24 Jan 2024, 23:11
ފުވައްމުލަކު ސިޓީގައި ކަރަންޓުގެ ޚިދުމަތް ފޯރުކޮށްދެމުންދިޔަ 500 ކިލޯވޯޓްގެ ޖަނަރޭޓަރު ބަދަލުކޮށް އެ ސިޓީއަށް އަލުން ކަރަންޓުގެ ޚިދުމަތް ދޭން ފަށައިފައިވާ ކަމަށް ފެނަކަ ކޯޕަރޭޝަނުން މިރޭ ބުނެފިއެވެ.
އެ ކޯޕަރޭޝަނުން މީގެ ކުރިން ބުނީ، އެ ސިޓީގައި ކަރަންޓުގެ ޚިދުމަތް ދެމުންދާ 500 ކިލޯވޯޓްގެ ޖަނަރޭޓަރެއް އަނެއްކާ ވެސް ހަލާކުވެ މިއަދު ހަވީރު 15:35 ހާއިރު މުޅި ރަށުން ކަރަންޓު ކެނޑިފައިވާ ކަމަށެވެ.
ނަމަވެސް، ފެނަކައިން މިރޭ އެކްސްގައި ކުރި ޕޯސްޓެއްގައި ބުނީ، ހަލާކުވި ޖަނަރޭޓަރު ބަދަލުކޮށް މިރޭ 22:05 ގައި ފުވައްމުލަކުގެ ހުރިހާ ހިސާބަކަށް ކަރަންޓުގެ ޚިދުމަތް ދީފައިވާ ކަމަށެވެ.
މީގެ ކުރިން ފެނަކައިން ބުނީ، އެ ސިޓީއަށް ކަރަންޓުގެ ޚިދުމަތް ފޯރުކޮށްދެމުން އަންނަ 800 ކިލޯވޯޓުގެ ޖަނަރޭޓަރަށް މައްސަލަތަކެއް ދިމާވެ، މައިގަނޑު ބައިތަކެއް ހަލާކުވެފައިވާ ކަމަށެވެ.
އެހެންވެ، ހަލާކުވި ޖަނަރޭޓަރު ހެދުމުގެ މަސައްކަތް ކުރަމުން އަންނަ ކަމަށާއި މި މައްސަލައަށް އެދެވޭ ހައްލެއް ގެނައުމަށް 1200 ކިލޯވޯޓްގެ ޖަނަރޭޓަރެއް ހޯދުމަށް މަސައްކަތް ކުރާކަމަށް ވެސް ފެނަކައިން ވަނީ ބުނެފައެވެ.
ކަރަންޓުގެ ޚިދުމަތް މެދުކަނޑައިލަން ޖެހުނީ ހޫނު ދުވަސް ވަރަަކަށްވާތީ މި މަހުގެ 11އިން ފެށިގެން ކަރަންޓުގެ ލޯޑު މަތިވާތީ ކަމަށް ފެނަކައިން މީގެކުރިން ވަނީ ބުނެފައެވެ.
އަދި، މިފަދަ މައްސަލަތައް ދިމާވަނީ ނިމިދިޔަ އަހަރުތަކުގެ ތެރޭގައި ޖަނަރޭޓަރުތަކުގެ މެއިންޓެނަސް މަސައްކަތް ހުއްޓިފައި އޮތުމުން ކަމަށް ފެނަކައިން ތުހުމަތު ކުރެއެވެ.
މިކަމާ ގުޅިގެން ފުވައްމުލަކު ސިޓީ ކައުންސިލުގެ ސެކެޓްރީ ޖެނެރަލް އަސްލަމް ރަޝީދު މީގެ ކުރިން "ސަން"އަށް ވިދާޅުވީ، ކޮންމެ ދުވަހަކު ވެސް މެންދުރު ކުރީގެ ވަގުތުތަކުގައި ރަށުގެ ހުރިހާ ސަރަހައްދަކަށް ކަރަންޓު ލިބޭ ކަމަށެވެ.