25 Jan 2024, 07:11
ބޮލީވުޑްގެ ކުޅަދާނަ ނެށުންތެރިޔާ ނޯރާ ފަތޭހީ ސައުތު ސިނަމާގެ ފިލްމުތައް ތަޖުރިބާކުރަން ތައްޔާރުވެއްޖެއެވެ.
ކެނެޑާއަށް އުފަން ނޯރާ ފަތޭހާއަކީ ކުޅަދާނަ ނެށުންތެރިއެއްގެ ނޯރާ ކުޅުނު ފިލްމުތަކުން ބެލުންތެރިންގެ މަގުބޫލުކަން ވެސް ހޯދާފައިވާ ބަތަލާއެކެވެ. އިންޑިއާގެ ދެކުނުގު ކަންނާޑާ ފިލްމަކަށް ނޯރާ ސޮއިކޮށްފައިވާއިރު "ކޭޑީ-ދަ ޑެވިލް"ގެ ނަމުގައި އުފައްދާ މި ފިލްމުން ނޯރާއާ އެކު ބޮލީވުޑްގެ ބަތަލާ ޝިލްޕާ ޝެޓީ އަދި ސަންޖޭ ދަތު ފެންނާނެއެވެ.
ފިލްމީ ޚަބަރުތައް ގެނެސްދޭ ބޮލީވުޑް ހަންގާމާގައި ބުނެފައިވާ ގޮތުން ނޯރާ ވަނީ "ކޭޑީ-ދަ ޑެވިލް" ގެނެސްދޭ ކަންނާޑާގެ ފިލްމު ކުންފުނި ކޭވީއެން ޕްރޮޑަކްޝަންއާ އެކު ދެ ފިލްމެއްގައި ސޮއިކޮށްފައެވެ. އޭގެ ތެރެއިން ފިލްމު "ކޭޑީ-ދަ ޑެވިލް"އަކީ ނޯރާ ކަންނާޑާ އިންޑަސްޓްރީއަށް ތައާރަފުވާނެ ފިލްމެވެ.
މި ލިބުނު ފުރުސަތާ އެކެ އުފަލުންހުރި ނޯރާ ބުނެފައިވަނީ، އޭނާއަކީ އަބަދު ވެސް އިންޑިއާގެ ސަގާފަތާއި އާދަކާދަތައް ދަސްކުރުމަށް ވަރަށް ޝައުގުވެރިވާ މީހެއް ކަމަށާއި މި ފިލްމާ އެކު އިންޑިއާގެ ދެކުނުގެ ބަހުރުވައާއި އާދަކާދަތައް ދެނެގަންނަން މިއީ ލިބުނު ރަނުގެ ފުރުސަތެއް ކަމަށެވެ. މި އަހަރުގެ ފަހުކޮޅު ރިލީޒްކުރުމަށް ތައްޔާރުވަމުން އަންނަ މި ފިލްމަކީ ވަރަށް ވަރުގަދަ އެކްޝަން ފިލްމެކެވެ.
ބަތަލާ ނޯރާ ފަތޭހީ ފިލްމު "ބޫޖް: ދަ ޕްރައިޑް އޮފް އިންޑިއާ"ގެ ޕްރޮމޯޝަން އިވެންޓެއްގައި-- ފޮޓޯ/ އިންޓަނެޓް
ކަންނާޑާ ފިލްމު އިންޑަސްޓްރީއަށް ނޯރާއަށް މަރުހަބާ ކިޔަމުން ކޭވީއެން ޕްރޮޑަކްޝަންއިން ބުނެފައިވަނީ ނޯރާ ފާހަގަ ކުރެވެނީ މަސައްކަތަށް ވަރަށް ފަރުވާތެރި އަބަދު ވެސް އެންމެ ފުރިހަމަ ހުށަހެޅުން ދައްކުވައިދިނުމަށް މަސައްކަތް ކުރާ ބަތަލާއެއްގެ ގޮތުގައެވެ.
ރީތި މިއުޒިކް ވީޑިއޯތަކުން ބެލުންތެރިންގެ ހިތް އަތުލާފައިވާ ނޯރާ ކުޅެފައިވާ ބޮލީވުޑް ފިލްމުތަކުގެ ތެރޭ "ބޫޖް: ދަ ޕްރައިޑް އޮފް އިންޑިއާ"، "ބާރަތު" އަދި "ސްޓްރީޓް ޑާންސާ 3ޑީ" ހިމެނެއެވެ.