަމަށް އޭރު އީސީން ބުންޏެވެ. މި ފަހަރުގެ އިންތިޚާބު އޮންނަ ދުވަސް، ސްކޫލުތަކުގެ އިމްތިހާނު ދުވަސްވަރާ ދިމާވާތީ ވޯޓުލާ މަރުކަޒުތައް ހަދަން ސްކޫލުތައް ލިބުން ދަތިވެފައިވާ ކަމަށް އީސީން މީގެ ކުރިން ވަނީ ބުނެފައެވެ.
އީސީން ވަނީ މާލޭގެ ދެ ސަރަހައްދެއްގައި ޓެންޓު ޖަހައިގެން 40 ވޯޓުލާ މަރުކަޒު ތައްޔާރުކޮށްދޭނެ ފަރާތެއް ހޯދަން އިއުލާނުކޮށްފައެވެ.
އިއްޔެ އެ ކޮމިޝަނުން ކުރި އިއުލާނެއްގައި ވާގޮތުން، މި މަރުކަޒުތައް ތައްޔާރުކޮށްދޭނެ ފަރާތެއް ހޯދަނީ ބީލަން އުސޫލުންނެވެ. އެގޮތުން، ބީލަން ހުޅުވުން އޮންނާނީ އަންނަ މަހުގެ ހަތަރެއްވާ އާދީއްތަ ދުވަހުގެ 13:00 ގައި އެ ކޮމިޝަނުގެ ޕޯޓް ކޮމްޕްލެކްސް އިމާރާތުގެ ފަސްވަނަ ފަންގިފިލާގައި ކަމަށް އެ ބާޔާނުގައިވެއެވެ.
މީގެ އިތުރުން، ގަޑިޖެހުމަށް ފަހު ހުށަހަޅާ ބީލަންތައް ބަލައިނުގަންނާނެ ކަމަށް އެ ކޮމިޝަނުން ބުންޏެވެ. އަދި، ބީލަންތައް ހުންނަންވާނީ ސިޓީ އުރައެއްގައި ބަންދުކުރެވިފައި ކަމަށާއި، ސިޓީ އުރައިގެ ބޭރުގައި ބީލަމަށް ދެވިފައިވާ ނަން، ޕްރޮޖެކްޓް ނަންބަރު، ހުޅުވަން ކަނޑައެޅިފައިވާ ތާރީޚާއި ވަގުތު އަދި ކޮންޓްރެކްޓަރުގެ ނަން ލިޔެވިފައި އޮންނަންވާނެ ކަމަށް ބުންޏެވެ.
ބީލަމާ ބެހޭގޮތުން މައުލޫމާތު ސާފު ކުރުމަށް ބުރާސްފަތި ދުވަހުގެ 13:00 ގެ ކުރިން،[email protected]އަށް އީމެއިލް ކުރުމަށް ވަނީ އެދިފައެވެ.
މަޖިލިސް އިންތިޚާބު ރޯދައާ ދިމާވާތީ، އިންތިޚާބު ރޯދައިގެ ފަހަށް ބަދަލުކުރަން ގާނޫނު އިސްލާހުކުރަން އިދިކޮޅު އެމްޑީޕީއާއި ދަ ޑިމޮކްރެޓްސްއިން މިހާރު ވަނީ އިސްލާހެއް ވެސް ހުށަހަޅައިފައެވެ. ރޯދަ މަހު އިންތިޚާބު ބާއްވާތީ ގިނަ ބަޔަކު ދަނީ ކަންބޮޑުވުން ފާޅުކުރަމުންނެވެ.