25 Jan 2024, 07:06
ވަރަށް ގިނަ ފަރާތްތަކަށް އެހީތެރިކަން ފޯރުކޮށްދޭ ބޮލީވުޑްގެ ފިލްމީ ތަރި ސޯނޫ ސޫދު އުމުރުން ދުވަސްވީ މީހުން ދިރިއުޅޭނެ ހާއްސަ ތަނެއް އިމާރާތް ކުރުމަށް ނިންމައިފިއެވެ.
ސޯނޫގެ މި ނިންމުމަކީ 2007 ވަނަ އަހަރު ދުނިޔެ ދޫކޮށްފައިވާ އެކްޓަރުގެ މަންމަ ސަރޯޖް ސޫދްގެ ހަނދާނުގައި އިމާރާތް ކުރަން ނިންމި ތަނެކެވެ.
ސަރޯޖް ސެނެޓީގެ ނަމުގައި އިމާރާތްކުރާ މި ތަނަކީ އުމުރުން ދުވަސްވީ މީހުންނަށް އުފާވެރިކަމާ އެކު ދިރިއުޅޭނެ ތަނެއް ހޯދައިދީ ބޯހިޔާވަހިކަން ނުލިބިވާ މީހުންނަށް ސޯނޫގެ ފަރާތުން ދެވޭ ވަރަށް އަގުބޮޑު ހަދިޔާއެކެވެ. ސަރޯޖް ސެނެޓީ އިމާރާތް ކުރުމަށް ހަމަޖެހިފައިވަނީ ސޯނޫގެ އަމިއްލަ، ސޫދު ފައުންޑޭޝަންގެ އެހީތެރިކަމާ އެކުއެވެ. މި މަޝްރޫއަކީ ހަމައެކަނި އިމާރާތެއް ބިނާކުރުމަށް ވުރެ ބޮޑު ބިޔަ މަޝްރޫއެއް ކަމަށާއި އެކި ސަބަބުތަކާ ހުރެ ދަރިންނާ އެކު ދިރިނޫޅެވޭ އުމުރުން ދުވަސްވީ މީހުންނަށް ލޯތްބާ އެކު އުފާވެރި މާހައުލެއް ސަރޯޖް ސެނެޓީން ހޯދައިދެވޭނެ ކަމަށް ސޫދު ފައުންޑޭޝަނުން ވަނީ ބުނެފައެވެ.
ފިލްމީ ތަރި ސޯނޫ ސޫދު-- ފޮޓޯ/ބޮލީވުޑްހަންގާމާ
އިންޑިއާގެ އެކި ހިސާބުތަކުގައި އެހީތެރިކަން ބޭނުންވެފައިވާ މީހުންނަށް ސޯނު ވަނީ މިހާތަނަށް ވަރަށް ގިނަ ހިދުމަތްތަކެއް ސޫދު ފައުންޑޭޝަން މެދުވެރިކޮށް ކޮށްދީފައެވެ. ހާއްސަކޮށް ކޮވިޑް-19އިގެ ބަލިމަޑުކަން ތަހައްމަލު ކުރި ދުވަސްވަރު ހާލުގައި ޖެހުނު ވަރަށް ގިނަ ބަޔަކަށް ސޯނޫ ވަނީ އެހީވެފައެވެ. ސޯނޫގެ އިރުޝާދުގެ ދަށުން އެކްޓަރުގެ ސޫދު ފައުންޑޭޝަން އަންނަނީ އިންސާނިއްޔަތަށް ފައިދާ ހުރި ގިނަގުނަ މަސައްކަތްތަކެއް ކޮށްދެމުންނެވެ.
މިދިޔަ އަހަރު ސައުތު ސިނަމާގެ ދެ ފިލްމަކުން ބެލުންތެރިންނާ ބައްދަލުކުރި އެކްޓަރު އެންމެ ފަހުން ކުޅުނު ހިންދީ ފިލްމަކީ "ސަމްރާތު ޕްރިތްވީރާޖް"އެވެ.
ސޯނޫ އަންނަނީ އަމިއްލަ ޕްރޮޑަކްޝަން ކުންފުންޏާއި ޒީ ސްޓޫޑިއޯ ގުޅިގެން ގެނެސްދޭ ފުރަތަމަ ފިލްމުގެ މަސައްކަތް ކުރަމުންނެވެ. އެކި ލެވެލްތަކުގެ ސައިބަ ކްރައިމްއަށް އަމާޒުކޮށްގެން އުފައްދާ މި ފިލްމު "ފަތޭހް"އިން ސޯނޫއާ އެކު ފެންނާނީ ބަތަލާ ޖެކްލީން ފެނާންޑޭޒްއެވެ.